៧. ឯកច្ចំ អត្ថីតិកថា

១. អតីតាទិឯកច្ចកថា

២៩៩. អតីតំ អត្ថីតិ? ឯកច្ចំ អត្ថិ, ឯកច្ចំ នត្ថីតិ. ឯកច្ចំ និរុទ្ធំ, ឯកច្ចំ ន និរុទ្ធំ; ឯកច្ចំ វិគតំ, ឯកច្ចំ អវិគតំ; ឯកច្ចំ អត្ថង្គតំ, ឯកច្ចំ ន អត្ថង្គតំ; ឯកច្ចំ អព្ភត្ថង្គតំ, ឯកច្ចំ ន អព្ភត្ថង្គតន្តិ? ន ហេវំ វត្តព្ពេ…បេ….

អតីតំ ឯកច្ចំ អត្ថិ, ឯកច្ចំ នត្ថីតិ? អាមន្តា. អតីតា អវិបក្កវិបាកា ធម្មា ឯកច្ចេ អត្ថិ, ឯកច្ចេ នត្ថីតិ? ន ហេវំ វត្តព្ពេ…បេ… អតីតំ ឯកច្ចំ អត្ថិ, ឯកច្ចំ នត្ថីតិ? អាមន្តា. អតីតា វិបក្កវិបាកា ធម្មា ឯកច្ចេ អត្ថិ, ឯកច្ចេ នត្ថីតិ? ន ហេវំ វត្តព្ពេ…បេ… អតីតំ ឯកច្ចំ អត្ថិ, ឯកច្ចំ នត្ថីតិ? អាមន្តា. អតីតា អវិបាកា ធម្មា ឯកច្ចេ អត្ថិ ឯកច្ចេ នត្ថីតិ? ន ហេវំ វត្តព្ពេ…បេ….

អតីតំ ឯកច្ចំ អត្ថិ ឯកច្ចំ នត្ថីតិ? អាមន្តា. កិំ អត្ថិ កិំ នត្ថីតិ? អតីតា អវិបក្កវិបាកា ធម្មា – តេ អត្ថិ; អតីតា វិបក្កវិបាកា ធម្មា – តេ នត្ថីតិ. អតីតា អវិបក្កវិបាកា ធម្មា – តេ អត្ថីតិ? អាមន្តា. អតីតា វិបក្កវិបាកា ធម្មា – តេ អត្ថីតិ? ន ហេវំ វត្តព្ពេ…បេ… អតីតា អវិបក្កវិបាកា ធម្មា – តេ អត្ថីតិ? អាមន្តា. អតីតា អវិបាកា ធម្មា – តេ អត្ថីតិ [អតីតា អវិបក្កវិបាកា ធម្មា តេ នត្ថីតិ (ក.)]? ន ហេវំ វត្តព្ពេ…បេ….

អតីតា វិបក្កវិបាកា ធម្មា – តេ នត្ថីតិ? អាមន្តា. អតីតា អវិបក្កវិបាកា ធម្មា – តេ នត្ថីតិ? ន ហេវំ វត្តព្ពេ …បេ….

អតីតា អវិបាកា [វិបក្កវិបាកា (ស្យា.), អវិបក្កវិបាកា (ក.)] ធម្មា – តេ នត្ថីតិ? អាមន្តា. អតីតា អវិបក្កវិបាកា [អវិបាកា (ស្យា.)] ធម្មា – តេ នត្ថីតិ? ន ហេវំ វត្តព្ពេ…បេ….

អតីតា អវិបក្កវិបាកា ធម្មា – តេ អត្ថីតិ? អាមន្តា. ននុ អតីតា អវិបក្កវិបាកា ធម្មា និរុទ្ធាតិ? អាមន្តា. ហញ្ចិ អតីតា អវិបក្កវិបាកា ធម្មា និរុទ្ធា, នោ ច វត រេ វត្តព្ពេ – ‘‘អតីតា អវិបក្កវិបាកា ធម្មា – តេ [ធម្មា និរុទ្ធា តេ (ស្យា. ក.)] អត្ថី’’តិ.

