២. ទុតិយវគ្គោ

(១៩) ១០. វោហារកថា

៣៤៧. ពុទ្ធស្ស ភគវតោ វោហារោ លោកុត្តរោតិ? អាមន្តា. លោកុត្តរេ សោតេ បដិហញ្ញតិ នោ លោកិយេ, លោកុត្តរេន វិញ្ញាណេន បដិវិជានន្តិ នោ លោកិយេន, សាវកា បដិវិជានន្តិ នោ បុថុជ្ជនាតិ? ន ហេវំ វត្តព្ពេ…បេ….

ននុ ពុទ្ធស្ស ភគវតោ វោហារោ លោកិយេ សោតេ បដិហញ្ញតីតិ? អាមន្តា. ហញ្ចិ ពុទ្ធស្ស ភគវតោ វោហារោ លោកិយេ សោតេ បដិហញ្ញតិ, នោ ច វត រេ វត្តព្ពេ – ‘‘ពុទ្ធស្ស ភគវតោ វោហារោ លោកុត្តរោ’’តិ.

ននុ ពុទ្ធស្ស ភគវតោ វោហារំ លោកិយេន វិញ្ញាណេន បដិវិជានន្តីតិ? អាមន្តា. ហញ្ចិ ពុទ្ធស្ស ភគវតោ វោហារំ លោកិយេន វិញ្ញាណេន បដិវិជានន្តិ, នោ ច វត រេ វត្តព្ពេ – ‘‘ពុទ្ធស្ស ភគវតោ វោហារោ លោកុត្តរោ’’តិ.

ននុ ពុទ្ធស្ស ភគវតោ វោហារំ បុថុជ្ជនា បដិវិជានន្តីតិ? អាមន្តា. ហញ្ចិ ពុទ្ធស្ស ភគវតោ វោហារំ បុថុជ្ជនា បដិវិជានន្តិ, នោ ច វត រេ វត្តព្ពេ – ‘‘ពុទ្ធស្ស ភគវតោ វោហារោ លោកុត្តរោ’’តិ.

៣៤៨. ពុទ្ធស្ស ភគវតោ វោហារោ លោកុត្តរោតិ? អាមន្តា. មគ្គោ ផលំ និព្ពានំ, សោតាបត្តិមគ្គោ សោតាបត្តិផលំ, សកទាគាមិមគ្គោ សកទាគាមិផលំ, អនាគាមិមគ្គោ អនាគាមិផលំ, អរហត្តមគ្គោ អរហត្តផលំ, សតិបដ្ឋានំ សម្មប្បធានំ ឥទ្ធិបាទោ ឥន្ទ្រិយំ ពលំ ពោជ្ឈង្គោតិ? ន ហេវំ វត្តព្ពេ…បេ….

ពុទ្ធស្ស ភគវតោ វោហារោ លោកុត្តរោតិ? អាមន្តា. អត្ថិ កេចិ ពុទ្ធស្ស ភគវតោ វោហារំ សុណន្តីតិ? អាមន្តា. លោកុត្តរោ ធម្មោ សោតវិញ្ញេយ្យោ, សោតស្មិំ បដិហញ្ញតិ, សោតស្ស អាបាថំ អាគច្ឆតីតិ? ន ហេវំ វត្តព្ពេ…បេ….

ននុ លោកុត្តរោ ធម្មោ ន សោតវិញ្ញេយ្យោ, ន សោតស្មិំ បដិហញ្ញតិ, ន សោតស្ស អាបាថំ អាគច្ឆតីតិ? អាមន្តា. ហញ្ចិ លោកុត្តរោ ធម្មោ ន សោតវិញ្ញេយ្យោ, ន សោតស្មិំ បដិហញ្ញតិ, ន សោតស្ស អាបាថំ អាគច្ឆតិ, នោ ច វត រេ វត្តព្ពេ – ‘‘ពុទ្ធស្ស ភគវតោ វោហារោ លោកុត្តរោ’’តិ.

៣៤៩. ពុទ្ធស្ស ភគវតោ វោហារោ លោកុត្តរោតិ? អាមន្តា. អត្ថិ កេចិ ពុទ្ធស្ស ភគវតោ វោហារេ រជ្ជេយ្យុន្តិ? អាមន្តា. លោកុត្តរោ ធម្មោ រាគដ្ឋានិយោ រជនីយោ កមនីយោ មទនីយោ ពន្ធនីយោ មុច្ឆនីយោតិ? ន ហេវំ វត្តព្ពេ…បេ….

ននុ លោកុត្តរោ ធម្មោ ន រាគដ្ឋានិយោ ន រជនីយោ ន កមនីយោ ន មទនីយោ ន ពន្ធនីយោ ន មុច្ឆនីយោតិ? អាមន្តា. ហញ្ចិ លោកុត្តរោ ធម្មោ ន រាគដ្ឋានិយោ ន រជនីយោ ន កមនីយោ ន មទនីយោ ន ពន្ធនីយោ ន មុច្ឆនីយោ, នោ ច វត រេ វត្តព្ពេ – ‘‘ពុទ្ធស្ស ភគវតោ វោហារោ លោកុត្តរោ’’តិ.

ពុទ្ធស្ស ភគវតោ វោហារោ លោកុត្តរោតិ? អាមន្តា. អត្ថិ កេចិ ពុទ្ធស្ស ភគវតោ វោហារេ ទុស្សេយ្យុន្តិ? អាមន្តា. លោកុត្តរោ ធម្មោ ទោសដ្ឋានិយោ កោបដ្ឋានិយោ បដិឃដ្ឋានិយោតិ? ន ហេវំ វត្តព្ពេ…បេ….

ននុ លោកុត្តរោ ធម្មោ ន ទោសដ្ឋានិយោ ន កោបដ្ឋានិយោ ន បដិឃដ្ឋានិយោតិ? អាមន្តា. ហញ្ចិ លោកុត្តរោ ធម្មោ ន ទោសដ្ឋានិយោ ន កោបដ្ឋានិយោ ន បដិឃដ្ឋានិយោ, នោ ច វត រេ វត្តព្ពេ – ‘‘ពុទ្ធស្ស ភគវតោ វោហារោ លោកុត្តរោ’’តិ.

ពុទ្ធស្ស ភគវតោ វោហារោ លោកុត្តរោតិ? អាមន្តា. អត្ថិ កេចិ ពុទ្ធស្ស ភគវតោ វោហារេ មុយ្ហេយ្យុន្តិ? អាមន្តា. លោកុត្តរោ ធម្មោ មោហដ្ឋានិយោ អញ្ញាណករណោ អចក្ខុករណោ បញ្ញានិរោធិកោ វិឃាតបក្ខិកោ អនិព្ពានសំវត្តនិកោតិ? ន ហេវំ វត្តព្ពេ…បេ….

ននុ លោកុត្តរោ ធម្មោ ន មោហដ្ឋានិយោ ន អញ្ញាណករណោ ន អចក្ខុករណោ បញ្ញាវុទ្ធិកោ អវិឃាតបក្ខិកោ និព្ពានសំវត្តនិកោតិ? អាមន្តា. ហញ្ចិ លោកុត្តរោ ធម្មោ ន មោហដ្ឋានិយោ ន អញ្ញាណករណោ ន អចក្ខុករណោ បញ្ញាវុទ្ធិកោ អវិឃាតបក្ខិកោ និព្ពានសំវត្តនិកោ, នោ ច វត រេ វត្តព្ពេ – ‘‘ពុទ្ធស្ស ភគវតោ វោហារោ លោកុត្តរោ’’តិ.

៣៥០. ពុទ្ធស្ស ភគវតោ វោហារោ លោកុត្តរោតិ? អាមន្តា. យេ កេចិ ពុទ្ធស្ស ភគវតោ វោហារំ សុណន្តិ, សព្ពេ តេ មគ្គំ ភាវេន្តីតិ? ន ហេវំ វត្តព្ពេ…បេ….

យេ កេចិ ពុទ្ធស្ស ភគវតោ វោហារំ សុណន្តិ, សព្ពេ តេ មគ្គំ ភាវេន្តីតិ? អាមន្តា. ពាលបុថុជ្ជនា ពុទ្ធស្ស ភគវតោ វោហារំ សុណន្តិ, ពាលបុថុជ្ជនា មគ្គំ ភាវេន្តីតិ? ន ហេវំ វត្តព្ពេ…បេ… មាតុឃាតកោ មគ្គំ ភាវេតិ…បេ… បិតុឃាតកោ… អរហន្តឃាតកោ… រុហិរុប្បាទកោ… សង្ឃភេទកោ ពុទ្ធស្ស ភគវតោ វោហារំ សុណាតិ, សង្ឃភេទកោ មគ្គំ ភាវេតីតិ? ន ហេវំ វត្តព្ពេ…បេ….

