២. ទុតិយវគ្គោ

(១៨) ៩. អនុបុព្ពាភិសមយកថា

៣៣៩. អនុបុព្ពាភិសមយោតិ? អាមន្តា. អនុបុព្ពេន សោតាបត្តិមគ្គំ ភាវេតីតិ? ន ហេវំ វត្តព្ពេ. អនុបុព្ពេន សោតាបត្តិមគ្គំ ភាវេតីតិ? អាមន្តា. អនុបុព្ពេន សោតាបត្តិផលំ សច្ឆិករោតីតិ? ន ហេវំ វត្តព្ពេ.

អនុបុព្ពាភិសមយោតិ? អាមន្តា. អនុបុព្ពេន សកទាគាមិមគ្គំ ភាវេតីតិ? ន ហេវំ វត្តព្ពេ. អនុបុព្ពេន សកទាគាមិមគ្គំ ភាវេតីតិ? អាមន្តា. អនុបុព្ពេន សកទាគាមិផលំ សច្ឆិករោតីតិ? ន ហេវំ វត្តព្ពេ.

អនុបុព្ពាភិសមយោតិ? អាមន្តា. អនុបុព្ពេន អនាគាមិមគ្គំ ភាវេតីតិ? ន ហេវំ វត្តព្ពេ. អនុបុព្ពេន អនាគាមិមគ្គំ ភាវេតីតិ? អាមន្តា. អនុបុព្ពេន អនាគាមិផលំ សច្ឆិករោតីតិ? ន ហេវំ វត្តព្ពេ.

អនុបុព្ពាភិសមយោតិ? អាមន្តា. អនុបុព្ពេន អរហត្តមគ្គំ ភាវេតីតិ? ន ហេវំ វត្តព្ពេ. អនុបុព្ពេន អរហត្តមគ្គំ ភាវេតីតិ? អាមន្តា. អនុបុព្ពេន អរហត្តផលំ សច្ឆិករោតីតិ? ន ហេវំ វត្តព្ពេ.

៣៤០. សោតាបត្តិផលសច្ឆិកិរិយាយ បដិបន្នោ បុគ្គលោ ទុក្ខទស្សនេន កិំ ជហតីតិ? សក្កាយទិដ្ឋិំ, វិចិកិច្ឆំ, សីលព្ពតបរាមាសំ, តទេកដ្ឋេ ច កិលេសេ ចតុភាគំ ជហតីតិ. ចតុភាគំ សោតាបន្នោ, ចតុភាគំ ន សោតាបន្នោ, ចតុភាគំ សោតាបត្តិផលប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតិ, ចតុភាគំ សត្តក្ខត្តុបរមោ កោលង្កោលោ ឯកពីជី ពុទ្ធេ អវេច្ចប្បសាទេន សមន្នាគតោ, ធម្មេ…បេ… សង្ឃេ…បេ… អរិយកន្តេហិ សីលេហិ សមន្នាគតោ ចតុភាគំ ន អរិយកន្តេហិ សីលេហិ សមន្នាគតោតិ? ន ហេវំ វត្តព្ពេ.

សមុទយទស្សនេន…បេ… និរោធទស្សនេន…បេ… មគ្គទស្សនេន កិំ ជហតីតិ? សក្កាយទិដ្ឋិំ, វិចិកិច្ឆំ, សីលព្ពតបរាមាសំ, តទេកដ្ឋេ ច កិលេសេ ចតុភាគំ ជហតីតិ. ចតុភាគំ សោតាបន្នោ, ចតុភាគំ ន សោតាបន្នោ, ចតុភាគំ សោតាបត្តិផលប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតិ, ចតុភាគំ សត្តក្ខត្តុបរមោ កោលង្កោលោ ឯកពីជី ពុទ្ធេ អវេច្ចប្បសាទេន សមន្នាគតោ, ធម្មេ…បេ… សង្ឃេ…បេ… អរិយកន្តេហិ សីលេហិ សមន្នាគតោ, ចតុភាគំ ន អរិយកន្តេហិ សីលេហិ សមន្នាគតោតិ? ន ហេវំ វត្តព្ពេ…បេ….