អតីតា អវិបក្កវិបាកា ធម្មា និរុទ្ធា – តេ អត្ថីតិ? អាមន្តា. អតីតា វិបក្កវិបាកា ធម្មា និរុទ្ធា – តេ អត្ថីតិ? ន ហេវំ វត្តព្ពេ…បេ… អតីតា អវិបក្កវិបាកា ធម្មា និរុទ្ធា – តេ អត្ថីតិ? អាមន្តា. អតីតា អវិបាកា [អវិបក្កវិបាកា (សី. ក.)] ធម្មា និរុទ្ធា – តេ អត្ថីតិ? ន ហេវំ វត្តព្ពេ…បេ….

អតីតា វិបក្កវិបាកា ធម្មា និរុទ្ធា – តេ នត្ថីតិ? អាមន្តា. អតីតា អវិបក្កវិបាកា ធម្មា និរុទ្ធា – តេ នត្ថីតិ? ន ហេវំ វត្តព្ពេ…បេ….

អតីតា អវិបាកា [វិបក្កវិបាកា (ស្យា.), អវិបក្កវិបាកា (ក.)] ធម្មា និរុទ្ធា – តេ នត្ថីតិ? អាមន្តា. អតីតា អវិបក្កវិបាកា [អវិបាកា (ស្យា.)] ធម្មា និរុទ្ធា – តេ នត្ថីតិ? ន ហេវំ វត្តព្ពេ…បេ….

អតីតា អវិបក្កវិបាកា ធម្មា និរុទ្ធា – តេ អត្ថីតិ? អាមន្តា. អតីតា វិបក្កវិបាកា ធម្មា និរុទ្ធា – តេ នត្ថីតិ? អាមន្តា. អតីតា ឯកទេសំ វិបក្កវិបាកា ធម្មា ឯកទេសំ អវិបក្កវិបាកា ធម្មា និរុទ្ធា – តេ ឯកច្ចេ អត្ថិ ឯកច្ចេ នត្ថីតិ? ន ហេវំ វត្តព្ពេ…បេ….

ន វត្តព្ពំ – ‘‘អតីតា អវិបក្កវិបាកា ធម្មា – តេ អត្ថី’’តិ? អាមន្តា. ននុ អតីតា អវិបក្កវិបាកា ធម្មា វិបច្ចិស្សន្តីតិ? អាមន្តា. ហញ្ចិ អតីតា អវិបក្កវិបាកា ធម្មា វិបច្ចិស្សន្តិ, តេន វត រេ វត្តព្ពេ – ‘‘អតីតា អវិបក្កវិបាកា ធម្មា – តេ អត្ថី’’តិ.

អតីតា អវិបក្កវិបាកា ធម្មា វិបច្ចិស្សន្តីតិ កត្វា តេ អត្ថីតិ? អាមន្តា. វិបច្ចិស្សន្តីតិ កត្វា បច្ចុប្បន្នាតិ? ន ហេវំ វត្តព្ពេ…បេ… វិបច្ចិស្សន្តីតិ កត្វា បច្ចុប្បន្នាតិ? អាមន្តា. បច្ចុប្បន្នា ធម្មា និរុជ្ឈិស្សន្តីតិ កត្វា តេ នត្ថីតិ? ន ហេវំ វត្តព្ពេ…បេ….

២. អនាគតាទិឯកច្ចកថា

៣០០. អនាគតំ អត្ថីតិ? ឯកច្ចំ អត្ថិ, ឯកច្ចំ នត្ថីតិ. ឯកច្ចំ ជាតំ, ឯកច្ចំ អជាតំ; ឯកច្ចំ សញ្ជាតំ, ឯកច្ចំ អសញ្ជាតំ; ឯកច្ចំ និព្ពត្តំ, ឯកច្ចំ អនិព្ពត្តំ; ឯកច្ចំ បាតុភូតំ, ឯកច្ចំ អបាតុភូតន្តិ? ន ហេវំ វត្តព្ពេ…បេ….

