នមោ តស្ស ភគវតោ អរហតោ សម្មាសម្ពុទ្ធស្ស

វុត្តោទយំ

១. សញ្ញាបរិភាសានិទ្ទេស-បឋមបរិច្ឆេទ

រតនត្តយប្បណាម

១. នម’ត្ថុ ជន សន្តាន, តម សន្តាន ភេទិនោ;

ធម្មុ’ជ្ជលន្ត រុចិនោ, មុនិន្ទោ’ទាត រោចិនោ.

និមិត្ត

២. បិង្គលា’ចរិយាទីហិ, ឆន្ទំ យ មុទិតំ បុរា;

សុទ្ធមាគធិកានំ តំ, ន សាធេតិ យថិច្ឆិតំ [យ’ទិច្ឆិតំ យតិ’ច្ឆិតំ (ក.)].

គន្ថបរិមាណ

៣. តតោ មាគធភាសាយ, មត្តា,វណ្ណ,វិភេទនំ;

លក្ខ្យ លក្ខណ សំយុត្តំ, បសន្ន’ត្ថ,បទ,ក្កមំ.

អភិធានាទិ

៤. ឥទំ វុត្តោទយំ នាម, លោកិយ’ច្ឆន្ទនិស្សិតំ;

អារភិស្ស’មហំ ទានិ, តេសំ សុខវិពុទ្ធិយា.

គណសង្កេតសញ្ញា

៥. សព្ពគ្លា ម្នា,’ទិគលហូ, ភ្យា’,មជ្ឈ’ន្ត គរូ ជសា;

មជ្ឈ’ន្តលា រ,តេ’តេ’ដ្ឋ, គណា គោ គរុ,លោ លហុ.

គណនិយម

៦. ភ,ជ,សា សព្ពគ,លហូ, បញ្ចិ’មេ សណ្ឋិតា គណា;

អរិយាទិម្ហិ វិញ្ញេយ្យា, គណោ ឥធ ចតុ’ក្កលោ.

គរុ,លហុសរូប

៧. សំយោគា’ទិ ច, ទីឃោ ច, និគ្គហីតបរោ ច, យោ;

គរុ, វង្កោ, បាទន្តោ,វា, រស្សោ’ញ្ញោ មត្តិកោ លុ’ជុ.

៨. បរេ បាទាទិសំយោគេ, យោ បុព្ពោ គរុក’ក្ខរោ;

លហុ ស ក្វចិ វិញ្ញេយ្យោ, តទុទាហរណំ យថា.

៩. ទស្សនរសា’នុភាវនេ, និពទ្ធគេធា ជិនស្ស’យំ ជនតា;

វិម្ហយជននី សញ្ញត, ក្រិយា នុ កំ នា’នុរញ្ជយតិ.

១០. វិញ្ញេយ្យា លោកតោ សញ្ញា, សមុទ្ទោ,សុ,រសាទិនំ;

បាទោញេយ្យោ ចតុត្ថំ’សោ, បទច្ឆេទោ យតី ភវេ.

១១. សម,មឌ្ឍសមំ, វុត្តំ, វិសមំ ចា’បរំ តិធា;

សមា លក្ខណតោ បាទា, ចត្តារោ យស្ស តំ សមំ.

១២. យស្ស’ន្តិមេន ទុតិយោ, តតិយេនា’ទិមោ សមោ;

ត’ទឌ្ឍសម, មញ្ញំ តុ, ភិន្ន លក្ខណ បាទិកំ.

១៣. បាទ’មេកក្ខរា’រព្ភ, យាវ ឆព្ពីសត’ក្ខរា;

ភវេ បាទេហិ តំ ឆន្ទំ, នានានាមោ’ទិតំ តតោ.

១៤. ទណ្ឌកា ចណ្ឌវុដ្ឋ្យា’ទិ, បាទេហិ ឆហិ, តីហិ តុ;

‘គាថា’តិ ច បរត្ថេ’វំ, ឆន្ទោ សញ្ញា បកាសិតា.

១៥. អនន្តរោ’ទិតំ ច’ញ្ញ, មេតំ សាមញ្ញ នាមតោ;

‘គាថា’ឥច្ចេវ និទ្ទិដ្ឋំ, មុនិន្ទវចនេ បន.

១៦. វិសេសនាមតោ កិញ្ចិ, គហេត្វា សព្ពថោ’ចិតំ;

ទស្សយិស្សាម’ហំ តេ’ត្ថ, នាមានា’វិ ភវិស្សរេ.

ឥតិ វុត្តោទយេ ឆន្ទសិ សញ្ញាបរិភាសា និទ្ទេសោ នាម

បឋមោ បរិច្ឆេទោ.

