៣. តតិយវគ្គោ

(៣០) ១០. សំវរកថា

៣៧៩. អត្ថិ ទេវេសុ សំវរោតិ? អាមន្តា. អត្ថិ ទេវេសុ អសំវរោតិ? ន ហេវំ វត្តព្ពេ…បេ….

នត្ថិ ទេវេសុ អសំវរោតិ? អាមន្តា. នត្ថិ ទេវេសុ សំវរោតិ? ន ហេវំ វត្តព្ពេ…បេ….

ននុ អសំវរា សំវរោ សីលំ, អត្ថិ ទេវេសុ សំវរោតិ? អាមន្តា. អត្ថិ ទេវេសុ អសំវរោ, យម្ហា អសំវរា សំវរោ សីលន្តិ? ន ហេវំ វត្តព្ពេ…បេ….

អាជានាហិ និគ្គហំ. ហញ្ចិ អសំវរា សំវរោ សីលំ, អត្ថិ ទេវេសុ សំវរោ, តេន វត រេ វត្តព្ពេ – ‘‘អត្ថិ ទេវេសុ អសំវរោ, យម្ហា អសំវរា សំវរោ សីល’’ន្តិ. យំ តត្ថ វទេសិ – ‘‘វត្តព្ពេ ខោ – ‘អសំវរា សំវរោ សីលំ, អត្ថិ ទេវេសុ សំវរោ,’ នោ ច វត្តព្ពេ – ‘អត្ថិ ទេវេសុ អសំវរោ, យម្ហា អសំវរា សំវរោ សីល’’’ន្តិ មិច្ឆា.

នោ ចេ បន វត្តព្ពេ – ‘‘អត្ថិ ទេវេសុ អសំវរោ, យម្ហា អសំវរា សំវរោ សីល’’ន្តិ, នោ ច វត រេ វត្តព្ពេ – ‘‘អសំវរា សំវរោ សីលំ, អត្ថិ ទេវេសុ សំវរោ’’តិ. យំ តត្ថ វទេសិ – ‘‘វត្តព្ពេ ខោ ‘អសំវរា សំវរោ សីលំ, អត្ថិ ទេវេសុ សំវរោ,’ នោ ច វត្តព្ពេ – ‘អត្ថិ ទេវេសុ អសំវរោ, យម្ហា អសំវរា សំវរោ សីល’’’ន្តិ មិច្ឆា.

អត្ថិ មនុស្សេសុ សំវរោ, អត្ថិ តត្ថ អសំវរោតិ? អាមន្តា. អត្ថិ ទេវេសុ សំវរោ, អត្ថិ តត្ថ អសំវរោតិ? ន ហេវំ វត្តព្ពេ…បេ….

អត្ថិ ទេវេសុ សំវរោ, នត្ថិ តត្ថ អសំវរោតិ? អាមន្តា. អត្ថិ មនុស្សេសុ សំវរោ, នត្ថិ តត្ថ អសំវរោតិ? ន ហេវំ វត្តព្ពេ…បេ….

៣៨០. អត្ថិ ទេវេសុ បាណាតិបាតា វេរមណីតិ? អាមន្តា. អត្ថិ ទេវេសុ បាណាតិបាតោតិ? ន ហេវំ វត្តព្ពេ…បេ….

អត្ថិ ទេវេសុ សុរាមេរយមជ្ជបមាទដ្ឋានា វេរមណីតិ? អាមន្តា. អត្ថិ ទេវេសុ សុរាមេរយមជ្ជបមាទដ្ឋានន្តិ? ន ហេវំ វត្តព្ពេ…បេ….

នត្ថិ ទេវេសុ បាណាតិបាតោតិ? អាមន្តា. នត្ថិ ទេវេសុ បាណាតិបាតា វេរមណីតិ? ន ហេវំ វត្តព្ពេ…បេ….

នត្ថិ ទេវេសុ សុរាមេរយមជ្ជបមាទដ្ឋានន្តិ? អាមន្តា. នត្ថិ ទេវេសុ សុរាមេរយមជ្ជបមាទដ្ឋានា វេរមណីតិ? ន ហេវំ វត្តព្ពេ…បេ….

អត្ថិ មនុស្សេសុ បាណាតិបាតា វេរមណិ, អត្ថិ តត្ថ បាណាតិបាតោតិ? អាមន្តា. អត្ថិ ទេវេសុ បាណាតិបាតា វេរមណិ, អត្ថិ តត្ថ បាណាតិបាតោតិ? ន ហេវំ វត្តព្ពេ…បេ….

អត្ថិ មនុស្សេសុ សុរាមេរយមជ្ជបមាទដ្ឋានា វេរមណិ, អត្ថិ តត្ថ សុរាមេរយមជ្ជបមាទដ្ឋានន្តិ? អាមន្តា. អត្ថិ ទេវេសុ សុរាមេរយមជ្ជបមាទដ្ឋានា វេរមណិ, អត្ថិ តត្ថ សុរាមេរយមជ្ជបមាទដ្ឋានន្តិ? ន ហេវំ វត្តព្ពេ…បេ….

អត្ថិ ទេវេសុ បាណាតិបាតា វេរមណិ, នត្ថិ តត្ថ បាណាតិបាតោតិ? អាមន្តា. អត្ថិ មនុស្សេសុ បាណាតិបាតា វេរមណិ, នត្ថិ តត្ថ បាណាតិបាតោតិ? ន ហេវំ វត្តព្ពេ…បេ….

អត្ថិ ទេវេសុ សុរាមេរយមជ្ជបមាទដ្ឋានា វេរមណិ, នត្ថិ តត្ថ សុរាមេរយមជ្ជបមាទដ្ឋានន្តិ? អាមន្តា. អត្ថិ មនុស្សេសុ សុរាមេរយមជ្ជបមាទដ្ឋានា វេរមណិ, នត្ថិ តត្ថ សុរាមេរយមជ្ជបមាទដ្ឋានន្តិ? ន ហេវំ វត្តព្ពេ…បេ….

នត្ថិ ទេវេសុ សំវរោតិ? អាមន្តា. សព្ពេ ទេវា បាណាតិបាតិនោ អទិន្នាទាយិនោ កាមេសុមិច្ឆាចារិនោ មុសាវាទិនោ សុរាមេរយមជ្ជបមាទដ្ឋាយិនោតិ? ន ហេវំ វត្តព្ពេ…បេ… តេន ហិ អត្ថិ ទេវេសុ សំវរោតិ.

សំវរកថា និដ្ឋិតា.