៣០. សីវលិត្ថេរស្ស វត្ថុម្ហិ អយមានុបុព្ពីកថា

ឥតោ កិរ កប្បសតសហស្សមត្ថកេ បទុមុត្តរោ នាម សត្ថា លោកេ ឧទបាទិ ធម្មទេសនាយ សត្តេ អមតមហានិព្ពាណំ បាបេន្តោ, តស្មិំ សមយេ ភគវា ហំសាវតិយំ សរាជិកាយ បរិសាយ មជ្ឈេ ឯកំ ភិក្ខុំ លាភីនំ អគ្គដ្ឋានេ ឋបេសិ. តទា រាជា តំ ទិស្វា តំ ឋានំ កាមយមានោ ពុទ្ធបមុខស្ស សង្ឃស្ស មហាទានំ ទត្វា ភគវតោ បាទមូលេ សិរសា និបជ្ជិ, តទាស្ស ភគវា អនាគតេ គោតមស្ស ភគវតោ សាសនេ តំ ឋានំ លភិស្សសីតិ វត្វា ព្យាកាសិ. តំ សុត្វា មុទិតោ រាជា បុញ្ញានិ កត្វា ទេវលោកេ និព្ពត្តិ. តតោ អបរភាគេ ពារាណសិយំ សេដ្ឋិបុត្តោ ហុត្វា បច្ចេកពុទ្ធសហស្សំ ចតុបច្ចយទានេន យាវជីវំ បដិជគ្គិត្វា ទេវលោកេ និព្ពត្តោ មហន្តំ សម្បត្តិ មនុភវិត្វា តតោ ចុតោ វិបស្សិស្ស ភគវតោ កាលេ ពន្ធុមតីនគរេ អញ្ញតរស្មិំ កុលគេហេ និព្ពត្តិ. សោ តស្មិំ សមយេ សេនគុត្តដ្ឋានេ ឋត្វា រញ្ញោ កម្មំ ករោតិ, តទា នគរវាសិនោ ឧបាសកគណា វិបស្សីសម្មាសម្ពុទ្ធំ ឧបសង្កម្ម វន្ទិត្វា ភគវា ភន្តេ សសាវកោ អម្ហាកំ អនុគ្គហំ ករោតូតិ ស្វាតនាយ និមន្តេត្វា មហាទានំ ទត្វា សព្ពេ ឯកច្ឆន្ទា ភគវន្ត មុទ្ទិស្ស មហារហំ មហាបរិវេណំ ការាបេត្វា បរិវេណមហេ មហាទានំ ទទន្តា ទានគ្គេ អសុកំ នាម នត្ថីតិ ន វត្តព្ពន្តិ វត្វា ទានំ បដិយាទេត្វា ទានគ្គំ ឱលោកេន្តា នវទធិញ្ច បដលមធុញ្ច អបស្សន្តា បុរិសេ បក្កោសិត្វា សហស្សំ ទត្វា ទធិមធុំ ខិប្បំ បរិយេសិត្វា អានេថាតិ បេសេសុំ, តេ សហស្សំ គហេត្វា ទធិមធុំ ឧបធារេតុំ តត្ថ តត្ថ វិចរន្តា ទ្វារន្តរេ អដ្ឋំសុ, តទា អយំ សេនគុត្តោ រញ្ញោ សភត្តំ ទធិមធុំ អាទាយ គច្ឆន្តោ មហាទ្វារំ សម្បាបុណិ, អថ តេ ទធិមធុំ ទិស្វា ភោ កហាបណំ គហេត្វា ឥមំ ទេហីតិ យាចិំសុ. តេន [តេនទស្សាមិ ឥតិបិកត្តចិ] ន ទស្សាមីតិ វុត្តេ យាវសហស្សំ វឌ្ឍេត្វា យាចិំសុ. តតោ សេនគុត្តោ ឥមំ អប្បគ្ឃំ សហស្សេន យាចថ, កិ មនេន ករោថាតិ បុច្ឆិ, តេហិ សម្ពុទ្ធត្ថាយាតិ វុត្តេ តេនហិ អហមេវ ទស្សាមីតិ ជីរមរិចាទីហិ សក្ខរមធុផាណិតាទយោ យោជេត្វា ទានគ្គំ ឧបនាមេសិ. តំ សត្ថុ អានុភាវេន ពុទ្ធបមុខស្ស អដ្ឋសដ្ឋិភិក្ខុសតសហស្សស្ស បហោណកំ អហោសិ. តតោ សោ តេន បុញ្ញកម្មេន ទេវមនុស្សលោកេសុ សម្បត្តិ មនុភវិត្វា អបរភាគេ អម្ហាកំ ភគវតោ កាលេ កោលិយនគរេ មហាលិលិច្ឆវិរញ្ញោ ឧបនិស្សាយ សុប្បិយាយ នាម អគ្គមហេសិយា កុច្ឆិស្មិំ បដិសន្ធិំ គណ្ហិ. សោ សត្តមាសសត្តសំវច្ឆរានិ មាតុកុច្ឆិយំ វសិត្វា សត្តទិវសានិ មូឡ្ហគព្ភោ ទុក្ខមនុភវិ. មាតុកុច្ឆិតោ និក្ខមន្តស្ស តស្ស មាតាបិតរោ សីវលីតិ នាម មកំសុ. ឯវំ មហាបុញ្ញស្ស ឯត្តកំ កាលំ មាតុកុច្ឆិម្ហិ ទុក្ខានុភវនំ អត្តនាវ កតេន បាបពលេន អហោសិ, សោ កិរ អតីតេ រាជា ហុត្វា អត្តនោ សបត្តរញ្ញា សទ្ធិំ សង្គាមេន្តោ មាតរា សទ្ធិំ មន្តេសិ. សា នគរំ រុន្ធិត្វា អមិត្តេ គណ្ហិតុំ សក្កាតិ ឧបាយ មទាសិ, សោបិ តស្សា វចនេន នគរំ រុន្ធិត្វា សត្តមេ ទិវសេ អគ្គហេសិ, តេន បាបកម្មពលេន មាតាបុត្តានំ ឯវំ មហន្តំ ទុក្ខំ អហោសីតិ. តតោ សា បុត្តំ វិជាយនកាលេ សត្តមេ ទិវសេ ភគវន្តំ អនុស្សរិត្វា សុខេន ភារំ មុញ្ចិ. តុដ្ឋា សា សត្តមេ ទិវសេ ពុទ្ធបមុខស្ស ភិក្ខុសង្ឃស្ស មហាទានំ អទាសិ, អថស្សា បុត្តោ សត្តវស្សិកកាលេ គេហា និក្ខម្ម សត្ថារំ ទិស្វា បព្ពជ្ជំ យាចិ. សត្ថា សារិបុត្តត្ថេរស្ស និយោជេសិ, តតោ សារិបុត្តត្ថេរេន ឧបជ្ឈាយេន មោគ្គល្លានមាចរិយំ កត្វា បព្ពជិ, អថ សោ ខុរគ្គេយេវ អរហត្តំ បត្វា ពុទ្ធសាសនំ សោភេសិ, សោ បុព្ពេ កតបុញ្ញានុភាវេន មហាបុញ្ញោ អហោសិ លាភីនញ្ច អគ្គោ. អថេកស្មិំ សមយេ ភគវា រេវតត្ថេរំ ទស្សនាយ ខទិរវនវិហារំ គច្ឆន្តោ តិំសភិក្ខុសហស្សេហិ សទ្ធិំ តិំសយោជនិកំ ឆដ្ដិតកន្តារំ សម្បាបុណិ និរូទកំ អប្បភក្ខំ. យេភុយ្យេន ទេវតា សីវលិត្ថេរេ បសន្នា. តស្មា ភគវា សីវលិត្ថេរំ បុរតោ ចារិកំ កត្វា ទេវតាហិ ការាបិតេ វិហារេ វសន្តោ ទេវតាហិ សជ្ជិតទានំ បរិភុញ្ជន្តោ រេវតត្ថេរំ សំបាបុណិត្វា គតកម្មំ និដ្ឋាបេត្វា ជេតវនមាគម្ម លាភីនំ អគ្គដ្ឋានេ តំ ឋបេសីតិ. តេន វុត្តំ អបទានេ.

