២០. វីសតិមវគ្គោ

(១៩៩) ៦. ញាណកថា

៨៧៦. ទ្វាទសវត្ថុកំ ញាណំ លោកុត្តរន្តិ? អាមន្តា. ទ្វាទស លោកុត្តរញាណានីតិ? ន ហេវំ វត្តព្ពេ…បេ… ទ្វាទស លោកុត្តរញាណានីតិ? អាមន្តា. ទ្វាទស សោតាបត្តិមគ្គាតិ? ន ហេវំ វត្តព្ពេ…បេ… ទ្វាទស សោតាបត្តិមគ្គាតិ? អាមន្តា. ទ្វាទស សោតាបត្តិផលានីតិ? ន ហេវំ វត្តព្ពេ…បេ… ទ្វាទស សកទាគាមិមគ្គា…បេ… អនាគាមិមគ្គា…បេ… អរហត្តមគ្គាតិ? ន ហេវំ វត្តព្ពេ…បេ… ទ្វាទស អរហត្តមគ្គាតិ? អាមន្តា. ទ្វាទស អរហត្តផលានីតិ? ន ហេវំ វត្តព្ពេ…បេ….

៨៧៧. ន វត្តព្ពំ – ‘‘ទ្វាទសវត្ថុកំ ញាណំ លោកុត្តរ’’ន្តិ? អាមន្តា. ននុ វុត្តំ ភគវតា – ‘‘ឥទំ ទុក្ខំ អរិយសច្ច’’ន្តិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ, ញាណំ ឧទបាទិ, បញ្ញា ឧទបាទិ, វិជ្ជា ឧទបាទិ, អាលោកោ ឧទបាទិ. ‘តំ ខោ បនិទំ ទុក្ខំ អរិយសច្ចំ បរិញ្ញេយ្យ’ន្តិ មេ, ភិក្ខវេ…បេ… បរិញ្ញាតន្តិ មេ, ភិក្ខវេ…បេ… ‘ឥទំ ទុក្ខសមុទយំ [ទុក្ខសមុទយោ (ស្យា. កំ. បី.)] អរិយសច្ច’ន្តិ មេ, ភិក្ខវេ…បេ… ‘តំ ខោ បនិទំ ទុក្ខសមុទយំ អរិយសច្ចំ បហាតព្ព’ន្តិ មេ, ភិក្ខវេ…បេ… បហីនន្តិ មេ, ភិក្ខវេ…បេ… ‘ឥទំ ទុក្ខនិរោធំ [ទុក្ខនិរោធា (ស្យា. កំ. បី.)] អរិយសច្ច’ន្តិ មេ, ភិក្ខវេ…បេ… ‘តំ ខោ បនិទំ ទុក្ខនិរោធំ អរិយសច្ចំ សច្ឆិកាតព្ព’ន្តិ មេ, ភិក្ខវេ…បេ… សច្ឆិកតន្តិ មេ, ភិក្ខវេ…បេ… ‘ឥទំ ទុក្ខនិរោធគាមិនី បដិបទា អរិយសច្ច’ន្តិ មេ, ភិក្ខវេ…បេ… ‘តំ ខោ បនិទំ ទុក្ខនិរោធគាមិនី បដិបទា អរិយសច្ចំ ភាវេតព្ព’ន្តិ មេ, ភិក្ខវេ…បេ… ភាវិតន្តិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទី’’តិ [មហាវ. ១៥; សំ. និ. ៥.១០៨១; បដិ. ម. ២.៣០]! អត្ថេវ សុត្តន្តោតិ? អាមន្តា. តេន ហិ ទ្វាទសវត្ថុកំ ញាណំ លោកុត្តរន្តិ.

ញាណកថា និដ្ឋិតា.

វីសតិមវគ្គោ.

តស្សុទ្ទានំ –

មាតុឃាតកោ អានន្តរិកោ បិតុឃាតកោ អានន្តរិកោ អរហន្តឃាតកោ អានន្តរិកោ រុហិរុប្បាទកោ អានន្តរិកោ សង្ឃភេទកោ អានន្តរិកោ, នត្ថិ បុថុជ្ជនស្ស ញាណំ, នត្ថិ និរយេសុ និរយបាលា, អត្ថិ ទេវេសុ តិរច្ឆានគតា, បញ្ចង្គិកោ មគ្គោ, ទ្វាទសវត្ថុកំ ញាណំ លោកុត្តរន្តិ.

ចតុត្ថោ បណ្ណាសកោ.

តស្សុទ្ទានំ –

និគ្គហោ, បុញ្ញសញ្ចយោ, អដ្ឋាសិ, អតីតេន ច មាតុឃាតកោ.