៣. តតិយវគ្គោ

(២៨) ៨. ទិព្ពសោតកថា

៣៧៥. មំសសោតំ ធម្មុបត្ថទ្ធំ ទិព្ពសោតំ ហោតីតិ? អាមន្តា. មំសសោតំ ទិព្ពសោតំ, ទិព្ពសោតំ មំសសោតន្តិ? ន ហេវំ វត្តព្ពេ…បេ….

មំសសោតំ ធម្មុបត្ថទ្ធំ ទិព្ពសោតំ ហោតីតិ? អាមន្តា. យាទិសំ មំសសោតំ តាទិសំ ទិព្ពសោតំ, យាទិសំ ទិព្ពសោតំ តាទិសំ មំសសោតន្តិ? ន ហេវំ វត្តព្ពេ…បេ….

មំសសោតំ ធម្មុបត្ថទ្ធំ ទិព្ពសោតំ ហោតីតិ? អាមន្តា. តញ្ញេវ មំសសោតំ តំ ទិព្ពសោតំ, តំ ទិព្ពសោតំ តំ មំសសោតន្តិ? ន ហេវំ វត្តព្ពេ…បេ….

មំសសោតំ ធម្មុបត្ថទ្ធំ ទិព្ពសោតំ ហោតីតិ? អាមន្តា. យាទិសោ មំសសោតស្ស វិសយោ អានុភាវោ គោចរោ តាទិសោ ទិព្ពស្ស សោតស្ស វិសយោ អានុភាវោ គោចរោតិ? ន ហេវំ វត្តព្ពេ…បេ….

មំសសោតំ ធម្មុបត្ថទ្ធំ ទិព្ពសោតំ ហោតីតិ? អាមន្តា. ឧបាទិណ្ណំ ហុត្វា អនុបាទិណ្ណំ ហោតីតិ? ន ហេវំ វត្តព្ពេ…បេ….

ឧបាទិណ្ណំ ហុត្វា អនុបាទិណ្ណំ ហោតីតិ? អាមន្តា. កាមាវចរំ ហុត្វា រូបាវចរំ ហោតីតិ? ន ហេវំ វត្តព្ពេ…បេ….

កាមាវចរំ ហុត្វា រូបាវចរំ ហោតីតិ? អាមន្តា. រូបាវចរំ ហុត្វា អរូបាវចរំ ហោតីតិ? ន ហេវំ វត្តព្ពេ…បេ….

រូបាវចរំ ហុត្វា អរូបាវចរំ ហោតីតិ? អាមន្តា. បរិយាបន្នំ ហុត្វា អបរិយាបន្នំ ហោតីតិ? ន ហេវំ វត្តព្ពេ…បេ….

៣៧៦. មំសសោតំ ធម្មុបត្ថទ្ធំ ទិព្ពសោតំ ហោតីតិ? អាមន្តា. ទិព្ពសោតំ ធម្មុបត្ថទ្ធំ មំសសោតំ ហោតីតិ? ន ហេវំ វត្តព្ពេ…បេ….

មំសសោតំ ធម្មុបត្ថទ្ធំ ទិព្ពសោតំ ហោតីតិ? អាមន្តា. ឯកំយេវ សោតន្តិ? ន ហេវំ វត្តព្ពេ…បេ….

ឯកំយេវ សោតន្តិ? អាមន្តា. ននុ ទ្វេ សោតានិ វុត្តានិ ភគវតា – ‘‘មំសសោតំ, ទិព្ពសោត’’ន្តិ? អាមន្តា. ហញ្ចិ ទ្វេ សោតានិ វុត្តានិ ភគវតា – មំសសោតំ, ទិព្ពសោតំ, នោ ច វត រេ វត្តព្ពេ – ‘‘ឯកញ្ញេវ សោត’’ន្តិ.

ទិព្ពសោតកថា និដ្ឋិតា.