២. ទុតិយវគ្គោ

(២០) ១១. និរោធកថា

៣៥៣. ទ្វេ និរោធាតិ? អាមន្តា. ទ្វេ ទុក្ខនិរោធាតិ? ន ហេវំ វត្តព្ពេ…បេ… ទ្វេ ទុក្ខនិរោធាតិ? អាមន្តា. ទ្វេ និរោធសច្ចានីតិ? ន ហេវំ វត្តព្ពេ…បេ… ទ្វេ និរោធសច្ចានីតិ? អាមន្តា. ទ្វេ ទុក្ខសច្ចានីតិ? ន ហេវំ វត្តព្ពេ…បេ… ទ្វេ និរោធសច្ចានីតិ? អាមន្តា. ទ្វេ សមុទយសច្ចានីតិ? ន ហេវំ វត្តព្ពេ…បេ… ទ្វេ និរោធសច្ចានីតិ? អាមន្តា. ទ្វេ មគ្គសច្ចានីតិ? ន ហេវំ វត្តព្ពេ…បេ….

ទ្វេ និរោធសច្ចានីតិ? អាមន្តា. ទ្វេ តាណានិ…បេ… ទ្វេ លេណានិ… ទ្វេ សរណានិ… ទ្វេ បរាយណានិ… ទ្វេ អច្ចុតានិ… ទ្វេ អមតានិ… ទ្វេ និព្ពានានីតិ? ន ហេវំ វត្តព្ពេ…បេ….

ទ្វេ និព្ពានានីតិ? អាមន្តា. អត្ថិ ទ្វិន្នំ និព្ពានានំ ឧច្ចនីចតា ហីនបណីតតា ឧក្កំសាវកំសោ សីមា វា ភេទោ វា រាជិ វា អន្តរិកា វាតិ? ន ហេវំ វត្តព្ពេ…បេ….

ទ្វេ និរោធាតិ? អាមន្តា. ននុ អប្បដិសង្ខានិរុទ្ធេ សង្ខារេ បដិសង្ខា និរោធេន្តីតិ? អាមន្តា. ហញ្ចិ អប្បដិសង្ខានិរុទ្ធេ សង្ខារេ បដិសង្ខា និរោធេន្តិ, នោ ច វត រេ វត្តព្ពេ – ‘‘ទ្វេ និរោធា’’តិ.

ន វត្តព្ពំ – ‘‘ទ្វេ និរោធា’’តិ? អាមន្តា. ននុ អប្បដិសង្ខានិរុទ្ធាបិ សង្ខារា អច្ចន្តភគ្គា, បដិសង្ខានិរុទ្ធាបិ សង្ខារា អច្ចន្តភគ្គាតិ? អាមន្តា. ហញ្ចិ អប្បដិសង្ខានិរុទ្ធាបិ សង្ខារា អច្ចន្តភគ្គា, បដិសង្ខានិរុទ្ធាបិ សង្ខារា អច្ចន្តភគ្គា, តេន វត រេ វត្តព្ពេ – ‘‘ទ្វេ និរោធា’’តិ.

ទ្វេ និរោធាតិ? អាមន្តា. បដិសង្ខានិរុទ្ធាបិ [បដិសង្ខានិរុទ្ធា (?)] សង្ខារា អរិយមគ្គំ អាគម្ម និរុទ្ធាតិ? អាមន្តា. អប្បដិសង្ខានិរុទ្ធា សង្ខារា អរិយមគ្គំ អាគម្ម និរុទ្ធាតិ? ន ហេវំ វត្តព្ពេ…បេ….

ទ្វេ និរោធាតិ? អាមន្តា. បដិសង្ខានិរុទ្ធា សង្ខារា ន បុន ឧប្បជ្ជន្តីតិ? អាមន្តា. អប្បដិសង្ខានិរុទ្ធា សង្ខារា ន បុន ឧប្បជ្ជន្តីតិ? ន ហេវំ វត្តព្ពេ…បេ… តេន ហិ ន វត្តព្ពំ – ‘‘ទ្វេ និរោធា’’តិ.

និរោធកថា និដ្ឋិតា.

ទុតិយវគ្គោ.

តស្សុទ្ទានំ –

បរូបហារោ អញ្ញាណំ, កង្ខា បរវិតារណា;

វចីភេទោ ទុក្ខាហារោ, ចិត្តដ្ឋិតិ ច កុក្កុឡា;

អនុបុព្ពាភិសមយោ, វោហារោ ច និរោធកោតិ.