១. បទុមុត្តរោ នាម ជិនោ, សព្ពធម្មេសុ ចក្ខុមា;

ឥតោ សតសហស្សម្ហិ, កប្បេ ឧប្បជ្ជិ នាយកោ.

២. សីលំ តស្ស អសង្ខ្យេយ្យំ, សមាធិ វជិរូបមោ [វជិរូបមា ឥតិកត្ថចិ];

អសំខិយំ ញាណវរំ, វិមុត្តិ ច អនោបមា.

៣. មនុជាមរនាគានំ, ព្រហ្មានញ្ច សមាគមេ;

សមណព្រាហ្មណាកិណ្ណេ, ធម្មំ ទេសេតិ នាយកោ.

៤. សសាវកំ មហាលាភិំ, បុញ្ញវន្តំ ជុតិន្ធរំ,

ឋបេសិ ឯតទគ្គម្ហិ, បរិសាសុ វិសារទោ.

៥. តទាហំ ខត្តិយោ អាសិំ, បុរេ ហំសវតីវ្ហយេ [ហំសាវតវ្ហយេ ឥតិសព្ពត្ថ];

សុត្វា ជិនស្ស តំ វាក្យំ, សាវកស្ស គុណំ ពហុំ.

៦. និមន្តយិត្វា សត្តាហំ, ភោជយិត្វា សសាវកំ;

មហាទានំ ទទិត្វាន, តំ ឋានមភិបត្ថយិំ.

៧. តទា មំ វិនតំ បាទេ, ទិស្វាន បុរិសាសភោ;

សោ សរេន មហាវីរោ, ឥមំ វចនមព្រវី.

៨. តតោ ជិនស្ស វចនំ, សោតុកាមា មហាជនា;

ទេវទានវគន្ធព្ពា, ព្រហ្មានោច មហិទ្ធិកា.

៩. សមណព្រាហ្មណា ចាបិ, នមស្សិសុំ កតញ្ជលី;

នមោ តេ បុរិសាជញ្ញ, នមោ តេ បុរិសុត្តម.

១០. ខត្តិយេន មហាទានំ, ទិន្នំ សត្តាហកម្បិ [សត្តាហកំបិតោ ឥតិបិកត្ថចិ] នោ;

សោតុកាមា ផលំ តស្ស, ព្យាករោហិ មហាមុនេ.

១១. តតោ អវោច ភគវា, សុណោថ មម ភាសិតំ;

អប្បមេយ្យម្ហិ ពុទ្ធស្មិំ, គុណម្ហិ សុប្បតិដ្ឋិតា.

១២. ទក្ខិណា ទាយកំ បត្វា, អប្បមេយ្យផលាវហា;

អបិ ចេ ស មហាភោគោ, ឋានំ បត្ថេតិ មុត្តមំ.

១៣. លាភី វិបុលលាភីនំ, យថា ភិក្ខុ សុទស្សនោ;

តថាហំបិ ភវេយ្យន្តិ, លច្ឆតេ តំ អនាគតេ.

១៤. សតសហស្សិតោ កប្បេ, ឱក្កាកកុលសម្ភវោ;

គោតមោនាម នាមេន, សត្ថា លោកេ ភវិស្សតិ.

១៥. តស្ស ធម្មេសុ ទាយាទោ, ឱរសោ ធម្មនិម្មិតោ;

សីវលិ នាម នាមេន, ហេស្សតិ សត្ថុសាវកោ.

១៦. តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសូបគោ អហំ.

១៧. តតោបរស្មិំសមយេ, ពារាណសិបុរុត្តមេ;

សេដ្ឋិបុត្តោ អហំ អាសិំ, អឌ្ឍប្បត្តោ មហាធនោ.

១៨. សហស្សមត្តេ បច្ចេក, នាយកេ ច និមន្តិយ;

មធុរេនន្នបានេន, សន្តប្បេសិំតទាទរោ.

១៩. តតោ ចុតោ ឆកាមគ្គេ, អនុភោសិំមហាយសំ;

ទេវច្ឆរាបរិវុតោ, បាសាទេ រតនាមយេ.

២០. ឯវំ អចិន្តិយា ពុទ្ធា, ពុទ្ធធម្មា អចិន្តិយា;

អចិន្តិយេ បសន្នានំ, វិបាកោបិ អចិន្តិយោ.

២១. ឯកនវុតិតោ កប្បេ, វិបស្សីនាម នាយកោ;

ឧប្បជ្ជិ ចារុនយនោ, សព្ពធម្មវិបស្សកោ.

២២. តទាហំ ពន្ធុមតិយា, កុលស្សញ្ញតរស្ស ច;

ទយិតោ បត្ថិតោ បុត្តោ, អាសិំ កម្មន្តព្យាវដោ.

២៣. តទា អញ្ញតរោ បូគោ, វិបស្សិស្ស មហេសិនោ;

បរិវេណំ អការេសិ, មហន្ត មិតិ វិស្សុតំ.

២៤. និដ្ឋិតេ ច មហាទានំ, ទទំ ខជ្ជកសំយុតំ;

នវំ ទធិ មធុញ្ចេវ, វិចិនំ ន ច មទ្ទស.

២៥. តទាហំ តំ គហេត្វាន, នវំ ទធិ មធុម្បិច,

កម្មសាមិឃរំ គច្ឆំ, តមេនំ [តមេសំ ឥតិសព្ពត្ថ] ទាន មទ្ទសំ.

២៦. សហស្សម្បិ ច ទត្វាន, ន លតិំសុ ច តំ ទ្វយំ;

តតោ ឯវំ វិចិន្តេសិំ, នេតំ ហេស្សតិ ឱរកំ.

២៧. យថា ឥមេ ជនា សព្ពេ, សក្ករោន្តិ តថាគតំ;

អហម្បិ ការំ កស្សាមិ, សសង្ឃេ លោកនាយកេ.

