៤. សីលានុស្សតិកថា

១៥៨. សីលានុស្សតិំ ភាវេតុកាមេន បន រហោគតេន បដិសល្លីនេន ‘‘អហោ វត មេ សីលានិ អខណ្ឌានិ អច្ឆិទ្ទានិ អសពលានិ អកម្មាសានិ ភុជិស្សានិ វិញ្ញុប្បសត្ថានិ អបរាមដ្ឋានិ សមាធិសំវត្តនិកានី’’តិ (អ. និ. ៦.១០) ឯវំ អខណ្ឌតាទិគុណវសេន អត្តនោ សីលានិ អនុស្សរិតព្ពានិ. តានិ ច គហដ្ឋេន គហដ្ឋសីលានិ, បព្ពជិតេន បព្ពជិតសីលានិ.

គហដ្ឋសីលានិ វា ហោន្តុ បព្ពជិតសីលានិ វា, យេសំ អាទិម្ហិ វា អន្តេ វា ឯកម្បិ ន ភិន្នំ, តានិ បរិយន្តេ ឆិន្នសាដកោ វិយ ន ខណ្ឌានីតិ អខណ្ឌានិ. យេសំ វេមជ្ឈេ ឯកម្បិ ន ភិន្នំ, តានិ មជ្ឈេ វិនិវិទ្ធសាដកោ វិយ ន ឆិទ្ទានីតិ អច្ឆិទ្ទានិ. យេសំ បដិបាដិយា ទ្វេ វា តីណិ វា ន ភិន្នានិ, តានិ បិដ្ឋិយា វា កុច្ឆិយា វា ឧដ្ឋិតេន ទីឃវដ្ដាទិសណ្ឋានេន វិសភាគវណ្ណេន កាឡរត្តាទីនំ អញ្ញតរសរីរវណ្ណា គាវី វិយ ន សពលានីតិ អសពលានិ. យានិ អន្តរន្តរា ន ភិន្នានិ, តានិ វិសភាគពិន្ទុវិចិត្រា គាវី វិយ ន កម្មាសានីតិ អកម្មាសានិ. អវិសេសេន វា សព្ពានិបិ សត្តវិធេន មេថុនសំយោគេន កោធុបនាហាទីហិ ច បាបធម្មេហិ អនុបហតត្តា អខណ្ឌានិ អច្ឆិទ្ទានិ អសពលានិ អកម្មាសានិ. តានិយេវ តណ្ហាទាសព្យតោ មោចេត្វា ភុជិស្សភាវករណេន ភុជិស្សានិ. ពុទ្ធាទីហិ វិញ្ញូហិ បសត្ថត្តា វិញ្ញុប្បសត្ថានិ. តណ្ហាទិដ្ឋីហិ អបរាមដ្ឋតាយ កេនចិ វា អយំ តេ សីលេសុ ទោសោតិ ឯវំ បរាមដ្ឋុំ អសក្កុណេយ្យតាយ អបរាមដ្ឋានិ. ឧបចារសមាធិំ អប្បនាសមាធិំ វា, អថ វា បន មគ្គសមាធិំ ផលសមាធិញ្ចាបិ សំវត្តេន្តីតិ សមាធិសំវត្តនិកានិ.

១៥៩. ឯវំ អខណ្ឌតាទិគុណវសេន អត្តនោ សីលានិ អនុស្សរតោ នេវស្ស តស្មិំ សមយេ រាគបរិយុដ្ឋិតំ ចិត្តំ ហោតិ. ន ទោស…បេ… ន មោហបរិយុដ្ឋិតំ ចិត្តំ ហោតិ. ឧជុគតមេវស្ស តស្មិំ សមយេ ចិត្តំ ហោតិ, សីលំ អារព្ភាតិ បុរិមនយេនេវ វិក្ខម្ភិតនីវរណស្ស ឯកក្ខណេ ឈានង្គានិ ឧប្បជ្ជន្តិ. សីលគុណានំ បន គម្ភីរតាយ នានប្បការគុណានុស្សរណាធិមុត្តតាយ វា អប្បនំ អប្បត្វា ឧបចារប្បត្តមេវ ឈានំ ហោតិ. តទេតំ សីលគុណានុស្សរណវសេន ឧប្បន្នត្តា សីលានុស្សតិច្ចេវ សង្ខំ គច្ឆតិ.

ឥមញ្ច បន សីលានុស្សតិំ អនុយុត្តោ ភិក្ខុ សិក្ខាយ សគារវោ ហោតិ សភាគវុត្តិ, បដិសន្ថារេ អប្បមត្តោ, អត្តានុវាទាទិភយវិរហិតោ, អណុមត្តេសុ វជ្ជេសុ ភយទស្សាវី, សទ្ធាទិវេបុល្លំ អធិគច្ឆតិ, បីតិបាមោជ្ជពហុលោ ហោតិ. ឧត្តរិ អប្បដិវិជ្ឈន្តោ បន សុគតិបរាយនោ ហោតិ.

តស្មា ហវេ អប្បមាទំ, កយិរាថ សុមេធសោ;

ឯវំ មហានុភាវាយ, សីលានុស្សតិយា សទាតិ.

ឥទំ សីលានុស្សតិយំ វិត្ថារកថាមុខំ.