៦. ឆដ្ឋវគ្គោ

(៥៦) ៤. អារុប្បកថា

៤៥៥. អាកាសានញ្ចាយតនំ អសង្ខតន្តិ? អាមន្តា. និព្ពានំ តាណំ លេណំ សរណំ បរាយនំ អច្ចុតំ អមតន្តិ? ន ហេវំ វត្តព្ពេ…បេ… អាកាសានញ្ចាយតនំ អសង្ខតំ, និព្ពានំ អសង្ខតន្តិ? អាមន្តា. ទ្វេ អសង្ខតានីតិ? ន ហេវំ វត្តព្ពេ…បេ… ទ្វេ អសង្ខតានីតិ? អាមន្តា. ទ្វេ តាណានិ…បេ… អន្តរិកា វាតិ? ន ហេវំ វត្តព្ពេ…បេ….

អាកាសានញ្ចាយតនំ អសង្ខតន្តិ? អាមន្តា. អាកាសានញ្ចាយតនំ ភវោ គតិ សត្តាវាសោ សំសារោ យោនិ វិញ្ញាណដ្ឋិតិ អត្តភាវបដិលាភោតិ? អាមន្តា. អសង្ខតំ ភវោ គតិ សត្តាវាសោ សំសារោ យោនិ វិញ្ញាណដ្ឋិតិ អត្តភាវបដិលាភោតិ? ន ហេវំ វត្តព្ពេ…បេ….

អត្ថិ អាកាសានញ្ចាយតនូបគំ កម្មន្តិ? អាមន្តា. អត្ថិ អសង្ខតូបគំ កម្មន្តិ? ន ហេវំ វត្តព្ពេ…បេ… អត្ថិ អាកាសានញ្ចាយតនូបគា សត្តាតិ? អាមន្តា. អត្ថិ អសង្ខតូបគា សត្តាតិ? ន ហេវំ វត្តព្ពេ…បេ….

អាកាសានញ្ចាយតនេ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? អាមន្តា. អសង្ខតេ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? ន ហេវំ វត្តព្ពេ…បេ… អាកាសានញ្ចាយតនេ អត្ថិ វេទនា សញ្ញា សង្ខារា វិញ្ញាណន្តិ? អាមន្តា. អសង្ខតេ អត្ថិ វេទនា សញ្ញា សង្ខារា វិញ្ញាណន្តិ? ន ហេវំ វត្តព្ពេ…បេ… អាកាសានញ្ចាយតនំ ចតុវោការភវោតិ? អាមន្តា. អសង្ខតំ ចតុវោការភវោតិ? ន ហេវំ វត្តព្ពេ…បេ….

៤៥៦. ន វត្តព្ពំ – ‘‘ចត្តារោ អារុប្បា អសង្ខតា’’តិ? អាមន្តា. ននុ ចត្តារោ អារុប្បា អនេជា វុត្តា ភគវតាតិ? អាមន្តា. ហញ្ចិ ចត្តារោ អារុប្បា អនេជា វុត្តា ភគវតា, តេន វត រេ វត្តព្ពេ ‘‘ចត្តារោ អារុប្បា អសង្ខតា’’តិ.

អារុប្បកថា និដ្ឋិតា.