៣៧. បុត្តវត្ថុម្ហិ អយមានុបុព្ពីកថា

ឯកស្មិំ កិរ សមយេ លង្កាទីបវាសិនោ សដ្ឋិមត្តា ភិក្ខូ ជយមហាពោធិំ វន្ទិតុកាមា ឯកតោ មន្តេត្វា មហាតិត្ថេន នាវំ អារុយ្ហ ជម្ពុទីបំ បត្វា តាមលិត្តិបដ្ឋេនេ [តមលិត្តបដ្ដនេ ឥតិកត្ថចិ] ឱតរិត្វា អនុក្កមេន បាដលិបុត្តនគរំ បាបុណិំសុ. អថ តស្មិំ នគរេ បិណ្ឌាយ ចរន្តេ តេ ភិក្ខូ ឯកោ ទុគ្គតមនុស្សោ ទិស្វា ចិរេន [ចិរេនាហំទិដ្ឋា ឥតិសព្ពត្ថ] មយា ទិដ្ឋា ពុទ្ធបុត្តាតិ សោមនស្សោ ភរិយំ បក្កោសិត្វា ភទ្ទេ ឥមេសំ អយ្យានំ ទានំ ទាតុកាមោម្ហិ, បុព្ពេ នោ អកតបុញ្ញត្តា ឥទានិ ទុគ្គតា ជាតា, ឥមេសុ បុញ្ញក្ខេត្តេសុ ពីជំ នោ ចេ រោបេស្សាម, បុនបិ ឯវមេវ ភវិស្សាមាតិ វត្វា កិំ មេ គេហេ ទេយ្យធម្មំ អត្ថីតិ បុច្ឆិ. សា តំ សុត្វា ឃរេ នោ សាមិ អយ្យានំ កិញ្ចិ ទាតព្ពំ ន បស្សាមិ. អបិ ច មម បុត្តំ មារេត្វា ទានំ ទាតុំ សក្កាតិ. សោ តស្សា កថំ សុត្វា ភទ្ទេ បុត្តំ មារេត្វា កិំ ទានំ ទេមាតិ អាហ. តាយ តំ សុត្វា សាមិ កិំ ន ជានាសិ, បុត្តេ នោ មតេ សន្ទិដ្ឋសម្ភត្តា ញាតិមិត្តសុហជ្ជា ច អម្ហាកំ សន្តិកំ អាគច្ឆាន្តា កិញ្ចិ បណ្ណាការំ គហេត្វា អាគច្ឆន្តិ. មយំ តេន បណ្ណាការេន ទានំ ទស្សាមាតិ វុត្តេ ឧបាសកោ សាធុ តថា ករោហីតិ មាតុយា ឯវ ភារមកាសិ, សា បុត្តំ មារេតុំ អវិសហន្តី អាហ. តថា ហិ.

១. កិច្ឆា លទ្ធំ បិយំ បុត្តំ, អម្មម្មាតិ បិយំ វទំ;

សុនីលនេត្តំ សុភមុំ, កោ បក្កមិតុមិច្ឆតិ.

២. មាតរា មារិយន្តោបិ, មាតរមេវ រោទតិ;

មារេតុំ តំ ន សក្កោមិ, ហទយំ មេ បវេធតីតិ.

ឯវញ្ច បន វត្វា អហំ សាមិ ន សក្កោមិ បុត្តំ មារេតុំ. ត្វំ មារេហីតិ បុត្តំ បិតុសន្តិកំ បេសេសិ. អថ សោបិ តំ មារេតុ មសក្កោន្តោ ឯវមាហ. វុត្តញ្ហិ.

៣. តាយន្តិ បិតុនោ ទុក្ខំ, បុត្តា បុត្តាតិ កិត្តិតា;

បិតុ ទុក្ខំ សុខំ បុត្តា, ទាយាទា ហោន្តិ សព្ពទា.

៤. តស្មា មេ សទិសំ បុត្តំ, បិល្លកំ មញ្ជុភាសនំ;

ន សក្កោមិ អហំ ភទ្ទេ, ជីវិតា តំ វិយោជិតុំ.

៥. អយសញ្ច អកិត្តិញ្ច, បប្បោតិ បុត្តឃាតកោ;

បាណាតិបាតកម្មម្បិ, កាមំ សោ ផុសតេ នរោតិ.