២៨. តទាហមេវំ ចិន្តេត្វា, ទធិំមធុញ្ច ឯកតោ;

យោជេត្វា លោកនាថស្ស, សសង្ឃស្ស អទាសហំ.

២៩. តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំស មគញ្ឆហំ.

៣០. បុនាហំ ពារាណសិយំ, រាជា ហុត្វា មហាយសោ;

សត្តុកស្ស តទា រុទ្ធោ, ទ្វាររោធំ អការយិំ.

៣១. តតោ សបត្តិនោ [សម្បត្តិនោ; សបត្តានោ ឥតិចកត្ថចិ] រុទ្ធា, ឯកាហំ រក្ខិតា អហុំ;

តតោ តស្ស វិបាកេន, បាបុណិំ និរយំ ភុសំ.

៣២. បច្ឆិមេ ច ភវេ ទានិ, ជាតោហំ កោលិយេ បុរេ;

សុប្បវាសា ច មេ មាតា, មហាលិ លិច្ឆវី បិតា.

៣៣. ខត្តិយេ បុញ្ញកម្មេន, ទ្វាររោធស្ស វាហសា;

សត្តមាសេ សត្តវស្សេ, វសិំកុច្ឆិម្ហិ ទុក្ខិតោ.

៣៤. សត្តាហំ ទ្វារមូឡ្ហោហំ, មហាទុក្ខសមប្បិតោ;

មាតា មេ ឆន្ទទានេន, ឯវ មាសិ សុទុក្ខិតា.

៣៥. សុវត្ថិតោហំ និក្ខន្តោ, ពុទ្ធេន អនុកម្បិតោ;

និក្ខន្តទិវសេយេវ, បព្ពជិំ អនគារិយំ.

៣៦. ឧបជ្ឈា សារិបុត្តោ មេ, មោគ្គល្លានោ មហិទ្ធិកោ;

កេសេ ឱរោបយន្តោ មេ, អនុសាសិ មហាមតិ.

៣៧. កេសេសុ ឆិជ្ជមានេសុ [ឆន្នមនេសុ ឥតិបិកត្ថចិ], អរហត្តមបាបុណីំ;

ទេវោ នាគា មនុស្សា ច, បច្ចយានុ បនេន្តិ មេ.

៣៨. បទុមុត្តរនាមញ្ច, វិបស្សិំច វិនាយកំ;

សំបូជយិំ បមុទិតោ, បច្ចយេហិ វិសេសតោ.

៣៩. តតោ តេសំ វិបាកេន, កម្មានំ វិបុលុត្តមំ;

លាភំ លភាមិ សព្ពត្ថ, វនេ គាមេ ជលេ ថលេ.

៤០. រេវតំ ទស្សនត្ថាយ, យទា យាតិ វិនាយកោ;

តិំសភិក្ខុសហស្សេហិ, សហ លោកគ្គនាយកោ.

៤១. តទា ទេវោ បនីតេហិ [បណីតេហិ ឥតិសព្ពត្ថ], មមត្ថាយ មហាមតិ;

បច្ចយេហិ មហាវីរោ, សសង្ឃោ លោកនាយកោ.

៤២. ឧបដ្ឋិតោ មយា ពុទ្ធោ, គន្ត្វា រេវតមទ្ទស;

តតោ ជេតវនំ គន្ត្វា, ឯតទគ្គេ ឋបេសិមំ.

៤៣. លាភីនំ សីវលិ អគ្គោ, មម សិស្សេសុ ភិក្ខវោ;

សព្ពេលោកហិតោ សត្ថា, កិត្តយី បរិសាសុមំ.

៤៤. កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

៤៥. ស្វាគតំ វត មេ អាសិ, ពុទ្ធសេដ្ឋស្ស សន្តិកំ;

តិស្សោ វិជ្ជា អនុប្បត្តោ, កតំ ពុទ្ធស្ស សាសនំ.

៤៦. បដិសម្ភិទា ចតស្សោបិ, វិមោក្ខា បិច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនន្តិ.

ឥត្ថំ សុទំ អាយស្មា សីវលិត្ថេរោ ឥមា គាថាយោ អភាសិត្ថាតិ.

៤៧. សុត្វាន ឯតំ ចរិតំ មហព្ភុតំ,

បុញ្ញានុភាវញ្ច សិរិំ សិរីមតំ;

ហិត្វា កុសីតំ កុសលំ ករោថ,

កាមាត្ថ កាមំ ភវភោគនិព្ពុតិំ.

សីវលិត្ថេរស្ស វត្ថុំ ទសមំ.

យក្ខវញ្ចិតវគ្គោ តតិយោ.