២. មត្តាវុត្តិនិទ្ទេស-ទុតិយបរិច្ឆេទ

គណនិយម

១៧. ឆដ្ឋោ’ខិលលហុ,ជោ វា,

គយុតា’ញ្ញេ,ឆ’គ្គណា,ន ជោ វិសមេ,;

អរិយាយ’ន្តឌ្ឍេ លោ, ឆដ្ឋោ,’ន្តេ គោ,គណា ឆ’ញ្ញេ.

យតិនិយម

១៨. បឋមឌ្ឍេ ឆដ្ឋោ ចេ,

សព្ពលហេ,’ត្ថា’ទិលហុនិ ភវតិយតិ;

តប្បរកោ,ន្តេបិ, សចេ, ចរិមេបិ, ភវតិ ចតុត្ថោ’ន្តេ.

១៩. អរិយាសាមញ្ញំ ចេ, បុព្ពោ’ទិត លក្ខណំ ភវេ យស្សា.

២០. អាទិម’មថ បាទយុគំ, យស្សា ត្យំ’សេហិ សា បថ្យា.

២១. យត្ថ គណត្តយ មុល្លង្ឃិ,

យោ’ភយត្ថា’ទិមោ ភវេ វិបុលា.

២២. គរុមជ្ឈគោ ជការោ, ចតុត្ថកោ ទុតិយកោ ចបលា.

២៣. ចបលា’គតា’ខិលំ ចេ, ទលា’ទិមំ លក្ខណំ ភជតិ យស្សា;

បថ្យាលក្ខណ’មញ្ញំ, មុខចបលា នាម សា ភវតិ.

២៤. បថ្យាយ លក្ខណំ ចេ, បឋមឌ្ឍេ លក្ខណំ តុ ចបលាយ;

ទុតិយេ ទលេ’ថ យស្សា, បកិត្តិតា សា ជឃនចបលា.

អរិយាជាតិយោ.

២៥. សព្ពំបឋមទលេ យទិ, លក្ខណ’មរិយាយ វុត្ត’មុភយេសុ;

យស្សា ទលេសុ យុត្តំ,

វុត្តា សា គីតិ វុត្ត យតិ លលិតា.

២៦. អរិយាយំ ទុតិយ’ឌ្ឍេ, គទិតា’ខិលលក្ខណំ យំ តំ;

ភវតិ ទលេសុ’ភយេសុបិ,

យទិ យស្សា សា’យ មុបគីតិ.

២៧. អរិយាយ’ឌ្ឍទ្វិតយំ, បុព្ពោទិត លក្ខណោ’បេតំ;

វិបរិយយេនា’ភិហិតំ,

យស្សា សម្ភវតិ ចេ’ហ សោ’គ្គីតិ.

២៨. អរិយាបុព្ព’ឌ្ឍំ យទិ, គរុនេ’កេនា’ធិកេន និធនេ យុត្តំ;

យទិ បុព្ព’ឌ្ឍសមានំ, ទល មិតរំ ចោ’ទិតា’យ’មរិយាគីតិ.

គីតិជាតិយោ.

២៩. វិសមេ ឆ សិយុំ កលា មុខេ,

សមេ ត្វ’ដ្ឋ, រ,ល,គា, តតោ’បរិ;

វេតាលីយំ ត មុច្ចតេ, លហុ ឆក្កំ ន និរន្តរំ សមេ.

៣០. វេតាលីយោបមំ មុខេ តំ,

ឱបច្ឆន្ទសកំ រ,យា យ’ទន្តេ.

៣១. អាបាតលិកា កថិតា’យំ, ភគគា’ន្តេ យទិ បុព្ពមិវ’ញ្ញំ.

៣២. យទា’ទិតោ ទក្ខិណន្តិកា,

ឋិតេ’ត្ថ បាទេស្វា’ខិលេសុ ជោ.

៣៣. ‘ឧទិច្ចវុត្តី’តិ វុច្ចតេ,

ជោ ចា’ទោ វិសមេសុ សណ្ឋិតោ.

៣៤. បុព្ពត្ថ, សមេសុ ចេ គ, ជា, ‘បច្ចវុត្តិ’ រុទិតា’តិ សណ្ឋិតា.

៣៥. សមាសមា’ត្រា’ទិនំ សមា,

សំយុតា ភវតិ តំ បវត្តកំ.

៣៦. អស្ស សា សម កតា’ បរន្តិកា.

៣៧. តទ’ញ្ញជា ចារុហាសិនី.

វេតាលីយជាតិយោ.

៣៨. ទ្វិក វិហត វសុ លហុ អចលធិតិ រិ’ហ.

៣៩. មត្តាសមកំ នវមោ ល្គ’ន្តេ.

៤០. ជោ ន្លា’ ថវា’ណ្ណវា វិសិលោកោ.