៣៤១. សកទាគាមិផលសច្ឆិកិរិយាយ បដិបន្នោ បុគ្គលោ ទុក្ខទស្សនេន កិំ ជហតីតិ? ឱឡារិកំ កាមរាគំ, ឱឡារិកំ ព្យាបាទំ, តទេកដ្ឋេ ច កិលេសេ ចតុភាគំ ជហតីតិ. ចតុភាគំ សកទាគាមី, ចតុភាគំ ន សកទាគាមី, ចតុភាគំ សកទាគាមិផលប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតីតិ? ន ហេវំ វត្តព្ពេ…បេ… សមុទយទស្សនេន…បេ… និរោធទស្សនេន…បេ… មគ្គទស្សនេន កិំ ជហតីតិ? ឱឡារិកំ កាមរាគំ, ឱឡារិកំ ព្យាបាទំ, តទេកដ្ឋេ ច កិលេសេ ចតុភាគំ ជហតីតិ. ចតុភាគំ សកទាគាមី, ចតុភាគំ ន សកទាគាមី, ចតុភាគំ សកទាគាមិផលប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតីតិ? ន ហេវំ វត្តព្ពេ…បេ….

៣៤២. អនាគាមិផលសច្ឆិកិរិយាយ បដិបន្នោ បុគ្គលោ ទុក្ខទស្សនេន កិំ ជហតីតិ? អណុសហគតំ កាមរាគំ, អណុសហគតំ ព្យាបាទំ, តទេកដ្ឋេ ច កិលេសេ ចតុភាគំ ជហតីតិ. ចតុភាគំ អនាគាមី, ចតុភាគំ ន អនាគាមី, ចតុភាគំ អនាគាមិផលប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតិ, ចតុភាគំ អន្តរាបរិនិព្ពាយី…បេ… ឧបហច្ចបរិនិព្ពាយី… អសង្ខារបរិនិព្ពាយី… សសង្ខារបរិនិព្ពាយី… ឧទ្ធំសោតោ អកនិដ្ឋគាមី, ចតុភាគំ ន ឧទ្ធំសោតោ ន អកនិដ្ឋគាមីតិ? ន ហេវំ វត្តព្ពេ…បេ….

សមុទយទស្សនេន…បេ… និរោធទស្សនេន…បេ… មគ្គទស្សនេន កិំ ជហតីតិ? អណុសហគតំ កាមរាគំ, អណុសហគតំ ព្យាបាទំ, តទេកដ្ឋេ ច កិលេសេ ចតុភាគំ ជហតីតិ. ចតុភាគំ អនាគាមី, ចតុភាគំ ន អនាគាមី, ចតុភាគំ អនាគាមិផលប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតិ, ចតុភាគំ អន្តរាបរិនិព្ពាយី…បេ… ឧបហច្ចបរិនិព្ពាយី… អសង្ខារបរិនិព្ពាយី… សសង្ខារបរិនិព្ពាយី… ឧទ្ធំសោតោ អកនិដ្ឋគាមី, ចតុភាគំ ន ឧទ្ធំសោតោ អកនិដ្ឋគាមីតិ? ន ហេវំ វត្តព្ពេ…បេ….

