៦. ឆប្បច្ចយវិភាគ-ឆដ្ឋបរិច្ឆេទ

បត្ថារនយ

១២៩. បត្ថារេ សព្ពគេ បាទេ, បុព្ពគា’ធោ ល្ប’រេ សមា;

បុព្ពេ គរុ តេ ច មិមេ, កត្តព្ពា យាវ សព្ពលា.

នដ្ឋនយ

១៣០. នដ្ឋស្ស យោ ភវេយ្យ’ង្កោ, តស្មិំ លោ’ទ្ធិកតេ សមេ;

វិសមេ ត្វេ’កសហិតេ, ភវេយ្យ’ទ្ធិកតេ គរុ.

ឧទ្ទិដ្ឋនយ

១៣១. ឯកា’ទិនុក្កមេន’ង្កេ, បុព្ពាធោ ទ្វិគុណេ លិខេ;

មិស្សកេហិ លហុដ្ឋេហិ, សេ’កេហុ’ទ្ទិដ្ឋកំ ភវេ.

សព្ពគលក្រិយនយ

១៣២. វុត្ត’ក្ខរ សមា សង្ខ្យា, លិក្ខ្យ សេកោ’បរូ’បរិ;

ឯកេកហីន មេកាទិ, នុ’ដ្ឋានេ សព្ពគាទិកំ.

វុត្តសង្ខ្យានយ

១៣៣. គរុក្រិយា’ង្ក សន្ទោហេ, ភវេ សង្ខ្យា វិមិស្សិតេ;

ឧទ្ទិដ្ឋ’ង្ក សមាហារោ, សេ’កោ វេ’មំ សមា’នយេ.

វុត្តអទ្ធានយ

១៣៤. សង្ខ្យេវ ទ្វិគុណេ’កូនា, វិត្ថារា’យាមសម្ភវា;

វុត្តស្ស’ទ្ធ’ន្តរានញ្ច, គរុលានញ្ច អង្គុលំ.

ឥតិ វុត្តោទយេ ឆន្ទសិ ឆប្បច្ចយវិភាគោ នាម

ឆដ្ឋោ បរិច្ឆេទោ.

និគមន

១៣៥. សេល’ន្តរា’យតន វាសិក សីល’ត្ថេរ,

បាទោ គរុ គ្គុណគរុ ជ្ជយតំ មមេ’សោ;

យស្ស ប្បភាវ’មវលម្ព មយេ’ទិសោបិ,

សម្បាទិតោ’ភិមត សិទ្ធិករោ បរត្ថោ.

១៣៦. បរត្ថ សម្បាទនតោ, បុញ្ញេនា’ធិគតេន’ហំ;

បរត្ថ សម្បាទនកោ, ភវេយ្យំ ជាតិ ជាតិយំ.

១៣៧. អវលោកិត មត្តេន, យថា ឆប្បច្ចយា មយា;

សាធិតា សាធយន្តេ’វ, មិច្ឆិតត្ថម្បិ បាណិនោតិ.

ឥតិ សង្ឃរក្ខិតមហាសាមិត្ថេរេន វិរចិតំ

វុត្តោទយប្បករណំ បរិនិដ្ឋិតំ.