៣. តតិយវគ្គោ

(៣១) ១១. អសញ្ញកថា

៣៨១. អសញ្ញសត្តេសុ សញ្ញា អត្ថីតិ? អាមន្តា. សញ្ញាភវោ សញ្ញាគតិ សញ្ញាសត្តាវាសោ សញ្ញាសំសារោ សញ្ញាយោនិ សញ្ញត្តភាវបដិលាភោតិ? ន ហេវំ វត្តព្ពេ…បេ….

ននុ អសញ្ញភវោ អសញ្ញគតិ អសញ្ញសត្តាវាសោ អសញ្ញសំសារោ អសញ្ញយោនិ អសញ្ញត្តភាវបដិលាភោតិ? អាមន្តា. ហញ្ចិ អសញ្ញភវោ អសញ្ញគតិ អសញ្ញសត្តាវាសោ អសញ្ញសំសារោ អសញ្ញយោនិ អសញ្ញត្តភាវបដិលាភោ, នោ ច វត រេ វត្តព្ពេ – ‘‘អសញ្ញសត្តេសុ សញ្ញា អត្ថី’’តិ.

អសញ្ញសត្តេសុ សញ្ញា អត្ថីតិ? អាមន្តា. បញ្ចវោការភវោ គតិ សត្តាវាសោ សំសារោ យោនិ អត្តភាវបដិលាភោតិ? ន ហេវំ វត្តព្ពេ…បេ….

ននុ ឯកវោការភវោ គតិ សត្តាវាសោ សំសារោ យោនិ អត្តភាវបដិលាភោតិ? អាមន្តា. ហញ្ចិ ឯកវោការភវោ គតិ សត្តាវាសោ សំសារោ យោនិ អត្តភាវបដិលាភោ, នោ ច វត រេ វត្តព្ពេ – ‘‘អសញ្ញសត្តេសុ សញ្ញា អត្ថី’’តិ.

អសញ្ញសត្តេសុ សញ្ញា អត្ថីតិ? អាមន្តា. តាយ សញ្ញាយ សញ្ញាករណីយំ ករោតីតិ? ន ហេវំ វត្តព្ពេ…បេ….

៣៨២. មនុស្សេសុ សញ្ញា អត្ថិ, សោ ច សញ្ញាភវោ សញ្ញាគតិ សញ្ញាសត្តាវាសោ សញ្ញាសំសារោ សញ្ញាយោនិ សញ្ញត្តភាវបដិលាភោតិ? អាមន្តា. អសញ្ញសត្តេសុ សញ្ញា អត្ថិ, សោ ច សញ្ញាភវោ សញ្ញាគតិ សត្តាវាសោ សំសារោ យោនិ អត្តភាវបដិលាភោតិ? ន ហេវំ វត្តព្ពេ…បេ….

មនុស្សេសុ សញ្ញា អត្ថិ, សោ ច បញ្ចវោការភវោ គតិ សត្តាវាសោ សំសារោ យោនិ អត្តភាវបដិលាភោតិ? អាមន្តា. អសញ្ញសត្តេសុ សញ្ញា អត្ថិ, សោ ច បញ្ចវោការភវោ គតិ សត្តាវាសោ សំសារោ យោនិ អត្តភាវបដិលាភោតិ? ន ហេវំ វត្តព្ពេ…បេ….

មនុស្សេសុ សញ្ញា អត្ថិ, តាយ សញ្ញាយ សញ្ញាករណីយំ ករោតីតិ? អាមន្តា. អសញ្ញសត្តេសុ សញ្ញា អត្ថិ, តាយ សញ្ញាយ សញ្ញាករណីយំ ករោតីតិ? ន ហេវំ វត្តព្ពេ…បេ….

អសញ្ញសត្តេសុ សញ្ញា អត្ថិ, សោ ច អសញ្ញភវោ អសញ្ញគតិ អសញ្ញសត្តាវាសោ អសញ្ញសំសារោ អសញ្ញយោនិ អសញ្ញត្តភាវបដិលាភោតិ? អាមន្តា. មនុស្សេសុ សញ្ញា អត្ថិ, សោ ច អសញ្ញភវោ អសញ្ញគតិ…បេ… អសញ្ញត្តភាវបដិលាភោតិ? ន ហេវំ វត្តព្ពេ…បេ….

អសញ្ញសត្តេសុ សញ្ញា អត្ថិ, សោ ច ឯកវោការភវោ គតិ សត្តាវាសោ សំសារោ យោនិ អត្តភាវបដិលាភោតិ? អាមន្តា. មនុស្សេសុ សញ្ញា អត្ថិ, សោ ច ឯកវោការភវោ គតិ…បេ… អត្តភាវបដិលាភោតិ? ន ហេវំ វត្តព្ពេ…បេ….

អសញ្ញសត្តេសុ សញ្ញា អត្ថិ, ន ច តាយ សញ្ញាយ សញ្ញាករណីយំ ករោតីតិ? អាមន្តា. មនុស្សេសុ សញ្ញា អត្ថិ, ន ច តាយ សញ្ញាយ សញ្ញាករណីយំ ករោតីតិ? ន ហេវំ វត្តព្ពេ…បេ….

៣៨៣. ន វត្តព្ពំ – ‘‘អសញ្ញសត្តេសុ សញ្ញា អត្ថី’’តិ? អាមន្តា. ននុ វុត្តំ ភគវតា – ‘‘សន្តិ, ភិក្ខវេ, អសញ្ញសត្តា នាម ទេវា; សញ្ញុប្បាទា ច បន តេ ទេវា តម្ហា កាយា ចវន្តី’’តិ [ទី. និ. ១.៦៨]! អត្ថេវ សុត្តន្តោតិ? អាមន្តា. តេន ហិ អសញ្ញសត្តេសុ សញ្ញា អត្ថីតិ.

អសញ្ញសត្តេសុ សញ្ញា អត្ថីតិ? កិញ្ចិ [កញ្ចិ (ស្យា.)] កាលេ អត្ថិ, កិញ្ចិ កាលេ នត្ថីតិ. កិញ្ចិ កាលេ សញ្ញសត្តា កិញ្ចិ កាលេ អសញ្ញសត្តា, កិញ្ចិ កាលេ សញ្ញភវោ កិញ្ចិ កាលេ អសញ្ញភវោ, កិញ្ចិ កាលេ បញ្ចវោការភវោ កិញ្ចិ កាលេ ឯកវោការភវោតិ? ន ហេវំ វត្តព្ពេ…បេ….

អសញ្ញសត្តេសុ សញ្ញា កិញ្ចិ កាលេ អត្ថិ, កិញ្ចិ កាលេ នត្ថីតិ? អាមន្តា. កំ កាលំ អត្ថិ, កំ កាលំ នត្ថីតិ? ចុតិកាលេ ឧបបត្តិកាលេ អត្ថិ, ឋិតិកាលេ នត្ថីតិ. ចុតិកាលេ ឧបបត្តិកាលេ សញ្ញសត្តា, ឋិតិកាលេ អសញ្ញសត្តា; ចុតិកាលេ ឧបបត្តិកាលេ សញ្ញភវោ, ឋិតិកាលេ អសញ្ញភវោ; ចុតិកាលេ ឧបបត្តិកាលេ បញ្ចវោការភវោ, ឋិតិកាលេ ឯកវោការភវោតិ? ន ហេវំ វត្តព្ពេ…បេ….

អសញ្ញកថា និដ្ឋិតា.