អនាគតំ ឯកច្ចំ អត្ថិ, ឯកច្ចំ នត្ថីតិ? អាមន្តា. អនាគតា ឧប្បាទិនោ ធម្មា ឯកច្ចេ អត្ថិ, ឯកច្ចេ នត្ថីតិ? ន ហេវំ វត្តព្ពេ…បេ… អនាគតំ ឯកច្ចំ អត្ថិ, ឯកច្ចំ នត្ថីតិ? អាមន្តា. អនាគតា អនុប្បាទិនោ ធម្មា ឯកច្ចេ អត្ថិ, ឯកច្ចេ នត្ថីតិ? ន ហេវំ វត្តព្ពេ…បេ….

អនាគតំ ឯកច្ចំ អត្ថិ, ឯកច្ចំ នត្ថីតិ? អាមន្តា. កិំ អត្ថិ, កិំ នត្ថីតិ? អនាគតា ឧប្បាទិនោ ធម្មា – តេ អត្ថិ; អនាគតា អនុប្បាទិនោ ធម្មា – តេ នត្ថីតិ. អនាគតា ឧប្បាទិនោ ធម្មា – តេ អត្ថីតិ? អាមន្តា. អនាគតា អនុប្បាទិនោ ធម្មា – តេ អត្ថីតិ? ន ហេវំ វត្តព្ពេ…បេ… អនាគតា អនុប្បាទិនោ ធម្មា – តេ នត្ថីតិ? អាមន្តា. អនាគតា ឧប្បាទិនោ ធម្មា – តេ នត្ថីតិ? ន ហេវំ វត្តព្ពេ…បេ….

អនាគតា ឧប្បាទិនោ ធម្មា – តេ អត្ថីតិ? អាមន្តា. ននុ អនាគតា ឧប្បាទិនោ ធម្មា អជាតាតិ? អាមន្តា. ហញ្ចិ អនាគតា ឧប្បាទិនោ ធម្មា អជាតា, នោ ច វត រេ វត្តព្ពេ – ‘‘អនាគតា ឧប្បាទិនោ ធម្មា – តេ អត្ថី’’តិ.

អនាគតា ឧប្បាទិនោ ធម្មា អជាតា – តេ អត្ថីតិ? អាមន្តា. អនាគតា អនុប្បាទិនោ ធម្មា អជាតា – តេ អត្ថីតិ? ន ហេវំ វត្តព្ពេ…បេ… អនាគតា អនុប្បាទិនោ ធម្មា អជាតា – តេ នត្ថីតិ? អាមន្តា. អនាគតា ឧប្បាទិនោ ធម្មា អជាតា – តេ នត្ថីតិ? ន ហេវំ វត្តព្ពេ…បេ….

ន វត្តព្ពំ – ‘‘អនាគតា ឧប្បាទិនោ ធម្មា – តេ អត្ថី’’តិ? អាមន្តា. ននុ អនាគតា ឧប្បាទិនោ ធម្មា ឧប្បជ្ជិស្សន្តីតិ? អាមន្តា. ហញ្ចិ អនាគតា ឧប្បាទិនោ ធម្មា ឧប្បជ្ជិស្សន្តិ, តេន វត រេ វត្តព្ពេ – ‘‘អនាគតា ឧប្បាទិនោ ធម្មា – តេ អត្ថី’’តិ.

អនាគតា ឧប្បាទិនោ ធម្មា ឧប្បជ្ជិស្សន្តីតិ កត្វា តេ អត្ថីតិ? អាមន្តា. ឧប្បជ្ជិស្សន្តីតិ កត្វា បច្ចុប្បន្នាតិ? ន ហេវំ វត្តព្ពេ…បេ… ឧប្បជ្ជិស្សន្តីតិ កត្វា បច្ចុប្បន្នាតិ? អាមន្តា. បច្ចុប្បន្នា ធម្មា និរុជ្ឈិស្សន្តីតិ កត្វា តេ នត្ថីតិ? ន ហេវំ វត្តព្ពេ…បេ….

ឯកច្ចំ អត្ថីតិកថា និដ្ឋិតា.