៣៥១. លព្ភា សោវណ្ណមយាយ លដ្ឋិយា ធញ្ញបុញ្ជោបិ សុវណ្ណបុញ្ជោបិ អាចិក្ខិតុន្តិ? អាមន្តា. ឯវមេវំ ភគវា លោកុត្តរេន វោហារេន លោកិយម្បិ លោកុត្តរម្បិ ធម្មំ វោហរតីតិ.

លព្ភា ឯលណ្ឌិយាយ លដ្ឋិយា ធញ្ញបុញ្ជោបិ សុវណ្ណបុញ្ជោបិ អាចិក្ខិតុន្តិ? អាមន្តា. ឯវមេវំ ភគវា លោកិយេន វោហារេន លោកិយម្បិ លោកុត្តរម្បិ ធម្មំ វោហរតីតិ.

៣៥២. ពុទ្ធស្ស ភគវតោ វោហារោ លោកិយំ វោហរន្តស្ស លោកិយោ ហោតិ, លោកុត្តរំ វោហរន្តស្ស លោកុត្តរោ ហោតីតិ? អាមន្តា. លោកិយំ វោហរន្តស្ស លោកិយេ សោតេ បដិហញ្ញតិ, លោកុត្តរំ វោហរន្តស្ស លោកុត្តរេ សោតេ បដិហញ្ញតិ; លោកិយំ វោហរន្តស្ស លោកិយេន វិញ្ញាណេន បដិវិជានន្តិ, លោកុត្តរំ វោហរន្តស្ស លោកុត្តរេន វិញ្ញាណេន បដិវិជានន្តិ; លោកិយំ វោហរន្តស្ស បុថុជ្ជនា បដិវិជានន្តិ, លោកុត្តរំ វោហរន្តស្ស សាវកា បដិវិជានន្តីតិ? ន ហេវំ វត្តព្ពេ…បេ….

ន វត្តព្ពំ – ‘‘ពុទ្ធស្ស ភគវតោ វោហារោ លោកិយំ វោហរន្តស្ស លោកិយោ ហោតិ, លោកុត្តរំ វោហរន្តស្ស លោកុត្តរោ ហោតីតិ? អាមន្តា. ននុ ភគវា លោកិយម្បិ លោកុត្តរម្បិ ធម្មំ វោហរតីតិ? អាមន្តា. ហញ្ចិ ភគវា លោកិយម្បិ លោកុត្តរម្បិ ធម្មំ វោហរតិ, តេន វត រេ វត្តព្ពេ – ‘‘ពុទ្ធស្ស ភគវតោ វោហារោ លោកិយំ វោហរន្តស្ស លោកិយោ ហោតិ, លោកុត្តរំ វោហរន្តស្ស លោកុត្តរោ ហោតី’’តិ.

ពុទ្ធស្ស ភគវតោ វោហារោ លោកិយំ វោហរន្តស្ស លោកិយោ ហោតិ, លោកុត្តរំ វោហរន្តស្ស លោកុត្តរោ ហោតីតិ? អាមន្តា. មគ្គំ វោហរន្តស្ស មគ្គោ ហោតិ, អមគ្គំ វោហរន្តស្ស អមគ្គោ ហោតិ, ផលំ វោហរន្តស្ស ផលំ ហោតិ, អផលំ វោហរន្តស្ស អផលំ ហោតិ, និព្ពានំ វោហរន្តស្ស និព្ពានំ ហោតិ, អនិព្ពានំ វោហរន្តស្ស អនិព្ពានំ ហោតិ, សង្ខតំ វោហរន្តស្ស សង្ខតំ ហោតិ, អសង្ខតំ វោហរន្តស្ស អសង្ខតំ ហោតិ, រូបំ វោហរន្តស្ស រូបំ ហោតិ, អរូបំ វោហរន្តស្ស អរូបំ ហោតិ, វេទនំ វោហរន្តស្ស វេទនា ហោតិ, អវេទនំ វោហរន្តស្ស អវេទនា ហោតិ, សញ្ញំ វោហរន្តស្ស សញ្ញា ហោតិ, អសញ្ញំ វោហរន្តស្ស អសញ្ញា ហោតិ, សង្ខារេ វោហរន្តស្ស សង្ខារា ហោន្តិ, អសង្ខារេ វោហរន្តស្ស អសង្ខារា ហោន្តិ, វិញ្ញាណំ វោហរន្តស្ស វិញ្ញាណំ ហោតិ, អវិញ្ញាណំ វោហរន្តស្ស អវិញ្ញាណំ ហោតីតិ? ន ហេវំ វត្តព្ពេ…បេ….

វោហារកថា និដ្ឋិតា.