១០. អព្ភោកាសិកង្គកថា

៣៣. អព្ភោកាសិកង្គម្បិ ‘‘ឆន្នញ្ច រុក្ខមូលញ្ច បដិក្ខិបាមិ, អព្ភោកាសិកង្គំ សមាទិយាមី’’តិ ឥមេសំ អញ្ញតរវចនេន សមាទិន្នំ ហោតិ.

តស្ស បន អព្ភោកាសិកស្ស ធម្មស្សវនាយ វា ឧបោសថត្ថាយ វា ឧបោសថាគារំ បវិសិតុំ វដ្ដតិ. សចេ បវិដ្ឋស្ស ទេវោ វស្សតិ, ទេវេ វស្សមានេ អនិក្ខមិត្វា វស្សូបរមេ និក្ខមិតព្ពំ. ភោជនសាលំ វា អគ្គិសាលំ វា បវិសិត្វា វត្តំ កាតុំ, ភោជនសាលាយ ថេរេ ភិក្ខូ ភត្តេន អាបុច្ឆិតុំ, ឧទ្ទិសន្តេន វា ឧទ្ទិសាបេន្តេន វា ឆន្នំ បវិសិតុំ, ពហិ ទុន្និក្ខិត្តានិ មញ្ចបីឋាទីនិ អន្តោ បវេសេតុញ្ច វដ្ដតិ. សចេ មគ្គំ គច្ឆន្តេន វុឌ្ឍតរានំ បរិក្ខារោ គហិតោ ហោតិ, ទេវេ វស្សន្តេ មគ្គមជ្ឈេ ឋិតំ សាលំ បវិសិតុំ វដ្ដតិ. សចេ ន កិញ្ចិ គហិតំ ហោតិ, សាលាយ ឋស្សាមីតិ វេគេន គន្តុំ ន វដ្ដតិ. បកតិគតិយា គន្ត្វា បវិដ្ឋេន បន យាវ វស្សូបរមា ឋត្វា គន្តព្ពន្តិ ឥទមស្ស វិធានំ. រុក្ខមូលិកស្សាបិ ឯសេវ នយោ.

បភេទតោ បន អយម្បិ តិវិធោ ហោតិ. តត្ថ ឧក្កដ្ឋស្ស រុក្ខំ វា បព្ពតំ វា គេហំ វា ឧបនិស្សាយ វសិតុំ ន វដ្ដតិ. អព្ភោកាសេយេវ ចីវរកុដិំ កត្វា វសិតព្ពំ. មជ្ឈិមស្ស រុក្ខបព្ពតគេហានិ ឧបនិស្សាយ អន្តោ អប្បវិសិត្វា វសិតុំ វដ្ដតិ. មុទុកស្ស អច្ឆន្នមរិយាទំ បព្ភារម្បិ សាខាមណ្ឌបោបិ បីឋបដោបិ ខេត្តរក្ខកាទីហិ ឆឌ្ឌិតា តត្រដ្ឋកកុដិកាបិ វដ្ដតីតិ.

ឥមេសំ បន តិណ្ណម្បិ វាសត្ថាយ ឆន្នំ វា រុក្ខមូលំ វា បវិដ្ឋក្ខណេ ធុតង្គំ ភិជ្ជតិ. ជានិត្វា តត្ថ អរុណំ ឧដ្ឋាបិតមត្តេតិ អង្គុត្តរភាណកា. អយមេត្ថ ភេទោ.

អយំ បនានិសំសោ, អាវាសបលិពោធុបច្ឆេទោ, ថិនមិទ្ធបនូទនំ, ‘‘មិគា វិយ អសង្គចារិនោ, អនិកេតា វិហរន្តិ ភិក្ខវោ’’តិ (សំ. និ. ១.២២៤) បសំសាយ អនុរូបតា, និស្សង្គតា, ចាតុទ្ទិសតា, អប្បិច្ឆតាទីនំ អនុលោមវុត្តិតាតិ.

អនគារិយភាវស្ស, អនុរូបេ អទុល្លភេ;

តារាមណិវិតានម្ហិ, ចន្ទទីបប្បភាសិតេ.

អព្ភោកាសេ វសំ ភិក្ខុ, មិគភូតេន ចេតសា;

ថិនមិទ្ធំ វិនោទេត្វា, ភាវនារាមតំ សិតោ.

បវិវេករសស្សាទំ, នចិរស្សេវ វិន្ទតិ;

យស្មា តស្មា ហិ សប្បញ្ញោ, អព្ភោកាសរតោ សិយាតិ.

អយំ អព្ភោកាសិកង្គេ សមាទានវិធានប្បភេទភេទានិសំសវណ្ណនា.