២០. វីសតិមវគ្គោ

(១៩៨) ៥. មគ្គកថា

៨៧២. បញ្ចង្គិកោ មគ្គោតិ? អាមន្តា. ននុ អដ្ឋង្គិកោ មគ្គោ វុត្តោ ភគវតា, សេយ្យថិទំ – សម្មាទិដ្ឋិ…បេ… សម្មាសមាធីតិ? អាមន្តា. ហញ្ចិ អដ្ឋង្គិកោ មគ្គោ វុត្តោ ភគវតា, សេយ្យថិទំ – សម្មាទិដ្ឋិ …បេ… សម្មាសមាធិ, នោ ច វត រេ វត្តព្ពេ – ‘‘បញ្ចង្គិកោ មគ្គោ’’តិ.

បញ្ចង្គិកោ មគ្គោតិ? អាមន្តា. ននុ វុត្តំ ភគវតា –

‘‘មគ្គានំ អដ្ឋង្គិកោ សេដ្ឋោ, សច្ចានំ ចតុរោ បទា;

វិរាគោ សេដ្ឋោ ធម្មានំ, ទ្វិបទានញ្ច ចក្ខុមា’’តិ [ធ. ប. ២៧៣ ធម្មបទេ].

អត្ថេវ សុត្តន្តោតិ? អាមន្តា. តេន ហិ អដ្ឋង្គិកោ មគ្គោតិ.

៨៧៣. សម្មាវាចា មគ្គង្គំ, សា ច ន មគ្គោតិ? អាមន្តា. សម្មាទិដ្ឋិ មគ្គង្គំ, សា ច ន មគ្គោតិ? ន ហេវំ វត្តព្ពេ…បេ… សម្មាវាចា មគ្គង្គំ, សា ច ន មគ្គោតិ? អាមន្តា. សម្មាសង្កប្បោ…បេ… សម្មាវាយាមោ…បេ… សម្មាសតិ…បេ… សម្មាសមាធិ មគ្គង្គំ, សោ ច ន មគ្គោតិ? ន ហេវំ វត្តព្ពេ…បេ….

សម្មាកម្មន្តោ…បេ… សម្មាអាជីវោ មគ្គង្គំ, សោ ច ន មគ្គោតិ? អាមន្តា. សម្មាទិដ្ឋិ…បេ… សម្មាសមាធិ មគ្គង្គំ, សោ ច ន មគ្គោតិ? ន ហេវំ វត្តព្ពេ…បេ….

សម្មាទិដ្ឋិ មគ្គង្គំ, សា ច មគ្គោតិ? អាមន្តា. សម្មាវាចា មគ្គង្គំ, សា ច មគ្គោតិ? ន ហេវំ វត្តព្ពេ…បេ… សម្មាទិដ្ឋិ មគ្គង្គំ, សា ច មគ្គោតិ? អាមន្តា. សម្មាកម្មន្តោ…បេ… សម្មាអាជីវោ មគ្គង្គំ, សោ ច មគ្គោតិ? ន ហេវំ វត្តព្ពេ…បេ….

សម្មាសង្កប្បោ…បេ… សម្មាវាយាមោ…បេ… សម្មាសតិ…បេ… សម្មាសមាធិ មគ្គង្គំ, សោ ច មគ្គោតិ? អាមន្តា. សម្មាវាចា…បេ… សម្មាកម្មន្តោ…បេ… សម្មាអាជីវោ មគ្គង្គំ, សោ ច មគ្គោតិ? ន ហេវំ វត្តព្ពេ…បេ….

៨៧៤. អរិយោ អដ្ឋង្គិកោ មគ្គោតិ? អាមន្តា. ននុ វុត្តំ ភគវតា – ‘‘បុព្ពេវ ខោ បនស្ស កាយកម្មំ វចីកម្មំ អាជីវោ សុបរិសុទ្ធោ ហោតិ; ឯវមស្សាយំ អរិយោ អដ្ឋង្គិកោ មគ្គោ ភាវនាបារិបូរិំ គច្ឆតី’’តិ [ម. និ. ៣.៤៣១]! អត្ថេវ សុត្តន្តោតិ? អាមន្តា. តេន ហិ បញ្ចង្គិកោ មគ្គោតិ.

៨៧៥. បញ្ចង្គិកោ មគ្គោតិ? អាមន្តា. ននុ វុត្តំ ភគវតា – ‘‘យស្មិំ ខោ, សុភទ្ទ, ធម្មវិនយេ អរិយោ អដ្ឋង្គិកោ មគ្គោ ន ឧបលព្ភតិ, សមណោបិ តត្ថ ន ឧបលព្ភតិ, ទុតិយោបិ តត្ថ សមណោ ន ឧបលព្ភតិ, តតិយោបិ តត្ថ សមណោ ន ឧបលព្ភតិ, ចតុត្ថោបិ តត្ថ សមណោ ន ឧបលព្ភតិ. យស្មិញ្ច ខោ, សុភទ្ទ, ធម្មវិនយេ អរិយោ អដ្ឋង្គិកោ មគ្គោ ឧបលព្ភតិ, សមណោបិ តត្ថ ឧបលព្ភតិ, ទុតិយោបិ…បេ… តតិយោបិ…បេ… ចតុត្ថោបិ តត្ថ សមណោ ឧបលព្ភតិ. ឥមស្មិំ ខោ, សុភទ្ទ, ធម្មវិនយេ អរិយោ អដ្ឋង្គិកោ មគ្គោ ឧបលព្ភតិ. ឥធេវ, សុភទ្ទ, សមណោ, ឥធ ទុតិយោ សមណោ, ឥធ តតិយោ សមណោ, ឥធ ចតុត្ថោ សមណោ. សុញ្ញា បរប្បវាទា សមណេភិ អញ្ញេហី’’តិ [ទី. និ. ២.២១៤]! អត្ថេវ សុត្តន្តោតិ? អាមន្តា. តេន ហិ អដ្ឋង្គិកោ មគ្គោតិ.

មគ្គកថា និដ្ឋិតា.