(១៩៧) ៤. តិរច្ឆានកថា

៨៦៩. អត្ថិ ទេវេសុ តិរច្ឆានគតាតិ? អាមន្តា. អត្ថិ តិរច្ឆានគតេសុ ទេវាតិ? ន ហេវំ វត្តព្ពេ…បេ… អត្ថិ ទេវេសុ តិរច្ឆានគតាតិ? អាមន្តា. ទេវលោកោ តិរច្ឆានយោនីតិ? ន ហេវំ វត្តព្ពេ…បេ… អត្ថិ ទេវេសុ តិរច្ឆានគតាតិ? អាមន្តា. អត្ថិ តត្ថ កីដា បដង្គា មកសា មក្ខិកា អហី វិច្ឆិកា សតបទី គណ្ឌុប្បាទាតិ [គណ្ឌុបាទាតិ (ស្យា. កំ. បី.)]? ន ហេវំ វត្តព្ពេ…បេ….

៨៧០. នត្ថិ ទេវេសុ តិរច្ឆានគតាតិ? អាមន្តា. ននុ អត្ថិ តត្ថ ឯរាវណោ នាម ហត្ថិនាគោ សហស្សយុត្តំ ទិព្ពំ យានន្តិ? អាមន្តា. ហញ្ចិ អត្ថិ តត្ថ ឯរាវណោ នាម ហត្ថិនាគោ សហស្សយុត្តំ ទិព្ពំ យានំ, តេន វត រេ វត្តព្ពេ – ‘‘អត្ថិ ទេវេសុ តិរច្ឆានគតា’’តិ.

៨៧១. អត្ថិ ទេវេសុ តិរច្ឆានគតាតិ? អាមន្តា. អត្ថិ តត្ថ ហត្ថិពន្ធា អស្សពន្ធា [ហត្ថិភណ្ឌា អស្សភណ្ឌា (?)] យាវសិកា ការណិកា ភត្តការកាតិ? ន ហេវំ វត្តព្ពេ. តេន ហិ នត្ថិ ទេវេសុ តិរច្ឆានគតាតិ.

តិរច្ឆានកថា និដ្ឋិតា.