(១២៤) ៩. ទុគ្គតិកថា

៦៥០. ទិដ្ឋិសម្បន្នស្ស បុគ្គលស្ស បហីនា ទុគ្គតីតិ? អាមន្តា. ទិដ្ឋិសម្បន្នោ បុគ្គលោ អាបាយិកេ រូបេ រជ្ជេយ្យាតិ? អាមន្តា. ហញ្ចិ ទិដ្ឋិសម្បន្នោ បុគ្គលោ អាបាយិកេ រូបេ រជ្ជេយ្យ, នោ ច វត រេ វត្តព្ពេ – ‘‘ទិដ្ឋិសម្បន្នស្ស បុគ្គលស្ស បហីនា ទុគ្គតី’’តិ.

ទិដ្ឋិសម្បន្នស្ស បុគ្គលស្ស បហីនា ទុគ្គតីតិ? អាមន្តា. ទិដ្ឋិសម្បន្នោ បុគ្គលោ អាបាយិកេ សទ្ទេ…បេ… គន្ធេ… រសេ… ផោដ្ឋព្ពេ…បេ… អមនុស្សិត្ថិយា តិរច្ឆានគតិត្ថិយា នាគកញ្ញាយ មេថុនំ ធម្មំ បដិសេវេយ្យ, អជេឡកំ បដិគ្គណ្ហេយ្យ, កុក្កុដសូករំ បដិគ្គណ្ហេយ្យ, ហត្ថិគវស្សវឡវំ បដិគ្គណ្ហេយ្យ… តិត្តិរវដ្ដកមោរកបិញ្ជរំ [… កបិញ្ជលំ (ស្យា. កំ. បី.)] បដិគ្គណ្ហេយ្យាតិ? អាមន្តា. ហញ្ចិ ទិដ្ឋិសម្បន្នោ បុគ្គលោ តិត្តិរវដ្ដកមោរកបិញ្ជរំ បដិគ្គណ្ហេយ្យ, នោ ច វត រេ វត្តព្ពេ – ‘‘ទិដ្ឋិសម្បន្នស្ស បុគ្គលស្ស បហីនា ទុគ្គតី’’តិ.

៦៥១. ទិដ្ឋិសម្បន្នស្ស បុគ្គលស្ស បហីនា ទុគ្គតិ, ទិដ្ឋិសម្បន្នោ បុគ្គលោ អាបាយិកេ រូបេ រជ្ជេយ្យាតិ? អាមន្តា. អរហតោ បហីនា ទុគ្គតិ, អរហា អាបាយិកេ រូបេ រជ្ជេយ្យាតិ? ន ហេវំ វត្តព្ពេ…បេ… ទិដ្ឋិសម្បន្នស្ស បុគ្គលស្ស បហីនា ទុគ្គតិ, ទិដ្ឋិសម្បន្នោ បុគ្គលោ អាបាយិកេ សទ្ទេ… គន្ធេ… រសេ… ផោដ្ឋព្ពេ…បេ… តិត្តិរវដ្ដកមោរកបិញ្ជរំ បដិគ្គណ្ហេយ្យាតិ? អាមន្តា. អរហតោ បហីនា ទុគ្គតិ, អរហា តិត្តិរវដ្ដកមោរកបិញ្ជរំ បដិគ្គណ្ហេយ្យាតិ? ន ហេវំ វត្តព្ពេ…បេ….

អរហតោ បហីនា ទុគ្គតិ, ន ច អរហា អាបាយិកេ រូបេ រជ្ជេយ្យាតិ? អាមន្តា. ទិដ្ឋិសម្បន្នស្ស បុគ្គលស្ស បហីនា ទុគ្គតិ, ន ច ទិដ្ឋិសម្បន្នោ បុគ្គលោ អាបាយិកេ រូបេ រជ្ជេយ្យាតិ? ន ហេវំ វត្តព្ពេ…បេ… អរហតោ បហីនា ទុគ្គតិ, ន ច អរហា អាបាយិកេ សទ្ទេ…បេ… គន្ធេ…បេ… រសេ…បេ… ផោដ្ឋព្ពេ…បេ… អមនុស្សិត្ថិយា តិរច្ឆានគតិត្ថិយា នាគកញ្ញាយ មេថុនំ ធម្មំ បដិសេវេយ្យ, អជេឡកំ បដិគ្គណ្ហេយ្យ, កុក្កុដសូករំ បដិគ្គណ្ហេយ្យ, ហត្ថិគវស្សវឡវំ បដិគ្គណ្ហេយ្យ…បេ… តិត្តិរវដ្ដកមោរកបិញ្ជរំ បដិគ្គណ្ហេយ្យាតិ? អាមន្តា. ទិដ្ឋិសម្បន្នស្ស បុគ្គលស្ស បហីនា ទុគ្គតិ, ន ច ទិដ្ឋិសម្បន្នោ បុគ្គលោ តិត្តិរវដ្ដកមោរកបិញ្ជរំ បដិគ្គណ្ហេយ្យាតិ? ន ហេវំ វត្តព្ពេ…បេ….

៦៥២. [អដ្ឋកថានុលោមំ បរវាទីបុច្ឆាលក្ខណំ. តថាបាយំ បុច្ឆា សកវាទិស្ស, បុរិមាយោ ច ឥមិស្សំ ទុគ្គតិកថាយំ បរវាទិស្សាតិ គហេតព្ពា វិយ ទិស្សន្តិ] ន វត្តព្ពំ – ‘‘ទិដ្ឋិសម្បន្នស្ស បុគ្គលស្ស បហីនា ទុគ្គតី’’តិ? អាមន្តា. ទិដ្ឋិសម្បន្នោ បុគ្គលោ និរយំ ឧបបជ្ជេយ្យ…បេ… តិរច្ឆានយោនិំ ឧបបជ្ជេយ្យ… បេត្តិវិសយំ ឧបបជ្ជេយ្យាតិ? ន ហេវំ វត្តព្ពេ. តេន ហិ ទិដ្ឋិសម្បន្នស្ស បុគ្គលស្ស បហីនា ទុគ្គតីតិ.

ទុគ្គតិកថា និដ្ឋិតា.