២. សុត្តសាធនំ

២៩៨. ន វត្តព្ពំ – ‘‘អតីតានាគតា ខន្ធា ធាតុ អាយតនំ នត្ថិ ចេតេ’’តិ? អាមន្តា. ននុ វុត្តំ ភគវតា – ‘‘តយោមេ, ភិក្ខវេ, និរុត្តិបថា អធិវចនបថា បញ្ញត្តិ…បេ… វិញ្ញូហីតិ…បេ…’’. អត្ថេវ សុត្តន្តោតិ? អាមន្តា. តេន ហិ ន វត្តព្ពំ – ‘‘អតីតានាគតា ខន្ធា ធាតុ អាយតនំ នត្ថិ ចេតេ’’តិ.

អតីតានាគតា ខន្ធា ធាតុ អាយតនំ នត្ថិ ចេតេតិ? អាមន្តា. ននុ វុត្តំ ភគវតា – ‘‘យំ កិញ្ចិ, ភិក្ខវេ, រូបំ អតីតានាគតបច្ចុប្បន្នំ អជ្ឈត្តំ វា ពហិទ្ធា វា ឱឡារិកំ វា សុខុមំ វា ហីនំ វា បណីតំ វា យំ ទូរេ សន្តិកេ វា, អយំ វុច្ចតិ រូបក្ខន្ធោ. យា កាចិ វេទនា… យា កាចិ សញ្ញា… យេ កេចិ សង្ខារា… យំ កិញ្ចិ វិញ្ញាណំ អតីតានាគតបច្ចុប្បន្នំ…បេ… អយំ វុច្ចតិ វិញ្ញាណក្ខន្ធោ’’តិ. អត្ថេវ សុត្តន្តោតិ? អាមន្តា. តេន ហិ ន វត្តព្ពំ – ‘‘អតីតានាគតា ខន្ធា ធាតុ អាយតនំ នត្ថិ ចេតេ’’តិ.

អតីតក្ខន្ធាទិកថា និដ្ឋិតា.