៣៤៣. អរហត្តសច្ឆិកិរិយាយ បដិបន្នោ បុគ្គលោ ទុក្ខទស្សនេន កិំ ជហតីតិ? រូបរាគំ, អរូបរាគំ, មានំ, ឧទ្ធច្ចំ, អវិជ្ជំ, តទេកដ្ឋេ ច កិលេសេ ចតុភាគំ ជហតីតិ. ចតុភាគំ អរហា, ចតុភាគំ ន អរហា, ចតុភាគំ អរហត្តប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតិ, ចតុភាគំ វីតរាគោ…បេ… វីតទោសោ… វីតមោហោ…បេ… កតករណីយោ ឱហិតភារោ អនុប្បត្តសទត្ថោ បរិក្ខីណភវសំយោជនោ សម្មទញ្ញាវិមុត្តោ ឧក្ខិត្តបលិឃោ សង្កិណ្ណបរិខោ អព្ពូឡ្ហេសិកោ និរគ្គឡោ អរិយោ បន្នទ្ធជោ បន្នភារោ វិសញ្ញុត្តោ សុវិជិតវិជយោ, ទុក្ខំ តស្ស បរិញ្ញាតំ, សមុទយោ បហីនោ, និរោធោ សច្ឆិកតោ, មគ្គោ ភាវិតោ, អភិញ្ញេយ្យំ អភិញ្ញាតំ, បរិញ្ញេយ្យំ បរិញ្ញាតំ, បហាតព្ពំ បហីនំ, ភាវេតព្ពំ ភាវិតំ…បេ… សច្ឆិកាតព្ពំ សច្ឆិកតំ, ចតុភាគំ សច្ឆិកាតព្ពំ ន សច្ឆិកតន្តិ? ន ហេវំ វត្តព្ពេ…បេ….

សមុទយទស្សនេន … និរោធទស្សនេន… មគ្គទស្សនេន កិំ ជហតីតិ? រូបរាគំ, អរូបរាគំ, មានំ, ឧទ្ធច្ចំ, អវិជ្ជំ, តទេកដ្ឋេ ច កិលេសេ ចតុភាគំ ជហតីតិ. ចតុភាគំ អរហា, ចតុភាគំ ន អរហា, ចតុភាគំ អរហត្តប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតិ, ចតុភាគំ វីតរាគោ… វីតទោសោ… វីតមោហោ… កតករណីយោ ឱហិតភារោ អនុប្បត្តសទត្ថោ បរិក្ខីណភវសំយោជនោ សម្មទញ្ញាវិមុត្តោ ឧក្ខិត្តបលិឃោ សង្កិណ្ណបរិខោ អព្ពូឡ្ហេសិកោ និរគ្គឡោ អរិយោ បន្នទ្ធជោ បន្នភារោ វិសញ្ញុត្តោ សុវិជិតវិជយោ, ទុក្ខំ តស្ស បរិញ្ញាតំ, សមុទយោ បហីនោ, និរោធោ សច្ឆិកតោ, មគ្គោ ភាវិតោ, អភិញ្ញេយ្យំ អភិញ្ញាតំ, បរិញ្ញេយ្យំ បរិញ្ញាតំ, បហាតព្ពំ បហីនំ, ភាវេតព្ពំ ភាវិតំ…បេ… សច្ឆិកាតព្ពំ សច្ឆិកតំ, ចតុភាគំ សច្ឆិកាតព្ពំ ន សច្ឆិកតន្តិ? ន ហេវំ វត្តព្ពេ…បេ….

៣៤៤. សោតាបត្តិផលសច្ឆិកិរិយាយ បដិបន្នោ បុគ្គលោ ទុក្ខំ ទក្ខន្តោ បដិបន្នកោតិ វត្តព្ពោតិ? អាមន្តា. ទុក្ខេ ទិដ្ឋេ ផលេ ឋិតោតិ វត្តព្ពោតិ? ន ហេវំ វត្តព្ពេ. សមុទយំ ទក្ខន្តោ…បេ… និរោធំ ទក្ខន្តោ បដិបន្នកោតិ វត្តព្ពោតិ? អាមន្តា. និរោធេ ទិដ្ឋេ ផលេ ឋិតោតិ វត្តព្ពោតិ? ន ហេវំ វត្តព្ពេ.

