(៥៣) ១. និយាមកថា

៤៤៥. និយាមោ អសង្ខតោតិ? អាមន្តា. និព្ពានំ តាណំ លេណំ សរណំ បរាយនំ អច្ចុតំ អមតន្តិ? ន ហេវំ វត្តព្ពេ…បេ….

និយាមោ អសង្ខតោ, និព្ពានំ អសង្ខតន្តិ? អាមន្តា. ទ្វេ អសង្ខតានីតិ? ន ហេវំ វត្តព្ពេ…បេ….

ទ្វេ អសង្ខតានីតិ? អាមន្តា. ទ្វេ តាណានិ ទ្វេ លេណានិ ទ្វេ សរណានិ ទ្វេ បរាយនានិ ទ្វេ អច្ចុតានិ ទ្វេ អមតានិ ទ្វេ និព្ពានានីតិ? ន ហេវំ វត្តព្ពេ…បេ….

ទ្វេ និព្ពានានីតិ? អាមន្តា. អត្ថិ ទ្វិន្នំ និព្ពានានំ ឧច្ចនីចតា ហីនបណីតតា ឧក្កំសាវកំសោ សីមា វា ភេទោ វា រាជិ វា អន្តរិកា វាតិ? ន ហេវំ វត្តព្ពេ…បេ….

និយាមោ អសង្ខតោតិ? អាមន្តា. អត្ថិ កេចិ និយាមំ ឱក្កមន្តិ បដិលភន្តិ ឧប្បាទេន្តិ សមុប្បាទេន្តិ ឧដ្ឋាបេន្តិ សមុដ្ឋាបេន្តិ និព្ពត្តេន្តិ អភិនិព្ពត្តេន្តិ ជនេន្តិ សញ្ជនេន្តីតិ? អាមន្តា. អត្ថិ កេចិ អសង្ខតំ ឱក្កមន្តិ បដិលភន្តិ ឧប្បាទេន្តិ សមុប្បាទេន្តិ ឧដ្ឋាបេន្តិ សមុដ្ឋាបេន្តិ និព្ពត្តេន្តិ អភិនិព្ពត្តេន្តិ ជនេន្តិ សញ្ជនេន្តីតិ? ន ហេវំ វត្តព្ពេ…បេ….

៤៤៦. និយាមោ អសង្ខតោតិ? អាមន្តា. មគ្គោ អសង្ខតោតិ? ន ហេវំ វត្តព្ពេ…បេ….

មគ្គោ សង្ខតោតិ? អាមន្តា. និយាមោ សង្ខតោតិ? ន ហេវំ វត្តព្ពេ…បេ….

សោតាបត្តិនិយាមោ អសង្ខតោតិ? អាមន្តា. សោតាបត្តិមគ្គោ អសង្ខតោតិ? ន ហេវំ វត្តព្ពេ…បេ….

សោតាបត្តិមគ្គោ សង្ខតោតិ? អាមន្តា. សោតាបត្តិនិយាមោ សង្ខតោតិ? ន ហេវំ វត្តព្ពេ…បេ….

សកទាគាមិនិយាមោ…បេ… អនាគាមិនិយាមោ…បេ… អរហត្តនិយាមោ អសង្ខតោតិ? អាមន្តា. អរហត្តមគ្គោ អសង្ខតោតិ? ន ហេវំ វត្តព្ពេ …បេ… អរហត្តមគ្គោ សង្ខតោតិ? អាមន្តា. អរហត្តនិយាមោ សង្ខតោតិ? ន ហេវំ វត្តព្ពេ…បេ….

សោតាបត្តិនិយាមោ អសង្ខតោ…បេ… អរហត្តនិយាមោ អសង្ខតោ, និព្ពានំ អសង្ខតន្តិ? អាមន្តា. បញ្ច អសង្ខតានីតិ? ន ហេវំ វត្តព្ពេ…បេ… បញ្ច អសង្ខតានីតិ? អាមន្តា. បញ្ច តាណានិ…បេ… អន្តរិកា វាតិ? ន ហេវំ វត្តព្ពេ…បេ….

និយាមោ អសង្ខតោតិ? អាមន្តា. មិច្ឆត្តនិយាមោ អសង្ខតោតិ? ន ហេវំ វត្តព្ពេ…បេ… មិច្ឆត្តនិយាមោ សង្ខតោតិ? អាមន្តា. សម្មត្តនិយាមោ សង្ខតោតិ? ន ហេវំ វត្តព្ពេ…បេ….

៤៤៧. ន វត្តព្ពំ – ‘‘និយាមោ អសង្ខតោ’’តិ? អាមន្តា. និយាមេ ឧប្បជ្ជ និរុទ្ធេ អនិយតោ ហោតីតិ? ន ហេវំ វត្តព្ពេ…បេ…. តេន ហិ និយាមោ អសង្ខតោតិ. មិច្ឆត្តនិយាមេ ឧប្បជ្ជ និរុទ្ធេ អនិយតោ ហោតីតិ? ន ហេវំ វត្តព្ពេ…បេ… តេន ហិ មិច្ឆត្តនិយាមោ អសង្ខតោតិ.

និយាមកថា និដ្ឋិតា.