៤. សបទានចារិកង្គកថា

២៧. សបទានចារិកង្គម្បិ ‘‘លោលុប្បចារំ បដិក្ខិបាមិ, សបទានចារិកង្គំ សមាទិយាមី’’តិ ឥមេសំ អញ្ញតរវចនេន សមាទិន្នំ ហោតិ.

តេន បន សបទានចារិកេន គាមទ្វារេ ឋត្វា បរិស្សយាភាវោ សល្លក្ខេតព្ពោ. យស្សា រច្ឆាយ វា គាមេ វា បរិស្សយោ ហោតិ, តំ បហាយ អញ្ញត្ថ ចរិតុំ វដ្ដតិ. យស្មិំ ឃរទ្វារេ វា រច្ឆាយ វា គាមេ វា កិញ្ចិ ន លភតិ, អគាមសញ្ញំ កត្វា គន្តព្ពំ. យត្ថ កិញ្ចិ លភតិ, តំ បហាយ គន្តុំ ន វដ្ដតិ. ឥមិនា ច ភិក្ខុនា កាលតរំ បវិសិតព្ពំ, ឯវញ្ហិ អផាសុកដ្ឋានំ បហាយ អញ្ញត្ថ គន្តុំ សក្ខិស្សតិ. សចេ បនស្ស វិហារេ ទានំ ទេន្តា អន្តរាមគ្គេ វា អាគច្ឆន្តា មនុស្សា បត្តំ គហេត្វា បិណ្ឌបាតំ ទេន្តិ វដ្ដតិ. ឥមិនា ច មគ្គំ គច្ឆន្តេនាបិ ភិក្ខាចារវេលាយំ សម្បត្តគាមំ អនតិក្កមិត្វា ចរិតព្ពមេវ. តត្ថ អលភិត្វា វា ថោកំ លភិត្វា វា គាមបដិបាដិយា ចរិតព្ពន្តិ ឥទមស្ស វិធានំ.

បភេទតោ បន អយម្បិ តិវិធោ ហោតិ. តត្ថ ឧក្កដ្ឋោ បុរតោ អាហដភិក្ខម្បិ បច្ឆតោ អាហដភិក្ខម្បិ បដិក្កមនំ អាហរិត្វា ទិយ្យមានម្បិ ន គណ្ហតិ, បត្តទ្វារេ បន បត្តំ វិស្សជ្ជេតិ. ឥមស្មិញ្ហិ ធុតង្គេ មហាកស្សបត្ថេរេន សទិសោ នាម នត្ថិ. តស្សបិ បត្តវិស្សដ្ឋដ្ឋានមេវ បញ្ញាយតិ. មជ្ឈិមោ បុរតោ វា បច្ឆតោ វា អាហដម្បិ បដិក្កមនំ អាហដម្បិ គណ្ហតិ, បត្តទ្វារេបិ បត្តំ វិស្សជ្ជេតិ, ន បន ភិក្ខំ អាគមយមានោ និសីទតិ. ឯវំ សោ ឧក្កដ្ឋបិណ្ឌបាតិកស្ស អនុលោមេតិ. មុទុកោ តំ ទិវសំ និសីទិត្វា អាគមេតិ.

ឥមេសំ បន តិណ្ណម្បិ លោលុប្បចារេ ឧប្បន្នមត្តេ ធុតង្គំ ភិជ្ជតិ. អយមេត្ថ ភេទោ.

អយំ បនានិសំសោ, កុលេសុ និច្ចនវកតា, ចន្ទូបមតា, កុលមច្ឆេរប្បហានំ, សមានុកម្បិតា, កុលូបកាទីនវាភាវោ, អវ្ហានានភិនន្ទនា, អភិហារេន អនត្ថិកតា, អប្បិច្ឆតាទីនំ អនុលោមវុត្តិតាតិ.

ចន្ទូបមោ និច្ចនវោ កុលេសុ,

អមច្ឆរី សព្ពសមានុកម្បោ;

កុលូបកាទីនវវិប្បមុត្តោ,

ហោតីធ ភិក្ខុ សបទានចារី.

លោលុប្បចារញ្ច បហាយ តស្មា,

ឱក្ខិត្តចក្ខុ យុគមត្តទស្សី;

អាកង្ខមានោ ភុវិ សេរិចារំ,

ចរេយ្យ ធីរោ សបទានចារន្តិ.

អយំ សបទានចារិកង្គេ សមាទានវិធានប្បភេទភេទានិសំសវណ្ណនា.