៦. បត្តបិណ្ឌិកង្គកថា

២៩. បត្តបិណ្ឌិកង្គម្បិ ‘‘ទុតិយកភាជនំ បដិក្ខិបាមិ, បត្តបិណ្ឌិកង្គំ សមាទិយាមី’’តិ ឥមេសំ អញ្ញតរវចនេន សមាទិន្នំ ហោតិ.

តេន បន បត្តបិណ្ឌិកេន យាគុបានកាលេ ភាជនេ ឋបេត្វា ព្យញ្ជនេ លទ្ធេ ព្យញ្ជនំ វា បឋមំ ខាទិតព្ពំ, យាគុ វា បាតព្ពា. សចេ បន យាគុយំ បក្ខិបតិ, បូតិមច្ឆកាទិម្ហិ ព្យញ្ជនេ បក្ខិត្តេ យាគុ បដិកូលា ហោតិ, អប្បដិកូលមេវ ច កត្វា ភុញ្ជិតុំ វដ្ដតិ. តស្មា តថារូបំ ព្យញ្ជនំ សន្ធាយ ឥទំ វុត្តំ. យំ បន មធុសក្ករាទិកំ អប្បដិកូលំ ហោតិ, តំ បក្ខិបិតព្ពំ. គណ្ហន្តេន ច បមាណយុត្តមេវ គណ្ហិតព្ពំ. អាមកសាកំ ហត្ថេន គហេត្វា ខាទិតុំ វដ្ដតិ. តថា បន អកត្វា បត្តេយេវ បក្ខិបិតព្ពំ. ទុតិយកភាជនស្ស បន បដិក្ខិត្តត្តា អញ្ញំ រុក្ខបណ្ណម្បិ ន វដ្ដតីតិ ឥទមស្ស វិធានំ.

បភេទតោ បន អយម្បិ តិវិធោ ហោតិ. តត្ថ ឧក្កដ្ឋស្ស អញ្ញត្រ ឧច្ឆុខាទនកាលា កចវរម្បិ ឆឌ្ឌេតុំ ន វដ្ដតិ. ឱទនបិណ្ឌមច្ឆមំសបូវេបិ ភិន្ទិត្វា ខាទិតុំ ន វដ្ដតិ. មជ្ឈិមស្ស ឯកេន ហត្ថេន ភិន្ទិត្វា ខាទិតុំ វដ្ដតិ, ហត្ថយោគី នាមេស. មុទុកោ បន បត្តយោគី នាម ហោតិ, តស្ស យំ សក្កា ហោតិ បត្តេ បក្ខិបិតុំ, តំ សព្ពំ ហត្ថេន វា ទន្តេហិ វា ភិន្ទិត្វា ខាទិតុំ វដ្ដតិ.

ឥមេសំ បន តិណ្ណម្បិ ទុតិយកភាជនំ សាទិតក្ខណេ ធុតង្គំ ភិជ្ជតិ. អយមេត្ថ ភេទោ.

អយំ បនានិសំសោ, នានារសតណ្ហាវិនោទនំ. អត្រិច្ឆតាយ បហានំ, អាហារេ បយោជនមត្តទស្សិតា, ថាលកាទិបរិហរណខេទាភាវោ, អវិក្ខិត្តភោជិតា, អប្បិច្ឆតាទីនំ អនុលោមវុត្តិតាតិ.

នានាភាជនវិក្ខេបំ, ហិត្វា ឱក្ខិត្តលោចនោ;

ខណន្តោ វិយ មូលានិ, រសតណ្ហាយ សុព្ពតោ.

សរូបំ វិយ សន្តុដ្ឋិំ, ធារយន្តោ សុមានសោ;

បរិភុញ្ជេយ្យ អាហារំ, កោ អញ្ញោ បត្តបិណ្ឌិកោតិ.

អយំ បត្តបិណ្ឌិកង្គេ សមាទានវិធានប្បភេទភេទានិសំសវណ្ណនា.