៧. សត្តមវគ្គោ

(៦៦) ៤. ទានកថា

៤៧៨. ចេតសិកោ ធម្មោ ទានន្តិ? អាមន្តា. លព្ភា ចេតសិកោ ធម្មោ បរេសំ ទាតុន្តិ? ន ហេវំ វត្តព្ពេ …បេ… លព្ភា ចេតសិកោ ធម្មោ បរេសំ ទាតុន្តិ? អាមន្តា. លព្ភា ផស្សោ បរេសំ ទាតុន្តិ? ន ហេវំ វត្តព្ពេ …បេ… លព្ភា វេទនា…បេ… សញ្ញា… ចេតនា… សទ្ធា… វីរិយំ… សតិ… សមាធិ… បញ្ញា បរេសំ ទាតុន្តិ? ន ហេវំ វត្តព្ពេ…បេ….

៤៧៩. ន វត្តព្ពំ – ចេតសិកោ ធម្មោ ទានន្តិ? អាមន្តា. ទានំ អនិដ្ឋផលំ អកន្តផលំ អមនុញ្ញផលំ សេចនកផលំ ទុក្ខុទ្រយំ ទុក្ខវិបាកន្តិ? ន ហេវំ វត្តព្ពេ…បេ… ននុ ទានំ ឥដ្ឋផលំ កន្តផលំ មនុញ្ញផលំ អសេចនកផលំ សុខុទ្រយំ សុខវិបាកន្តិ? អាមន្តា. ហញ្ចិ ទានំ ឥដ្ឋផលំ កន្តផលំ មនុញ្ញផលំ អសេចនកផលំ សុខុទ្រយំ សុខវិបាកំ, តេន វត រេ វត្តព្ពេ – ‘‘ចេតសិកោ ធម្មោ ទាន’’ន្តិ.

ទានំ ឥដ្ឋផលំ វុត្តំ ភគវតា, ចីវរំ ទានន្តិ [ឧបរិ វុច្ចមានាយ បរវាទីបុច្ឆាយ សទិសា, អដ្ឋកថា ឱលោកេតព្ពា]? អាមន្តា. ចីវរំ ឥដ្ឋផលំ កន្តផលំ មនុញ្ញផលំ អសេចនកផលំ សុខុទ្រយំ សុខវិបាកន្តិ? ន ហេវំ វត្តព្ពេ…បេ… ទានំ ឥដ្ឋផលំ វុត្តំ ភគវតា, បិណ្ឌបាតោ សេនាសនំ គិលានបច្ចយភេសជ្ជបរិក្ខារោ ទានន្តិ? អាមន្តា. គិលានបច្ចយភេសជ្ជបរិក្ខារោ ឥដ្ឋផលោ កន្តផលោ មនុញ្ញផលោ អសេចនកផលោ សុខុទ្រយោ សុខវិបាកោតិ? ន ហេវំ វត្តព្ពេ…បេ….

៤៨០. ន វត្តព្ពំ – ‘‘ចេតសិកោ ធម្មោ ទាន’’ន្តិ? អាមន្តា. ននុ វុត្តំ ភគវតា –

‘‘សទ្ធា ហិរិយំ កុសលញ្ច ទានំ,

ធម្មា ឯតេ សប្បុរិសានុយាតា;

ឯតញ្ហិ មគ្គំ ទិវិយំ វទន្តិ,

ឯតេន ហិ គច្ឆតិ ទេវលោក’’ន្តិ [អ. និ. ៨.៣២].

អត្ថេវ សុត្តន្តោតិ? អាមន្តា. តេន ហិ ចេតសិកោ ធម្មោ ទានន្តិ.

