១. បច្ចយានុលោមំ

១. វិភង្គវារោ

ហេតុបច្ចយោ

១. សំកិលិដ្ឋសំកិលេសិកំ ធម្មំ បដិច្ច សំកិលិដ្ឋសំកិលេសិកោ ធម្មោ ឧប្បជ្ជតិ ហេតុបច្ចយា – សំកិលិដ្ឋសំកិលេសិកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (១)

សំកិលិដ្ឋសំកិលេសិកំ ធម្មំ បដិច្ច អសំកិលិដ្ឋសំកិលេសិកោ ធម្មោ ឧប្បជ្ជតិ ហេតុបច្ចយា – សំកិលិដ្ឋសំកិលេសិកេ ខន្ធេ បដិច្ច ចិត្តសមុដ្ឋានំ រូបំ. (២)

សំកិលិដ្ឋសំកិលេសិកំ ធម្មំ បដិច្ច សំកិលិដ្ឋសំកិលេសិកោ ច អសំកិលិដ្ឋសំកិលេសិកោ ច ធម្មា ឧប្បជ្ជន្តិ ហេតុបច្ចយា – សំកិលិដ្ឋសំកិលេសិកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ បដិច្ច ទ្វេ ខន្ធា ចិត្តសមុដ្ឋានញ្ច រូបំ. (៣)

អសំកិលិដ្ឋសំកិលេសិកំ ធម្មំ បដិច្ច អសំកិលិដ្ឋសំកិលេសិកោ ធម្មោ ឧប្បជ្ជតិ ហេតុបច្ចយា – អសំកិលិដ្ឋសំកិលេសិកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ បដិច្ច ទ្វេ ខន្ធា ចិត្តសមុដ្ឋានញ្ច រូបំ; បដិសន្ធិក្ខណេ អសំកិលិដ្ឋសំកិលេសិកំ ឯកំ ខន្ធំ បដិច្ច តយោ ខន្ធា កដត្តា ច រូបំ…បេ… ទ្វេ ខន្ធេ បដិច្ច ទ្វេ ខន្ធា កដត្តា ច រូបំ; ខន្ធេ បដិច្ច វត្ថុ, វត្ថុំ បដិច្ច ខន្ធា; ឯកំ មហាភូតំ បដិច្ច តយោ មហាភូតា…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ. (១)

២. អសំកិលិដ្ឋអសំកិលេសិកំ ធម្មំ បដិច្ច អសំកិលិដ្ឋអសំកិលេសិកោ ធម្មោ ឧប្បជ្ជតិ ហេតុបច្ចយា – អសំកិលិដ្ឋអសំកិលេសិកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (១)

អសំកិលិដ្ឋអសំកិលេសិកំ ធម្មំ បដិច្ច អសំកិលិដ្ឋសំកិលេសិកោ ធម្មោ ឧប្បជ្ជតិ ហេតុបច្ចយា – អសំកិលិដ្ឋអសំកិលេសិកេ ខន្ធេ បដិច្ច ចិត្តសមុដ្ឋានំ រូបំ. (២)

អសំកិលិដ្ឋអសំកិលេសិកំ ធម្មំ បដិច្ច អសំកិលិដ្ឋសំកិលេសិកោ ច អសំកិលិដ្ឋអសំកិលេសិកោ ច ធម្មា ឧប្បជ្ជន្តិ ហេតុបច្ចយា – អសំកិលិដ្ឋអសំកិលេសិកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ បដិច្ច ទ្វេ ខន្ធា ចិត្តសមុដ្ឋានញ្ច រូបំ. (៣)

អសំកិលិដ្ឋសំកិលេសិកញ្ច អសំកិលិដ្ឋអសំកិលេសិកញ្ច ធម្មំ បដិច្ច អសំកិលិដ្ឋសំកិលេសិកោ ធម្មោ ឧប្បជ្ជតិ ហេតុបច្ចយា – អសំកិលិដ្ឋអសំកិលេសិកេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. (១)

សំកិលិដ្ឋសំកិលេសិកញ្ច អសំកិលិដ្ឋសំកិលេសិកញ្ច ធម្មំ បដិច្ច អសំកិលិដ្ឋសំកិលេសិកោ ធម្មោ ឧប្បជ្ជតិ ហេតុបច្ចយា – សំកិលិដ្ឋសំកិលេសិកេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ (សំខិត្តំ). (១)