៤. សបទានចារិកង្គកថាវណ្ណនា

២៧. ឥមិនាតិ សបទានចារិកេន. កាលតរន្តិ កាលស្សេវ. អផាសុកដ្ឋានន្តិ សបរិស្សយាទិវសេន ទុប្បវេសនដ្ឋានំ. បុរតោតិ វីថិយំ គច្ឆន្តស្ស បុរតោ ឃរំ អបវិដ្ឋស្សេវ. បត្តវិស្សដ្ឋដ្ឋានន្តិ បេសការវីថិយំ បេសការភាវំ និម្មិនិត្វា ឋិតស្ស សក្កស្ស ឃរទ្វារេ បត្តវិស្សដ្ឋដ្ឋានំ. ឧក្កដ្ឋបិណ្ឌបាតិកោ តំ ទិវសំ ន ភិក្ខំ អាគមយមានោ និសីទតិ, តស្មា តំ អនុលោមេតិ. កត្ថចិបិ កុលេ និពទ្ធំ ឧបសង្កមនាភាវតោ បរិចយាភាវេន កុលេសុ និច្ចនវកតា. សព្ពត្ថ អលគ្គមានសតាយ ច សោម្មភាវេន ច ចន្ទូបមតា. កុលេសុ បរិគ្គហចិត្តាភាវេន តត្ថ មច្ឆេរប្បហានំ. ហិតេសិតាយ វិភាគាភាវតោ សមានុកម្បិតា. កុលានំ សង្គណ្ហនសំសដ្ឋតាទយោ កុលូបកាទីនវា. អវ្ហានានភិនន្ទនាតិ និមន្តនវសេន អវ្ហានស្ស អសម្បដិច្ឆនា. អភិហារេនាតិ ភិក្ខាភិហារេន. សេរិចារន្តិ យថារុចិ វិចរណំ.

ឥតិ សបទានចារិកង្គកថាវណ្ណនា.