៦. ឆដ្ឋវគ្គោ

(៥៩) ៧. អាកាសោ សនិទស្សនោតិកថា

៤៦៣. អាកាសោ សនិទស្សនោតិ? អាមន្តា. រូបំ រូបាយតនំ រូបធាតុ នីលំ បីតកំ លោហិតកំ ឱទាតំ ចក្ខុវិញ្ញេយ្យំ ចក្ខុស្មិំ បដិហញ្ញតិ ចក្ខុស្ស អាបាថំ អាគច្ឆតីតិ? ន ហេវំ វត្តព្ពេ…បេ….

អាកាសោ សនិទស្សនោតិ? អាមន្តា. ចក្ខុញ្ច បដិច្ច អាកាសញ្ច ឧប្បជ្ជតិ ចក្ខុវិញ្ញាណន្តិ? ន ហេវំ វត្តព្ពេ …បេ….

ចក្ខុញ្ច បដិច្ច អាកាសញ្ច ឧប្បជ្ជតិ ចក្ខុវិញ្ញាណន្តិ? អាមន្តា. ‘‘ចក្ខុញ្ច បដិច្ច អាកាសញ្ច ឧប្បជ្ជតិ ចក្ខុវិញ្ញាណ’’ន្តិ – អត្ថេវ [អត្ថិ (?)] សុត្តន្តោតិ? នត្ថិ. ‘‘ចក្ខុញ្ច បដិច្ច រូបេ ច ឧប្បជ្ជតិ ចក្ខុវិញ្ញាណ’’ន្តិ [ម. និ. ១.៤០០; ៣.៤២១; សំ. និ. ៤.៦០] – អត្ថេវ សុត្តន្តោតិ? អាមន្តា. ហញ្ចិ ‘‘ចក្ខុញ្ច បដិច្ច រូបេ ច ឧប្បជ្ជតិ ចក្ខុវិញ្ញាណ’’ន្តិ – អត្ថេវ សុត្តន្តោ, នោ ច វត រេ វត្តព្ពេ – ‘‘ចក្ខុញ្ច បដិច្ច អាកាសញ្ច ឧប្បជ្ជតិ ចក្ខុវិញ្ញាណ’’ន្តិ.

៤៦៤. ន វត្តព្ពំ – ‘‘អាកាសោ សនិទស្សនោ’’តិ? អាមន្តា. ននុ បស្សតិ ទ្វិន្នំ រុក្ខានំ អន្តរំ, ទ្វិន្នំ ថម្ភានំ អន្តរំ, តាឡច្ឆិទ្ទំ វាតបានច្ឆិទ្ទន្តិ? អាមន្តា. ហញ្ចិ បស្សតិ ទ្វិន្នំ រុក្ខានំ អន្តរំ, ទ្វិន្នំ ថម្ភានំ អន្តរំ, តាឡច្ឆិទ្ទំ វាតបានច្ឆិទ្ទំ, តេន វត រេ វត្តព្ពេ – ‘‘អាកាសោ សនិទស្សនោ’’តិ.

អាកាសោ សនិទស្សនោតិកថា និដ្ឋិតា.