សោតាបត្តិផលសច្ឆិកិរិយាយ បដិបន្នោ បុគ្គលោ មគ្គំ ទក្ខន្តោ បដិបន្នកោតិ វត្តព្ពោ, មគ្គេ ទិដ្ឋេ ផលេ ឋិតោតិ វត្តព្ពោតិ? អាមន្តា. ទុក្ខំ ទក្ខន្តោ បដិបន្នកោតិ វត្តព្ពោ, ទុក្ខេ ទិដ្ឋេ ផលេ ឋិតោតិ វត្តព្ពោតិ? ន ហេវំ វត្តព្ពេ…បេ… មគ្គំ ទក្ខន្តោ បដិបន្នកោតិ វត្តព្ពោ, មគ្គេ ទិដ្ឋេ ផលេ ឋិតោតិ វត្តព្ពោតិ? អាមន្តា. សមុទយំ ទក្ខន្តោ…បេ… និរោធំ ទក្ខន្តោ បដិបន្នកោតិ វត្តព្ពោ, និរោធេ ទិដ្ឋេ ផលេ ឋិតោតិ វត្តព្ពោតិ? ន ហេវំ វត្តព្ពេ…បេ….

សោតាបត្តិផលសច្ឆិកិរិយាយ បដិបន្នោ បុគ្គលោ ទុក្ខំ ទក្ខន្តោ បដិបន្នកោតិ វត្តព្ពោ, ទុក្ខេ ទិដ្ឋេ ន វត្តព្ពំ – ‘‘ផលេ ឋិតោតិ វត្តព្ពោ’’តិ? អាមន្តា. មគ្គំ ទក្ខន្តោ បដិបន្នកោតិ វត្តព្ពោ, មគ្គេ ទិដ្ឋេ ន វត្តព្ពំ – ‘‘ផលេ ឋិតោតិ វត្តព្ពោ’’តិ? ន ហេវំ វត្តព្ពេ…បេ… សមុទយំ ទក្ខន្តោ… និរោធំ ទក្ខន្តោ បដិបន្នកោតិ វត្តព្ពោ, និរោធេ ទិដ្ឋេ ន វត្តព្ពំ – ‘‘ផលេ ឋិតោតិ វត្តព្ពោ’’តិ? អាមន្តា. មគ្គំ ទក្ខន្តោ ‘‘បដិបន្នកោ’’តិ វត្តព្ពោ, មគ្គេ ទិដ្ឋេ ន វត្តព្ពំ – ‘‘ផលេ ឋិតោតិ វត្តព្ពោ’’តិ? ន ហេវំ វត្តព្ពេ…បេ….

[សកវាទីបុច្ឆាលក្ខណំ] សោតាបត្តិផលសច្ឆិកិរិយាយ បដិបន្នោ បុគ្គលោ ទុក្ខំ ទក្ខន្តោ បដិបន្នកោតិ វត្តព្ពោ, ទុក្ខេ ទិដ្ឋេ ន វត្តព្ពំ – ‘‘ផលេ ឋិតោតិ វត្តព្ពោ’’តិ? អាមន្តា. និរត្ថិយំ ទុក្ខទស្សនន្តិ? ន ហេវំ វត្តព្ពេ…បេ… សមុទយំ ទក្ខន្តោ…បេ… និរោធំ ទក្ខន្តោ បដិបន្នកោតិ វត្តព្ពោ, និរោធេ ទិដ្ឋេ ន វត្តព្ពំ – ‘‘ផលេ ឋិតោតិ វត្តព្ពោ’’តិ? អាមន្តា. និរត្ថិយំ និរោធទស្សនន្តិ? ន ហេវំ វត្តព្ពេ…បេ….

៣៤៥. [បរវាទីបុច្ឆាលក្ខណំ] ទុក្ខេ ទិដ្ឋេ ចត្តារិ សច្ចានិ ទិដ្ឋានិ ហោន្តីតិ? អាមន្តា. ទុក្ខសច្ចំ ចត្តារិ សច្ចានីតិ? ន ហេវំ វត្តព្ពេ…បេ….

[សកវាទីបុច្ឆាលក្ខណំ] រូបក្ខន្ធេ អនិច្ចតោ ទិដ្ឋេ បញ្ចក្ខន្ធា អនិច្ចតោ ទិដ្ឋា ហោន្តីតិ? អាមន្តា. រូបក្ខន្ធោ បញ្ចក្ខន្ធាតិ? ន ហេវំ វត្តព្ពេ…បេ….

