៣៤. ឥន្ទគុត្តត្ថេរស្ស វត្ថុម្ហិ អយមានុបុព្ពីកថា

អម្ហាកំ ភគវតោ បរិនិព្ពាណតោ ឱរភាគេ ជម្ពុទីបេ កិរ បាដលិបុត្តំ នាម នគរំ អហោសិ. តត្ថ ធម្មាសោកោ នាម មហិទ្ធិកោ មហានុភាវោ អាណាចក្កវត្តិ រាជា រជ្ជំ ការេតិ. ឧទ្ធំ អាកាសតោ ហេដ្ឋា បថវិយា យោជនប្បមាណេ សកលជម្ពូទីបេ តស្ស អាណា បវត្តតិ, តទា សកលជម្ពុទីបវាសិនោ ច ចតុរាសីតិ នគរសហស្សេ រាជានោ ច អត្តនោ អត្តនោ ពលវាហនេ គហេត្វា អាគម្ម ធម្មាសោកមហារញ្ញោ ឧបដ្ឋានំ ករោន្តិ. តស្មិំ សមយេ ទេវបុត្តនគរេ ទេវបុត្តោ នាម មហារាជា អត្តនោ ពលវាហនំ គហេត្វា រញ្ញោ ឧបដ្ឋានំ អគមាសិ. ធម្មាសោកោ ទេវបុត្តមហារាជានំ ទិស្វា មធុរបដិសន្ថារំ កត្វា តុម្ហាកំ រដ្ឋេ ពហុស្សុតា អាគតាគមា មហាគុណវន្តា អយ្យា អត្ថីតិ បុច្ឆិ. តំ សុត្វា ទេវបុត្តរាជា អត្ថិ ទេវ តស្មិំ នគរេ សីហកុម្ភកំ នាម មហាវិហារំ. តត្ថ អនេកសហស្សភិក្ខូ វិហរន្តិ សីលវន្តា អប្បិច្ឆា សន្តុដ្ឋា វិវេកកាមិនោ. តេសុ សាដ្ឋកថាតិបិដកធរោ ឥន្ទគុត្តត្ថេរោ នាម តេសំ បាមោក្ខោ អហោសិ. សោ អនេកបរិយាយេន សនរាមរានំ ភិក្ខូនំ ធម្មំវណ្ណេតិ. គុណវា អត្តនោ គុណំ និស្សាយ លោកេ បាកដោតិ. តំ សុត្វា រាជា តុដ្ឋមានសោ ថេរំ បស្សិតុកាមោ ហុត្វា សម្ម ត្វមេវ គន្ត្វា ថេរំ យាចិត្វា ឥធា នេហីតិ អាហ. តំ សុត្វា ទេវបុត្តរាជា អត្តនោ ហត្ថស្សពលវាហនា ទិមហា សេនង្គបរិវុតោ ឥន្ទគុត្តត្ថេរស្ស សន្តិកំ គន្ត្វា វន្ទិត្វា អយ្យ អយ្យំ ធម្មាសោកមហារាជា ទដ្ឋុកាមោតិ អាហ. ថេរេន សាធូតិ សម្បដិច្ឆិតេ រាជា ថេរេន សម្បដិច្ឆិតភាវំ ធម្មាសោកមហារាជិនោ បេសេសិ. តតោ ធម្មាសោកមហារាជា សោមនស្សប្បត្តោ អត្តនោ អាណាបវត្តិតដ្ឋានេ រាជូនំ សាសនំ បេសេសិ. សព្ពេវ ថេរាគមនមគ្គំ អលង្ករោន្តូតិ. អថ តេ រាជានោ តុដ្ឋបហដ្ឋា អត្តនោ អត្តនោ នគរេ ភេរិំ ចរាបេត្វា ទេវបុត្តនគរតោ យាវ បាដលិបុត្តនគរំ ឯត្ថន្តរេ បញ្ចបណ្ណាសយោជនិកំ មគ្គំ វិសមំ សមំ ករោន្តោ ទេវតានំ ទិព្ពវីថិមិវ អលង្ករិត្វា ធម្មាសោកមហានរិន្ទស្ស ឯវំ សាសនំ បេសេសុំ. ភវន្តេត្ថ.

