៦. ឆដ្ឋវគ្គោ

(៥៥) ៣. សច្ចកថា

៤៥២. ចត្តារិ សច្ចានិ អសង្ខតានីតិ? អាមន្តា. ចត្តារិ តាណានិ ចត្តារិ លេណានិ ចត្តារិ សរណានិ ចត្តារិ បរាយនានិ ចត្តារិ អច្ចុតានិ ចត្តារិ អមតានិ ចត្តារិ និព្ពានានីតិ? ន ហេវំ វត្តព្ពេ…បេ… ចត្តារិ និព្ពានានីតិ? អាមន្តា. អត្ថិ ចតុន្នំ និព្ពានានំ ឧច្ចនីចតា ហីនបណីតតា ឧក្កំសាវកំសោ សីមា វា ភេទោ វា រាជិ វា អន្តរិកា វាតិ? ន ហេវំ វត្តព្ពេ…បេ….

ទុក្ខសច្ចំ អសង្ខតន្តិ? អាមន្តា. ទុក្ខំ អសង្ខតន្តិ? ន ហេវំ វត្តព្ពេ…បេ… ទុក្ខសច្ចំ អសង្ខតន្តិ? អាមន្តា. កាយិកំ ទុក្ខំ ចេតសិកំ ទុក្ខំ សោកបរិទេវទុក្ខទោមនស្សឧបាយាសា អសង្ខតាតិ? ន ហេវំ វត្តព្ពេ…បេ… សមុទយសច្ចំ អសង្ខតន្តិ? អាមន្តា. សមុទយោ អសង្ខតោតិ? ន ហេវំ វត្តព្ពេ…បេ… សមុទយសច្ចំ អសង្ខតន្តិ? អាមន្តា. កាមតណ្ហា ភវតណ្ហា វិភវតណ្ហា អសង្ខតាតិ? ន ហេវំ វត្តព្ពេ…បេ… មគ្គសច្ចំ អសង្ខតន្តិ? អាមន្តា. មគ្គោ អសង្ខតោតិ? ន ហេវំ វត្តព្ពេ…បេ… មគ្គសច្ចំ អសង្ខតន្តិ? អាមន្តា. សម្មាទិដ្ឋិ…បេ… សម្មាសមាធិ អសង្ខតោតិ? ន ហេវំ វត្តព្ពេ…បេ….

ទុក្ខំ សង្ខតន្តិ? អាមន្តា. ទុក្ខសច្ចំ សង្ខតន្តិ? ន ហេវំ វត្តព្ពេ…បេ… កាយិកំ ទុក្ខំ ចេតសិកំ ទុក្ខំ សោកបរិទេវទុក្ខទោមនស្សឧបាយាសា សង្ខតាតិ? អាមន្តា. ទុក្ខសច្ចំ សង្ខតន្តិ? ន ហេវំ វត្តព្ពេ…បេ… សមុទយោ សង្ខតោតិ? អាមន្តា. សមុទយសច្ចំ សង្ខតន្តិ? ន ហេវំ វត្តព្ពេ…បេ… កាមតណ្ហា ភវតណ្ហា វិភវតណ្ហា សង្ខតាតិ? អាមន្តា. សមុទយសច្ចំ សង្ខតន្តិ? ន ហេវំ វត្តព្ពេ…បេ… មគ្គោ សង្ខតោតិ? អាមន្តា. មគ្គសច្ចំ សង្ខតន្តិ? ន ហេវំ វត្តព្ពេ…បេ… សម្មាទិដ្ឋិ…បេ… សម្មាសមាធិ សង្ខតោតិ? អាមន្តា. មគ្គសច្ចំ សង្ខតន្តិ? ន ហេវំ វត្តព្ពេ…បេ….

៤៥៣. និរោធសច្ចំ អសង្ខតំ, និរោធោ អសង្ខតោតិ? អាមន្តា. ទុក្ខសច្ចំ អសង្ខតំ, ទុក្ខំ អសង្ខតន្តិ? ន ហេវំ វត្តព្ពេ…បេ… និរោធសច្ចំ អសង្ខតំ, និរោធោ អសង្ខតោតិ? អាមន្តា. សមុទយសច្ចំ អសង្ខតំ, សមុទយោ អសង្ខតោតិ? ន ហេវំ វត្តព្ពេ…បេ… និរោធសច្ចំ អសង្ខតំ, និរោធោ អសង្ខតោតិ? អាមន្តា. មគ្គសច្ចំ អសង្ខតំ, មគ្គោ អសង្ខតោតិ? ន ហេវំ វត្តព្ពេ…បេ….

ទុក្ខសច្ចំ អសង្ខតំ, ទុក្ខំ សង្ខតន្តិ? អាមន្តា. និរោធសច្ចំ អសង្ខតំ, និរោធោ សង្ខតោតិ? ន ហេវំ វត្តព្ពេ…បេ… សមុទយសច្ចំ អសង្ខតំ, សមុទយោ សង្ខតោតិ? អាមន្តា. និរោធសច្ចំ អសង្ខតំ, និរោធោ សង្ខតោតិ? ន ហេវំ វត្តព្ពេ…បេ… មគ្គសច្ចំ អសង្ខតំ, មគ្គោ សង្ខតោតិ? អាមន្តា. និរោធសច្ចំ អសង្ខតំ, និរោធោ សង្ខតោតិ? ន ហេវំ វត្តព្ពេ…បេ….

៤៥៤. ន វត្តព្ពំ – ‘‘ចត្តារិ សច្ចានិ អសង្ខតានី’’តិ? អាមន្តា. ននុ វុត្តំ ភគវតា – ‘‘ចត្តារិមានិ, ភិក្ខវេ, តថានិ អវិតថានិ អនញ្ញថានិ! កតមានិ ចត្តារិ? ‘ឥទំ ទុក្ខ’ន្តិ, ភិក្ខវេ, តថមេតំ អវិតថមេតំ អនញ្ញថមេតំ…បេ… ‘អយំ ទុក្ខសមុទយោ’តិ…បេ… ‘អយំ ទុក្ខនិរោធោ’តិ…បេ… ‘អយំ ទុក្ខនិរោធគាមិនី បដិបទា’តិ តថមេតំ អវិតថមេតំ អនញ្ញថមេតំ. ឥមានិ ខោ, ភិក្ខវេ, ចត្តារិ តថានិ អវិតថានិ អនញ្ញថានី’’តិ [សំ. និ. ៥.១០៩០]. អត្ថេវ សុត្តន្តោតិ? អាមន្តា. តេន ហិ ចត្តារិ សច្ចានិ អសង្ខតានីតិ.

សច្ចកថា និដ្ឋិតា.