[សកវាទីបុច្ឆាលក្ខណំ] ចក្ខាយតនេ អនិច្ចតោ ទិដ្ឋេ ទ្វាទសាយតនានិ អនិច្ចតោ ទិដ្ឋានិ ហោន្តីតិ? អាមន្តា. ចក្ខាយតនំ ទ្វាទសាយតនានីតិ? ន ហេវំ វត្តព្ពេ…បេ….

[សកវាទីបុច្ឆាលក្ខណំ] ចក្ខុធាតុយា អនិច្ចតោ ទិដ្ឋាយ អដ្ឋារស ធាតុយោ អនិច្ចតោ ទិដ្ឋា ហោន្តីតិ? អាមន្តា. ចក្ខុធាតុ អដ្ឋារស ធាតុយោតិ? ន ហេវំ វត្តព្ពេ…បេ….

[សកវាទីបុច្ឆាលក្ខណំ] ចក្ខុន្ទ្រិយេ អនិច្ចតោ ទិដ្ឋេ ពាវីសតិន្ទ្រិយានិ អនិច្ចតោ ទិដ្ឋានិ ហោន្តីតិ? អាមន្តា. ចក្ខុន្ទ្រិយំ ពាវីសតិន្ទ្រិយានីតិ? ន ហេវំ វត្តព្ពេ…បេ….

[សកវាទីបុច្ឆាលក្ខណំ] ចតូហិ ញាណេហិ សោតាបត្តិផលំ សច្ឆិករោតីតិ? អាមន្តា. ចត្តារិ សោតាបត្តិផលានីតិ? ន ហេវំ វត្តព្ពេ…បេ… អដ្ឋហិ ញាណេហិ សោតាបត្តិផលំ សច្ឆិករោតីតិ? អាមន្តា. អដ្ឋ សោតាបត្តិផលានីតិ? ន ហេវំ វត្តព្ពេ…បេ… ទ្វាទសហិ ញាណេហិ សោតាបត្តិផលំ សច្ឆិករោតីតិ? អាមន្តា. ទ្វាទស សោតាបត្តិផលានីតិ? ន ហេវំ វត្តព្ពេ…បេ… ចតុចត្តារីសាយ ញាណេហិ សោតាបត្តិផលំ សច្ឆិករោតីតិ? អាមន្តា. ចតុចត្តារីសំ សោតាបត្តិផលានីតិ? ន ហេវំ វត្តព្ពេ…បេ… សត្តសត្តតិយា ញាណេហិ សោតាបត្តិផលំ សច្ឆិករោតីតិ? អាមន្តា. សត្តសត្តតិ សោតាបត្តិផលានីតិ? ន ហេវំ វត្តព្ពេ…បេ….

៣៤៦. ន វត្តព្ពំ – ‘‘អនុបុព្ពាភិសមយោ’’តិ? អាមន្តា. ននុ វុត្តំ ភគវតា – ‘‘សេយ្យថាបិ, ភិក្ខវេ, មហាសមុទ្ទោ អនុបុព្ពនិន្នោ អនុបុព្ពបោណោ អនុបុព្ពបព្ភារោ, ន អាយតកេនេវ បបាតោ; ឯវមេវ ខោ, ភិក្ខវេ, ឥមស្មិំ ធម្មវិនយេ អនុបុព្ពសិក្ខា អនុបុព្ពកិរិយា អនុបុព្ពបដិបទា, ន អាយតកេនេវ អញ្ញាបដិវេធោ’’តិ [ចូឡវ. ៣៨៥; អ. និ. ៨.២០; ឧទា. ៤៥ ឧទានេ ច]. អត្ថេវ សុត្តន្តោតិ? អាមន្តា. តេន ហិ អនុបុព្ពាភិសមយោតិ.