១. ឥន្ទគុត្តមហាថេរ, សាមិនោ គមនាយ នោ;

មគ្គំ អលង្ករោន្តូតិ, មហារាជេន បេសិតំ.

២. តតោ តេ អបនេត្វាន, បាសាណកណ្ដកាទិកំ;

វិសមំ សមំ ករិត្វាន, សម្មជ្ជិត្វាន សាធុកំ.

៣. ធោតមុត្តា សមាភាសា, ឱកិរិត្វាន វាលុកា;

ឧស្សាបិតា តត្ថ តត្ថ, ទុស្សតោរណបន្តិយោ.

៤. កលធោតហេមរម្ភាទិ, នានាតោរណបន្តិយោ;

តថា បុប្ផមយា នេក, តោរណូបរិតោរណា.

៥. តេសុ តេសុច ឋានេសុ, សង្ខតា កុសុមគ្ឃិកា;

តថេវ គន្ធតេលេហិ, ទីបិតា ទីបបន្តិយោ.

៦. បទុមុប្បលសន្នីរ, បុប្ផបល្លវ លង្កតា;

ឋបិតា ឃដមាលាយោ, បុណ្ណា សោគន្ធវារិហិ.

៧. និលបីតា ទិសម្ភិន្ន, បតាកាហិ ធជេហិ ច;

មគ្គស្ស ឧភតោ បស្សេ, វនមាសិ សមាកុលំ.

៨. កេតវោ ឧគ្គតា តត្ថ, មន្ទមន្ទសមីរណា;

អវ្ហយន្តាវ សោភន្តិ, ព្រហ្មោរគសុរាទយោ.

៩. នាគចម្បបុន្នាគ, កេតកីវកុលាទិហិ;

បទុមុប្បលា ទិជលជេហិ, មាលតី កុសុមា ទិហិ.

១០. មាលាទាមេហិ នេកេហិ, មគ្គមាសិ វិចិត្តកំ;

បត្ថរិត្វា បាទបដេ, សិត្តសម្មត្តភូមិយំ.

១១. លាជាទិបញ្ចបុប្ផានិ, វិកិរិំសុ មនោរមំ;

អលង្ករិត្វា ហត្តស្សា, កុសុមា ភរណាទិហិ.

១២. មគ្គាលង្ករណត្ថាយ, ឋបិតាសុំ តតោ តតោ;

តេសុ តេសុ ច ឋានេសុ, ភេរិមណ្ឌលមជ្ឈគា.

១៣. នច្ចន្តិ ចាតុរា នារី, រសភាវនិរន្តរា;

កំសវំសាទិបគ្គយ្ហ, វជ្ជេន្តានេកតន្តិយោ.

១៤. គាយន្តិ មធុរំ គីតំ, គាយន្តេត្ថ លយាន្វិតំ;

មគ្គោសោ សាធុវាទេហិ, ភេរិតន្តិនទេហិច.

១៥. ករីនំ កោញ្ចនាទេហិ, ហយានំ ហេសិតេហិ ច;

នេកវិដង្កសង្ឃេហិ, សោ ករីហិ សមាកុលោ.

១៦. មគ្គស្ស ឧភតោ បស្សេ, ទេវកញ្ញូបមា សុភា;

មាលាកលាបេ បគ្គយ្ហ, តិដ្ឋន្តិ តុដ្ឋមានសា.

១៧. តថា បុណ្ណឃដេ គយ្ហ, បទុមុប្បលសំកុលេ,

អដ្ឋមង្គលមុគ្គយ្ហ, តិដ្ឋន្តិ បមទា តហិំ.

១៨. សីតលូទកសម្បន្ន, បបាហិ សមលង្កតា;

សិនានត្ថំ ខតា អាសុំ, បោក្ខរញ្ញោ តហិំតហិំ.