ន វត្តព្ពំ – ‘‘ចេតសិកោ ធម្មោ ទាន’’ន្តិ? អាមន្តា. ននុ វុត្តំ ភគវតា – ‘‘បញ្ចិមានិ, ភិក្ខវេ, ទានានិ មហាទានានិ អគ្គញ្ញានិ រត្តញ្ញានិ វំសញ្ញានិ បោរាណានិ អសង្កិណ្ណានិ អសង្កិណ្ណបុព្ពានិ, ន សង្កិយន្តិ ន សង្កិយិស្សន្តិ, អប្បដិកុដ្ឋានិ សមណេហិ ព្រាហ្មណេហិ វិញ្ញូហិ! កតមានិ បញ្ច? ឥធ, ភិក្ខវេ, អរិយសាវកោ បាណាតិបាតំ បហាយ បាណាតិបាតា បដិវិរតោ ហោតិ. បាណាតិបាតា បដិវិរតោ, ភិក្ខវេ, អរិយសាវកោ អបរិមាណានំ សត្តានំ អភយំ ទេតិ អវេរំ ទេតិ អព្យាពជ្ឈំ [អព្យាបជ្ឈំ (ស្យា. ក.)] ទេតិ. អបរិមាណានំ សត្តានំ អភយំ ទត្វា អវេរំ ទត្វា អព្យាពជ្ឈំ ទត្វា អបរិមាណស្ស អភយស្ស អវេរស្ស អព្យាពជ្ឈស្ស ភាគី ហោតិ. ឥទំ, ភិក្ខវេ, បឋមំ ទានំ មហាទានំ អគ្គញ្ញំ រត្តញ្ញំ វំសញ្ញំ បោរាណំ អសង្កិណ្ណំ អសង្កិណ្ណបុព្ពំ, ន សង្កិយតិ ន សង្កិយិស្សតិ, អប្បដិកុដ្ឋំ សមណេហិ ព្រាហ្មណេហិ វិញ្ញូហិ. បុន ចបរំ, ភិក្ខវេ, អរិយសាវកោ អទិន្នាទានំ បហាយ…បេ… កាមេសុមិច្ឆាចារំ បហាយ…បេ… មុសាវាទំ បហាយ…បេ… សុរាមេរយមជ្ជបមាទដ្ឋានំ បហាយ សុរាមេរយមជ្ជបមាទដ្ឋានា បដិវិរតោ ហោតិ. សុរាមេរយមជ្ជបមាទដ្ឋានា បដិវិរតោ, ភិក្ខវេ, អរិយសាវកោ អបរិមាណានំ សត្តានំ អភយំ ទេតិ អវេរំ ទេតិ អព្យាពជ្ឈំ ទេតិ. អបរិមាណានំ សត្តានំ អភយំ ទត្វា អវេរំ ទត្វា អព្យាពជ្ឈំ ទត្វា អបរិមាណស្ស អភយស្ស អវេរស្ស អព្យាពជ្ឈស្ស ភាគី ហោតិ. ឥទំ, ភិក្ខវេ, បញ្ចមំ ទានំ មហាទានំ អគ្គញ្ញំ រត្តញ្ញំ វំសញ្ញំ បោរាណំ អសង្កិណ្ណំ អសង្កិណ្ណបុព្ពំ, ន សង្កិយតិ ន សង្កិយិស្សតិ, អប្បដិកុដ្ឋំ សមណេហិ ព្រាហ្មណេហិ វិញ្ញូហិ. ឥមានិ ខោ, ភិក្ខវេ, បញ្ច ទានានិ មហាទានានិ អគ្គញ្ញានិ រត្តញ្ញានិ វំសញ្ញានិ បោរាណានិ អសង្កិណ្ណានិ អសង្កិណ្ណបុព្ពានិ, ន សង្កិយន្តិ ន សង្កិយិស្សន្តិ, អប្បដិកុដ្ឋានិ សមណេហិ ព្រាហ្មណេហិ វិញ្ញូហី’’តិ [អ. និ. ៨.៣៩]. អត្ថេវ សុត្តន្តោតិ? អាមន្តា. តេន ហិ ចេតសិកោ ធម្មោ ទានន្តិ.

៤៨១. ន វត្តព្ពំ – ‘‘ទេយ្យធម្មោ ទាន’’ន្តិ? អាមន្តា. ននុ វុត្តំ ភគវតា – ‘‘ឥធេកច្ចោ អន្នំ ទេតិ, បានំ ទេតិ, វត្ថំ ទេតិ, យានំ ទេតិ, មាលំ ទេតិ, គន្ធំ ទេតិ, វិលេបនំ ទេតិ, សេយ្យំ ទេតិ, អាវសថំ ទេតិ, បទីបេយ្យំ ទេតី’’តិ [សំ. និ. ៣.៣៦២-៣៩១ ថោកំ វិសទិសំ]! អត្ថេវ សុត្តន្តោតិ? អាមន្តា. តេន ហិ ទេយ្យធម្មោ ទានន្តិ.

៤៨២. ទេយ្យធម្មោ ទានន្តិ? អាមន្តា. ទេយ្យធម្មោ ឥដ្ឋផលោ កន្តផលោ មនុញ្ញផលោ អសេចនកផលោ សុខុទ្រយោ សុខវិបាកោតិ? ន ហេវំ វត្តព្ពេ…បេ… ទានំ ឥដ្ឋផលំ វុត្តំ ភគវតា, ចីវរំ ទានន្តិ? អាមន្តា. ចីវរំ ឥដ្ឋផលំ កន្តផលំ មនុញ្ញផលំ អសេចនកផលំ សុខុទ្រយំ សុខវិបាកន្តិ? ន ហេវំ វត្តព្ពេ…បេ… ទានំ ឥដ្ឋផលំ វុត្តំ ភគវតា, បិណ្ឌបាតោ ទានំ… សេនាសនំ ទានំ… គិលានបច្ចយភេសជ្ជបរិក្ខារោ ទានន្តិ? អាមន្តា. គិលានបច្ចយភេសជ្ជបរិក្ខារោ ឥដ្ឋផលោ កន្តផលោ មនុញ្ញផលោ អសេចនកផលោ សុខុទ្រយោ សុខវិបាកោតិ? ន ហេវំ វត្តព្ពេ…បេ… តេន ហិ ន វត្តព្ពំ – ‘‘ទេយ្យធម្មោ ទាន’’ន្តិ.

ទានកថា និដ្ឋិតា.