(៦៤) ២. សម្បយុត្តកថា

៤៧៣. នត្ថិ កេចិ ធម្មា កេហិចិ ធម្មេហិ សម្បយុត្តាតិ? អាមន្តា. ននុ អត្ថិ កេចិ ធម្មា កេហិចិ ធម្មេហិ សហគតា សហជាតា សំសដ្ឋា ឯកុប្បាទា ឯកនិរោធា ឯកវត្ថុកា ឯការម្មណាតិ? អាមន្តា. ហញ្ចិ អត្ថិ កេចិ ធម្មា កេហិចិ ធម្មេហិ សហគតា សហជាតា សំសដ្ឋា ឯកុប្បាទា ឯកនិរោធា ឯកវត្ថុកា ឯការម្មណា, នោ ច វត រេ វត្តព្ពេ – ‘‘នត្ថិ កេចិ ធម្មា កេហិចិ ធម្មេហិ សម្បយុត្តា’’តិ.

វេទនាក្ខន្ធោ សញ្ញាក្ខន្ធេន សហជាតោតិ? អាមន្តា. ហញ្ចិ វេទនាក្ខន្ធោ សញ្ញាក្ខន្ធេន សហជាតោ, តេន វត រេ វត្តព្ពេ – ‘‘វេទនាក្ខន្ធោ សញ្ញាក្ខន្ធេន សម្បយុត្តោ’’តិ.

វេទនាក្ខន្ធោ សង្ខារក្ខន្ធេន… វិញ្ញាណក្ខន្ធេន សហជាតោតិ? អាមន្តា. ហញ្ចិ វេទនាក្ខន្ធោ វិញ្ញាណក្ខន្ធេន សហជាតោ, តេន វត រេ វត្តព្ពេ – ‘‘វេទនាក្ខន្ធោ វិញ្ញាណក្ខន្ធេន សម្បយុត្តោ’’តិ.

សញ្ញាក្ខន្ធោ … សង្ខារក្ខន្ធោ… វិញ្ញាណក្ខន្ធោ វេទនាខន្ធេន… សញ្ញាក្ខន្ធេន… សង្ខារក្ខន្ធេន សហជាតោតិ? អាមន្តា. ហញ្ចិ វិញ្ញាណក្ខន្ធោ សង្ខារក្ខន្ធេន សហជាតោ, តេន វត រេ វត្តព្ពេ – ‘‘វិញ្ញាណក្ខន្ធោ សង្ខារក្ខន្ធេន សម្បយុត្តោ’’តិ.

៤៧៤. យថា តិលម្ហិ តេលំ អនុគតំ អនុបវិដ្ឋំ, ឧច្ឆុម្ហិ រសោ អនុគតោ អនុបវិដ្ឋោ; ឯវមេវ តេ ធម្មា តេហិ ធម្មេហិ អនុគតា អនុបវិដ្ឋាតិ? ន ហេវំ វត្តព្ពេ…បេ….

សម្បយុត្តកថា និដ្ឋិតា.