(២០២) ៣. សំយោជនកថា

៨៨១. អត្ថិ កិញ្ចិ សំយោជនំ អប្បហាយ អរហត្តប្បត្តីតិ? អាមន្តា. អត្ថិ កិញ្ចិ សក្កាយទិដ្ឋិំ អប្បហាយ…បេ… វិចិកិច្ឆំ អប្បហាយ…បេ… សីលព្ពតបរាមាសំ អប្បហាយ… រាគំ អប្បហាយ… ទោសំ អប្បហាយ… មោហំ អប្បហាយ… អនោត្តប្បំ អប្បហាយ អរហត្តប្បត្តីតិ? ន ហេវំ វត្តព្ពេ…បេ….

អត្ថិ កិញ្ចិ សំយោជនំ អប្បហាយ អរហត្តប្បត្តីតិ? អាមន្តា. អរហា សរាគោ សទោសោ សមោហោ សមានោ សមក្ខោ សបឡាសោ សឧបាយាសោ សកិលេសោតិ? ន ហេវំ វត្តព្ពេ…បេ… ននុ អរហា និរាគោ និទ្ទោសោ និម្មោហោ និម្មានោ និម្មក្ខោ និប្បឡាសោ និរុបាយាសោ និក្កិលេសោតិ? អាមន្តា. ហញ្ចិ អរហា និរាគោ…បេ… និក្កិលេសោ, នោ ច វត រេ វត្តព្ពេ – ‘‘អត្ថិ កិញ្ចិ សំយោជនំ អប្បហាយ អរហត្តប្បត្តី’’តិ.

៨៨២. ន វត្តព្ពំ – ‘‘អត្ថិ កិញ្ចិ សំយោជនំ អប្បហាយ អរហត្តប្បត្តី’’តិ? អាមន្តា. អរហា សព្ពំ ពុទ្ធវិសយំ ជានាតីតិ? ន ហេវំ វត្តព្ពេ. តេន ហិ អត្ថិ កិញ្ចិ សំយោជនំ អប្បហាយ អរហត្តប្បត្តីតិ.

សំយោជនកថា និដ្ឋិតា.