២១. ឯកវីសតិមវគ្គោ

(២០៣) ៤. ឥទ្ធិកថា

៨៨៣. អត្ថិ អធិប្បាយឥទ្ធិ ពុទ្ធានំ វា សាវកានំ វាតិ? អាមន្តា. ‘‘និច្ចបណ្ណា រុក្ខា ហោន្តូ’’តិ – អត្ថិ អធិប្បាយឥទ្ធិ ពុទ្ធានំ វា សាវកានំ វាតិ? ន ហេវំ វត្តព្ពេ…បេ… និច្ចបុប្ផា រុក្ខា ហោន្តុ…បេ… និច្ចផលិកា រុក្ខា ហោន្តុ… និច្ចំ ជុណ្ហំ ហោតុ… និច្ចំ ខេមំ ហោតុ… និច្ចំ សុភិក្ខំ ហោតុ… ‘‘និច្ចំ សុវត្ថិ [សុវុដ្ឋិកំ (ស្យា.)] ហោតូ’’តិ – អត្ថិ អធិប្បាយឥទ្ធិ ពុទ្ធានំ វា សាវកានំ វាតិ? ន ហេវំ វត្តព្ពេ…បេ….

អត្ថិ អធិប្បាយឥទ្ធិ ពុទ្ធានំ វា សាវកានំ វាតិ? អាមន្តា. ‘‘ឧប្បន្នោ ផស្សោ មា និរុជ្ឈី’’តិ – អត្ថិ អធិប្បាយឥទ្ធិ ពុទ្ធានំ វា សាវកានំ វាតិ? ន ហេវំ វត្តព្ពេ…បេ….

ឧប្បន្នា វេទនា…បេ… សញ្ញា… ចេតនា… ចិត្តំ… សទ្ធា… វីរិយំ… សតិ… សមាធិ…បេ… បញ្ញា មា និរុជ្ឈីតិ – អត្ថិ អធិប្បាយឥទ្ធិ ពុទ្ធានំ វា សាវកានំ វាតិ? ន ហេវំ វត្តព្ពេ…បេ….

អត្ថិ អធិប្បាយឥទ្ធិ ពុទ្ធានំ វា សាវកានំ វាតិ? អាមន្តា. ‘‘រូបំ និច្ចំ ហោតូ’’តិ – អត្ថិ អធិប្បាយឥទ្ធិ… វេទនា…បេ… សញ្ញា…បេ… សង្ខារា…បេ… ‘‘វិញ្ញាណំ និច្ចំ ហោតូ’’តិ – អត្ថិ អធិប្បាយឥទ្ធិ ពុទ្ធានំ វា សាវកានំ វាតិ? ន ហេវំ វត្តព្ពេ…បេ….

អត្ថិ អធិប្បាយឥទ្ធិ ពុទ្ធានំ វា សាវកានំ វាតិ? អាមន្តា. ‘‘ជាតិធម្មា សត្តា មា ជាយិំសូ’’តិ អត្ថិ…បេ… ‘‘ជរាធម្មា សត្តា មា ជីរិំសូ’’តិ…បេ… ‘‘ព្យាធិធម្មា សត្តា មា ព្យាធិយិំសូ’’តិ…បេ… ‘‘មរណធម្មា សត្តា មា មីយិំសូ’’តិ – អត្ថិ អធិប្បាយឥទ្ធិ ពុទ្ធានំ វា សាវកានំ វាតិ? ន ហេវំ វត្តព្ពេ…បេ….

៨៨៤. ន វត្តព្ពំ – ‘‘អត្ថិ អធិប្បាយឥទ្ធិ ពុទ្ធានំ វា សាវកានំ វា’’តិ? អាមន្តា. ននុ អាយស្មា បិលិន្ទវច្ឆោ រញ្ញោ មាគធស្ស សេនិយស្ស ពិម្ពិសារស្ស បាសាទំ ‘‘សុវណ្ណ’’ន្ត្វេវ អធិមុច្ចិ, សុវណ្ណោ ច បន អាសីតិ [បារា. ៦២១; មហាវ. ២៧១]? អាមន្តា. ហញ្ចិ អាយស្មា បិលិន្ទវច្ឆោ រញ្ញោ មាគធស្ស សេនិយស្ស ពិម្ពិសារស្ស បាសាទំ សុវណ្ណន្ត្វេវ អធិមុច្ចិ, សុវណ្ណោ ច បន អាសិ, តេន វត រេ វត្តព្ពេ – ‘‘អត្ថិ អធិប្បាយឥទ្ធិ ពុទ្ធានំ វា សាវកានំ វា’’តិ.

ឥទ្ធិកថា និដ្ឋិតា.