ឯវញ្ច បន វត្វា សោ ត្វមេវ តវ បុត្តំ មារេហីតិ បេសេសិ, ឯវំ តេន វុត្តេ បុត្ថស្ស មារបាណូបាយំ បរិយេសន្តា ឯវមាហំសុ, អម្ហេ បនិមំ មារេតុំ ន សក្កោមិ, អម្ហាកំ បច្ឆាគេហេ មហន្តោ វម្មិកោ អត្ថិ, តស្មិំ ឯកោ នាគរាជា បដិវសតិ. កុមារំ តត្ថ បេសេស្សាម, សោ តំ ឌសិត្វា មារេស្សតីតិ. ឥច្ចេតេ ឯសោ ខោ ឧបាយោ ឯវាតិ ចិន្តេត្វា កុមារំ បក្កោសិត្វា អញ្ចនា វលិវលយាទីហិ មណ្ឌេត្វា តស្ស ហត្ថេ គេណ្ឌុំ [តេណ្ឌុំ ឥតិសព្ពត្ថ] ឋបេត្វា តាត បច្ឆាគេហេ វម្មិកសមីបំ គន្ត្វា កីឡាតិ បេសេសុំ. តតោ ទារកោ គន្ត្វា គេណ្ឌុកេន កីឡន្តោ វម្មិកពិលេ គេណ្ឌុកំ បាតេសិ. អថ សោ គេណ្ឌុកំ គណ្ហិស្សាមីតិ វម្មិកសុសិរេ ហត្ថំ បវេសេសិ. តតោ សប្បោ កុជ្ឈិត្វា សុសូតិសទ្ទំ ករោន្តោ មហន្តំ ផណំ កត្វា ពិលតោ សីសំ ឧក្ខិបិត្វា ឱលោកេន្តោ អដ្ឋាសិ កុមារស្ស ហត្ថតោ បរិគលិតបាសំវិយ. អថស្ស កុមារោ កិញ្ចិ អជានន្តោ សប្បស្ស គីវំ ទឡ្ហំ គណ្ហិ. អថស្ស មាតាបិតុន្នំ សទ្ធាពលេន នាគរាជា កុមារស្ស ករតលេ អដ្ឋំសំ ឥច្ឆាទាយកំ កណ្ឋមណិរតនំ បាតេសិ. កុមារស្ស មាតាបិតរោ ទ្វារំ និស្សាយ ឋិតា តស្ស កិរិយំ ឱលោកេន្តោ តំ មណិរតនំ ទិស្វា សីឃំ គន្ត្វា បុត្តំ ឧក្ខិបិត្វា ហត្ថតោ មណិរតនំ គណ្ហិំសុ. តតោ តេ តំ មណិរតនំ បរិសុទ្ធាសនេ ឋបេត្វា ឧបចារំ កត្វា អម្ហាកំ ឥទញ្ចិទញ្ច ទេថាតិ អព្ភុក្កិរិំសុ. អថ តេ មណិរតនានុភាវេន គេហទ្វារេ មហន្តំ មណ្ឌបំ ការេត្វា វិតានាទិនា មណ្ឌបំ អលង្ករិត្វា ភិក្ខូនំ អាសនានិ បញ្ញាបេត្វា តេ សដ្ឋិមត្តេ ភិក្ខូ និសីទាបេត្វា មហាទានំ អទំសុ. តតោ នគរវាសិនោ មណិរតនានុភាវំ សុត្វា សន្និបតិំសុ. អថ តេ តេសំ មជ្ឈេ អត្តនោ សទ្ធាពលេន មណិរតនស្ស លាភំ បកាសេត្វា ឥមញ្ហិ ទានត្ថាយេវ បរិច្ចជ្ជាមាតិ ឯកស្មិំ ឋានេ បតិដ្ឋាបេត្វា តេនានុភាវេន យាវជីវំ ទានំ ទទន្តា សីលំ រក្ខន្តា អាយុបរិយោសានេ ទេវលោកេ និព្ពត្តិំសូតិ.

៦. ឆេត្វាន បេមំ អបិ អត្រជេសុ,

ទទន្តិ ទានំ ឥធ មានុសេវំ;

ន ទទាតិ កោ នាម នរោ សមិទ្ធោ,

ទានញ្ហិ ទានស្ស ផលំ សរន្តោតិ.

បុត្តវត្ថុំ សត្តមំ.