៤. ចតុត្ថវគ្គោ

(៤២) ១០. សព្ពសំយោជនប្បហានកថា

៤១៣. សព្ពសំយោជនានំ បហានំ អរហត្តន្តិ? អាមន្តា. អរហត្តមគ្គេន សព្ពេ សំយោជនា បហីយន្តីតិ? ន ហេវំ វត្តព្ពេ…បេ….

អរហត្តមគ្គេន សព្ពេ សំយោជនា បហីយន្តីតិ? អាមន្តា. អរហត្តមគ្គេន សក្កាយទិដ្ឋិំ វិចិកិច្ឆំ សីលព្ពតបរាមាសំ បជហតីតិ? ន ហេវំ វត្តព្ពេ…បេ….

អរហត្តមគ្គេន សក្កាយទិដ្ឋិំ វិចិកិច្ឆំ សីលព្ពតបរាមាសំ បជហតីតិ? អាមន្តា. ននុ តិណ្ណំ សំយោជនានំ បហានំ សោតាបត្តិផលំ វុត្តំ ភគវតាតិ? អាមន្តា. ហញ្ចិ តិណ្ណំ សំយោជនានំ បហានំ សោតាបត្តិផលំ វុត្តំ ភគវតា, នោ ច វត រេ វត្តព្ពេ – ‘‘អរហត្តមគ្គេន សព្ពេ សំយោជនា បហីយន្តី’’តិ.

៤១៤. អរហត្តមគ្គេន សព្ពេ សំយោជនា បហីយន្តីតិ? អាមន្តា. អរហត្តមគ្គេន ឱឡារិកំ កាមរាគំ ឱឡារិកំ ព្យាបាទំ បជហតីតិ? ន ហេវំ វត្តព្ពេ…បេ….

៤១៥. អរហត្តមគ្គេន ឱឡារិកំ កាមរាគំ ឱឡារិកំ ព្យាបាទំ បជហតីតិ? អាមន្តា. ននុ កាមរាគព្យាបាទានំ តនុភាវំ សកទាគាមិផលំ វុត្តំ ភគវតាតិ? អាមន្តា. ហញ្ចិ កាមរាគព្យាបាទានំ តនុភាវំ សកទាគាមិផលំ វុត្តំ ភគវតា, នោ ច វត រេ វត្តព្ពេ – ‘‘អរហត្តមគ្គេន សព្ពេ សំយោជនា បហីយន្តី’’តិ.

អរហត្តមគ្គេន សព្ពេ សំយោជនា បហីយន្តីតិ? អាមន្តា. អរហត្តមគ្គេន អណុសហគតំ កាមរាគំ អណុសហគតំ ព្យាបាទំ បជហតីតិ? ន ហេវំ វត្តព្ពេ…បេ….

៤១៦. អរហត្តមគ្គេន អណុសហគតំ កាមរាគំ អណុសហគតំ ព្យាបាទំ បជហតីតិ? អាមន្តា. ននុ កាមរាគព្យាបាទានំ អនវសេសប្បហានំ អនាគាមិផលំ វុត្តំ ភគវតាតិ? អាមន្តា. ហញ្ចិ កាមរាគព្យាបាទានំ អនវសេសប្បហានំ អនាគាមិផលំ វុត្តំ ភគវតា, នោ ច វត រេ វត្តព្ពេ – ‘‘អរហត្តមគ្គេន សព្ពេ សំយោជនា បហីយន្តី’’តិ.

អរហត្តមគ្គេន សព្ពេ សំយោជនា បហីយន្តីតិ? អាមន្តា. ននុ រូបរាគអរូបរាគមានឧទ្ធច្ចអវិជ្ជាយ អនវសេសប្បហានំ អរហត្តំ វុត្តំ ភគវតាតិ? អាមន្តា. ហញ្ចិ រូបរាគអរូបរាគមានឧទ្ធច្ចអវិជ្ជាយ អនវសេសប្បហានំ អរហត្តំ វុត្តំ ភគវតា, នោ ច វត រេ វត្តព្ពេ – ‘‘អរហត្តមគ្គេន សព្ពេ សំយោជនា បហីយន្តី’’តិ.

៤១៧. ន វត្តព្ពំ – ‘‘សព្ពសំយោជនានំ បហានំ អរហត្ត’’ន្តិ? អាមន្តា. ននុ អរហតោ សព្ពេ សំយោជនា បហីនាតិ? អាមន្តា. ហញ្ចិ អរហតោ សព្ពេ សំយោជនា បហីនា, តេន វត រេ វត្តព្ពេ – ‘‘សព្ពសំយោជនានំ បហានំ អរហត្ត’’ន្តិ.

សព្ពសំយោជនប្បហានកថា និដ្ឋិតា.

ចតុត្ថវគ្គោ.

តស្សុទ្ទានំ –

គិហិស្ស អរហា, សហ ឧបបត្តិយា អរហា, អរហតោ សព្ពេ ធម្មា អនាសវា, អរហា ចតូហិ ផលេហិ សមន្នាគតោ, ឯវមេវំ ឆហិ ឧបេក្ខាហិ, ពោធិយា ពុទ្ធោ, សលក្ខណសមន្នាគតោ, ពោធិសត្តោ ឱក្កន្តនិយាមោ ចរិតព្រហ្មចរិយោ, បដិបន្នកោ ផលេន សមន្នាគតោ, សព្ពសំយោជនានំ បហានំ អរហត្តន្តិ.