១៩. តហិំតហិំកតា អាសុំ, ទានសាលា មនោរមា;

និចិតាសុមនេកានិ, ទានោបករណា តហិំ.

២០. ឯវំ នេកវិធា បូជា, អម្ហេហិ បដិបាទិតា;

ឋបេត្វាន មហាគង្គំ, តំ ជានាតុ មហីបតីតិ.

តំ សុត្វា អសោកមហារាជា គង្គំ អលង្ករោថាតិ សោឡសយក្ខេ បេសេសិ, តេ សបរិវារា តត្ថ គន្ត្វា អត្តនោ អានុភាវេន គង្គាយ អន្តោ តិគាវុតដ្ឋានេ ឧទុក្ខលបាសាណេ ឋបេសុំ. ឋបេត្វា ថម្ភេ ឧស្សាបេត្វា តុលាសំឃាដេ ទត្វា ហិមវន្តតោ រត្តចន្ទនសារេ អាហរិត្វា បទរេ សន្ថរិត្វា អនេកេហិ បូជាវិធានេហិ អលង្ករិត្វា រញ្ញោ ឯវំ សាសនំ បេសេសុំ. ភវន្តេត្ថ.

២១. យមត្ថាយ មយំ សព្ពេ, មហារាជេន បេសិតា;

អម្ហេហិ ទានិ តំ សព្ពំ, កតមេវ សុណោថ តំ.

២២. គាវុតត្តយគម្ភីរំ, គង្គំ យោជនវិត្ថតំ;

ថម្ភេ បតិដ្ឋបេត្វាន, អនគ្ឃំ រត្តចន្ទនំ.

២៣. ហិមវន្តតោ ហរិត្វាន, សេតុំ តត្ថ សុមាបិតំ;

តោរណា ច ឧភោ បស្សេ, រតនេហិ សុនិម្មិតា.

២៤. បុណ្ណកុម្ភទ្ធជា ចេវ, បទីបាវលិយោ តថា;

ឧភោ បស្សេសុ រតនានិ, មាបេត្វាលម្ពនានិច.

២៥. សុវណ្ណមណិមុត្តាទិ, ទាមេហិ សមលង្កតា;

វាលុកត្ថាយ ឱកិណ្ណា, ធោតមុត្តា បភស្សរា.

២៦. តេសុ តេសុ ច ឋានេសុ, ឋបិតាសុំ មហាមណី;

នានារាគវិតានេហិ, សោភិតា សេតុនោ បរិ.

២៧. ឱលម្ពិតាសុំ តត្ថេវ, ទិព្ពាទិកុសុមាទយោ;

និដ្ឋិតំ ឥធ កាតព្ព, យុត្តំ បូជាវិធិំតុ នោ;

ទេវោតំ បដិជានាតុ, ឥតិ វត្វាន បេសយុំតិ.