ន វត្តព្ពំ – ‘‘អនុបុព្ពាភិសមយោ’’តិ? អាមន្តា. ននុ វុត្តំ ភគវតា –

‘‘អនុបុព្ពេន មេធាវី, ថោកំ ថោកំ ខណេ ខណេ;

កម្មារោ រជតស្សេវ, និទ្ធមេ មលមត្តនោ’’តិ [ធ. ប. ២៣៩ ធម្មបទេ].

អត្ថេវ សុត្តន្តោតិ? អាមន្តា. តេន ហិ អនុបុព្ពាភិសមយោតិ.

អនុបុព្ពាភិសមយោតិ? អាមន្តា. នន្វាយស្មា គវម្បតិ ថេរោ ភិក្ខូ ឯតទវោច – ‘‘សម្មុខា មេតំ, អាវុសោ, ភគវតោ សុតំ សម្មុខា បដិគ្គហិតំ – ‘យោ, ភិក្ខវេ, ទុក្ខំ បស្សតិ ទុក្ខសមុទយម្បិ សោ បស្សតិ, ទុក្ខនិរោធម្បិ បស្សតិ, ទុក្ខនិរោធគាមិនិំ បដិបទម្បិ បស្សតិ; យោ ទុក្ខសមុទយំ បស្សតិ ទុក្ខម្បិ សោ បស្សតិ, ទុក្ខនិរោធម្បិ បស្សតិ, ទុក្ខនិរោធគាមិនិំ បដិបទម្បិ បស្សតិ; យោ ទុក្ខនិរោធំ បស្សតិ ទុក្ខម្បិ សោ បស្សតិ, ទុក្ខសមុទយម្បិ បស្សតិ, ទុក្ខនិរោធគាមិនិំ បដិបទម្បិ បស្សតិ; យោ ទុក្ខនិរោធគាមិនិំ បដិបទំ បស្សតិ ទុក្ខម្បិ សោ បស្សតិ, ទុក្ខសមុទយម្បិ បស្សតិ, ទុក្ខនិរោធម្បិ បស្សតី’’’តិ [សំ. និ. ៥.១១០០]! អត្ថេវ សុត្តន្តោតិ? អាមន្តា. តេន ហិ ន វត្តព្ពំ – ‘‘អនុបុព្ពាភិសមយោ’’តិ.

អនុបុព្ពាភិសមយោតិ? អាមន្តា. ននុ វុត្តំ ភគវតា –

‘‘សហាវស្ស ទស្សនសម្បទាយ,

តយស្សុ ធម្មា ជហិតា ភវន្តិ;

សក្កាយទិដ្ឋី វិចិកិច្ឆិតញ្ច,

សីលព្ពតំ វាបិ យទត្ថិ កិញ្ចិ;

ចតូហបាយេហិ ច វិប្បមុត្តោ,

ឆច្ចាភិឋានានិ អភព្ព កាតុ’’ន្តិ.

អត្ថេវ សុត្តន្តោតិ? អាមន្តា. តេន ហិ ន វត្តព្ពំ – ‘‘អនុបុព្ពាភិសមយោ’’តិ.

អនុបុព្ពាភិសមយោតិ? អាមន្តា. ននុ វុត្តំ ភគវតា – ‘‘យស្មិំ, ភិក្ខវេ, សមយេ អរិយសាវកស្ស វិរជំ វីតមលំ ធម្មចក្ខុំ ឧទបាទិ – ‘យំ កិញ្ចិ សមុទយធម្មំ សព្ពំ តំ និរោធធម្ម’ន្តិ, សហ ទស្សនុប្បាទា, ភិក្ខវេ, អរិយសាវកស្ស តីណិ សំយោជនានិ បហីយន្តិ – សក្កាយទិដ្ឋិ, វិចិកិច្ឆា, សីលព្ពតបរាមាសោ’’តិ! អត្ថេវ សុត្តន្តោតិ? អាមន្តា. តេន ហិ ន វត្តព្ពំ – ‘‘អនុបុព្ពាភិសមយោ’’តិ.

អនុបុព្ពាភិសមយកថា និដ្ឋិតា.