តតិយមគ្គញាណកថាវណ្ណនា

៨១៤. សកិទេវាតិ ឯកវារំយេវ. ‘‘ឥមំ លោកំ អាគន្ត្វា’’តិ ឥមិនា បញ្ចសុ សកទាគាមីសុ ចត្តារោ វជ្ជេត្វា ឯកោវ គហិតោ. ឯកច្ចោ ឥធ សកទាគាមិផលំ បត្វា ឥធេវ លោកេ បរិនិព្ពាតិ, ឯកច្ចោ ឥធ បត្វា ទេវលោកេ បរិនិព្ពាតិ, ឯកច្ចោ ទេវលោកេ បត្វា តត្ថេវ បរិនិព្ពាតិ, ឯកច្ចោ ទេវលោកេ បត្វា ឥធូបបជ្ជិត្វា បរិនិព្ពាតិ. ឥមេ ចត្តារោបិ ឥធ ន គហិតា. យោ បន ឥធ បត្វា ទេវលោកេ យាវតាយុកំ វសិត្វា បុន ឥធូបបជ្ជិត្វា បរិនិព្ពាតិ, អយំ ឯកោវ ឥធ គហិតោតិ វេទិតព្ពោ.

កាមរាគព្យាបាទានំ អនវសេសប្បហានាយាតិ តេសំយេវ សកទាគាមិមគ្គេន តនុកតានំ សំយោជនានំ និរវសេសប្បហានាយ. បដិសន្ធិវសេន កាមភវស្ស អនាគមនតោ អនាគាមី.

តតិយញាណំ និដ្ឋិតំ.