តម្បិ សុត្វា អសោកោ មហារាជា តុម្ហេវ ថេរំ ឥធានេថាតិ តេសំយេវ សាសនំ បដិបេសេសិ, តេ សាធូតិ ឥន្ទគុត្តត្ថេរស្ស សន្តិកំ គន្ត្វា វន្ទិត្វា ភន្តេ បាដលិបុត្តនគរស្ស គមនាយ កាលោតិ អាហំសុ, តតោ ថេរោ សដ្ឋិសហស្សមត្តេហិ ភិក្ខុសង្ឃេហិ បរិវុតោ បញ្ចបណ្ណាសយោជនមគ្គំ បដិបជ្ជិ. អថាបរំ ទេវបុត្តនគរវាសិនោ អនេកវិធមាលាគន្ធវាសចុណ្ណទ្ធជបតាកាទីហិ អនេកេហិ តាលាវចរេហិ នច្ចគីតវាទិតេហិ បូជេត្វា អគមំសុ. អថ ថេរោ មហន្តេន បូជាវិធានេន ជម្ពុទីបវាសីហិ បូជិយមានោ អនុក្កមេន ចន្ទភាគាយ គង្គាយ សេតុំ បត្វា តត្ថ មហន្តំ បូជាវិធានំ ឱលោកេន្តោ ឯវំ ចិន្តេសិ, ឯវំ ឧឡារំ បូជាវិធានំ ឥទានិ ជម្ពុទីបេ នាញ្ញស្ស ហោតិ, មយ្ហមេវេតំ កតំ. អហមេវេត្ត ឧត្តមោ អប្បដិមោតិ ឯវំ សេយ្យស្ស សេយ្យោហមស្មីតិ មានំ ឧប្បាទេត្វា អដ្ឋាសិ. តស្មិំ ខណេ ឯកោ ខីណាសវត្ថេរោ តំ មានេនុបត្ថទ្ធចេតសា ឋិតំ ទិព្ពចក្ខុនា ទិស្វា ឧបសង្កមិត្វា វន្ទិត្វា ថេរស្ស ឱវទន្តោ ឯវមាហ. តស្មា.

២៨. មា មានស្ស វសី ហោថ, មានោ ភន្តេ វសំគតំ [មានំភន្តេវសីកតំ ឥតិសព្ពត្ថ];

អនត្ថទោ សទា ហោតិ, បាតេត្វាន ភវា វដេ.

២៩. មានោ បលាលិតោ សត្តោ, តណ្ហាបដិឃសង្គតោ;

មក្កដោរគសោណាទិ, ហុត្វា ជាយតិ ជាតិសុ.

៣០. មា មានំ សាមិ បូរេហិ, អត្តានំ បរិសោធយ;

អបរិសុទ្ធា សយោ ភិក្ខុ, ទាយកំ ន បរិតោសតិ.

៣១. ទទន្តានំ សរន្តានំ, បូជេន្តានំ សចេ តុវំ;

មហប្ផលំ មហាភូតិំ, កាមត្ថ ហោថ និព្ពណាតិ [និម្មនា ឥតិកត្តចិ].

តំ សុត្វា ថេរោ សំសារេ និព្ពិន្ទោ តត្ថេវ ឋិតោ តិលក្ខណំ បដ្ឋបេត្វា ករជកាយំ សម្មសន្តោ សហបដិ សម្ភិទាហិ អរហត្តំ បត្វាវ និក្ខមិ. តតោ ធម្មាសោកមហារាជា ពលវាហនបរិវុតោ មហន្តេន បូជាវិធានេន បដិមគ្គំ អាគម្ម វន្ទិត្វា តតោ ទិគុណំ បូជាសក្ការំ កុរុមានោ មហាភិក្ខុសង្ឃេន សទ្ធិំ ថេរំ អត្តនោ នគរំ នេត្វា តស្ស ធម្មកថំ សុត្វា បសន្នមានសោ បញ្ចសីលេ បតិដ្ឋាយ មហន្តំ វិហារំ ការេត្វា ថេរេន សហាគតានំ សដ្ឋិសហស្សានំ ភិក្ខូនំ ចតុបច្ចយេហិ ឧបដ្ឋាន មកាសិ, អថ ថេរោ សាដ្ឋកថំ បិដកត្តយំ បកាសេន្តោ តស្មិំ ចិរំ វសិត្វា តត្ថេវ បរិនិព្ពាយិ. តតោ រាជា សបរិសោ តស្ស សរីរនិក្ខេបំ ការេត្វា ធាតុយោ គហេត្វា មហន្តំ ចេតិយំ ការាបេសីតិ.

៣២. បុរាតនានំ ភុវិ បុញ្ញកម្មិនំ,

គុណានុភាវេន មហេន្តិ ឯវំ;

សទេវកា នំ មនសីករោន្តា,

បុញ្ញំ ករោថា យតនេ សទា ទរាតិ.

ឥន្ទគុត្តត្ថេរស្ស វត្ថុំ ចតុត្ថំ.