៤១. តទ្វយតោ វានវាសិកា’ខ្យា.

៤២. បញ្ច,ដ្ឋ,នវសុ យទិ លោ ចិត្រា.

៤៣. គ,ល្យា’ដ្ឋហិ ចេ’សា វុ’បចិត្រា.

៤៤. យ’មតីត លក្ខណ វិសេស យុតំ, (ចិត្រា)

មត្តា សមា’ទិ បាទា’ភិហិតំ; (វិសិលោក)

អនិយត វុត្ត បរិមាណ សហិតំ, (វានវាសិកា)

បថិតំ ជនេសុ បាទាកុលកំ. (វិសិលោក)

មត្តាសមក ជាតិយោ.

៤៥. វិនា វណ្ណេហិ មត្តា គា, វិនា វណ្ណា គរូហិ តុ;

វិនា លហូហិ គរវោ, ទលេ បថ្យាទិនោ មតា.

ឥតិ វុត្តោទយេ ឆន្ទសិ មត្តាវុត្តិនិទ្ទេសោ នាម

ទុតិយោ បរិច្ឆេទោ.

៣. សមវុត្តិនិទ្ទេស-តតិយបរិច្ឆេទ

៤៦. ត្យា’ ចេ តនុមជ្ឈា.

គាយត្តី.

៤៧. កុមារ លលិតា ជ្ស្គា.

ឧណ្ហិកា.

៤៨. ចិត្របទា យទិ ភា គា.

៤៩. មោ មោ គោ គោ វិជ្ជុម្មាលា.

៥០. ភា ត, ល, គា មាណវកំ.

៥១. គ្លា សមានិកា រ,ជា ច.

៥២. បមាណិកា ជ, រា ល, គា.

អនុដ្ឋុភា.

៥៣. រា ន,សា យទិ ហលមុខី.

៥៤. ភុជគ សុសុ សដា នា មោ.

ព្រហតី.

៥៥. ម្សាជ្គា សុទ្ធវិរាជិតំ មតំ.

៥៦. ម្នា យោ គោ យទិ បណវោ ខ្យាតោ.

៥៧. ម្ភា ស,គយុត្តា រុម្មវតី សា.

៥៨. ញេយ្យា មត្តា ម, ភ, ស, គយុត្តា.

៥៩. ចម្បកមាលា ចេ ភ, ម, សា គោ [ឥទំ នាមន្តរញាបនត្ថមេវ បុន វុត្តំ (ដី.)].

៦០. ន, រ, ជ, គេហិ សា មនោរមា.

៦១. ឧព្ភាសកំ តំ ចេ តោ ម, រា ល្ច.

៦២. តោ ជា គរុនា’យ’មុបដ្ឋិតា.

បន្តិ.

៦៣. ឥន្ទាទិកា តា វជិរា ជ, គា គោ.

៦៤. ឧបាទិកា សា’វ ជ,តា ជ,គា គោ.

៦៥. អនន្តរោ’ទីរិត លក្ខណា ចេ, (ឧបេន្ទវជិរ)

បាទា វិមិស្សា ឧបជាតិយោ តា; (ឥន្ទវជិរ)

ឯវំ កិល’ញ្ញាសុបិ មិស្សិតាសុ, (ឥន្ទវជិរ)

វទន្តិ ជាតិស្វិទ’ មេវ នាមំ. (ឧបេន្ទវជិរ)

៦៦. ន, ជ, ជ, ល, គា គទិតា សុមុខី.

៦៧. ទោធក មិច្ឆតិ ចេ ភ,ភ,ភា គា.

៦៨. វេទ,ស្សេហិ,ធ្តា ត្គគា,សាលិនី សា.

៦៩. វាតោម្មី សា, យតិ សា ម្ភា ត, គា គោ.

៧០. ភា ត, ន, គា គោ’សុ, រស សិរី សា.

៧១. រោ ន, រា ឥហ រថោទ្ធតា ល, គា.

៧២. ស្វាគតេ’តិ រ, ន, ភា គរុកា ទ្វេ.

៧៣. ន,ន,រ,លហុ,គរូហិ ភទ្ទិកា.

តិដ្ឋុភា.

៧៤. វទន្តិ វំសដ្ឋមិ’ទំ ជ, តា ជ, រា.

៧៥. សា ឥន្ទវំសា ខលុ យត្ថ តា ជ,រា.

៧៦. ឥធ តោដក មម្ពុធិ,សេហិ មិតំ.

៧៧. ទុតវិលម្ពិត មាហ ន, ភា ភ,រា.

៧៨. វសុ យុគ វិរតី នា,ម្យា’ បុដោ’យំ.

៧៩. ន, យ, សហិតា ន្យា’ កុសុមវិចិត្តា.