២៧. សទ្ធោបាសកស្ស វត្ថុម្ហិ អយមានុបុព្ពីកថា

អតីតេ កិរ កស្សបទសពលស្ស កាលេ ឯកោ បុរិសោ សទ្ធោ រតនត្តយេសុ បសន្នោ ឧច្ឆុយន្តកម្មេន ជីវិកំ កប្បេន្តោ បដិវសតិ. អថ សោ ឯកំ គិលានភិក្ខុំ ទិស្វា តស្ស ឧឡុង្កមត្តំ សប្បិំ អទាសិ, តថេវេកស្ស ភិក្ខុស្ស ឯកំ គុឡបិណ្ឌំ អទាសិ, អថាបរស្មិំទិវសេ ឯកំ ឆាតជ្ឈត្តំ សុនខំ ទិស្វា តស្ស ភត្តបិណ្ឌេន សង្គហ មកាសិ, អថេកស្ស ឥណដ្ឋកស្ស ឯកំ កហាបណំ អទាសិ, អថេកទិវសំ ធម្មំ សុណមានោ ធម្មទេសកស្ស ភិក្ខុស្ស សាដកំ បូជេសិ, សោ ឯត្តកំ បុញ្ញកម្មំ កត្វា ភវេសុ ចរមានោហំ សមុទ្ទបព្ពតាទីសុបិ យំ យំ ឥច្ឆាមិ. តំ តំ សមិជ្ឈតូតិ បត្ថនំ អកាសិ, សោ អបរភាគេ កាលំ កត្វា តេហេវ កុសលមូលេហិ សុត្តប្បពុទ្ធោ វិយ ទេវលោកេ និព្ពត្តិត្វា តត្ថ មហន្តំ ទិព្ពសម្បត្តិំ អនុភវិត្វា តតោ ចុតោ អម្ហាកំ ភគវតោ កាលេ សាវត្ថិយំ មហទ្ធនេ មហាសាលកុលេ និព្ពត្តិត្វា តតោ សោ វិញ្ញុតំ បត្តោ កាលេន កាលំ ធម្មំ សុណន្តោ ឃរាវាសេ អាទីនវំ បព្ពជ្ជាយ ច អានិសំសំ សុត្វា បព្ពជិតោ ន ចិរេនេវ អរហត្តំ បាបុណិ. សោ អបរភាគេ សត្ថារំ វន្ទិត្វា បញ្ចសតភិក្ខុបរិវារោ ឧគ្គនគរំ អគមាសិ, តត្ថ សេដ្ឋិនោ ភរិយា សទ្ធា អហោសិ បសន្នា. សា ថេរំ បញ្ចហិ ភិក្ខុសតេហិ សទ្ធិំ ភិក្ខាយ ចរន្តំ ទិស្វា តុរិតតុរិតា គន្ត្វា ថេរស្ស បត្តំ គហេត្វា សទ្ធិំ បញ្ចសតេហិ ភិក្ខូហិ ភោជេត្វា ថេរំ តត្ថ និពទ្ធវាសត្ថំ យាចិត្វា បញ្ចសតកូដាគារានិ ការាបេត្វា អលង្ករិត្វា បញ្ចសតភិក្ខូ តត្ថ វាសេន្តី និពទ្ធំ ចតុបច្ចយេហិ ឧបដ្ឋានមកាសិ. តតោ ថេរោ តំ បញ្ចសុ សីលេសុ បតិដ្ឋាបេត្វា តត្ថ យថាភិរន្តំ វិហរិត្វា អញ្ញត្ត គន្តុកាមោ អនុបុព្ពេន បដ្ដនគាមំ អគមាសិ, តត្ថ វសិត្វា តតោ នាវំ អភិរុយ្ហ បញ្ចសតភិក្ខូហិ បរិវុតោ សមុទ្ទបិដ្ឋេន គច្ឆតិ, សមុទ្ទំ តរន្តស្ស តស្ស សាគរមជ្ឈេ ឧទរវាតោ សមុដ្ឋហិត្វា បីឡេតិ, តំ ទិស្វា ភិក្ខូ ភន្តេ ឥទំ បុព្ពេ កេន វូបសមេស្សតីតិ បុច្ឆិំសុ, ថេរោ បុព្ពេ មេ អាវុសោ ឧលុង្កមត្តេ សប្បិបីតេ រោគោ វូបសម្មតីតិ អាហ, ភិក្ខូ ភន្តេ សមុទ្ទបិដ្ឋេ កថំ សប្បិំ លភិស្សាម, អធិវាសេថាតិ អាហំសុ, តំ សុត្វា ថេរេន [ថេរោននោអាយស្មន្តា ឥតិសព្ពត្ថ] ន នោ អាយស្មន្តា សប្បិ ទុល្លភា, មម បត្តំ គហេត្វា សមុទ្ទោទកំ ឧទ្ធរិត្វា អានេថាតិ វុត្តេ ភិក្ខូ តថា អកំសុ. ឧទ្ធដមត្តមេវ តំឧទកំ បរិវត្តេត្វា សប្បិ អហោសិ, អថ ភិក្ខូ តំ ទិស្វា អច្ឆរិយព្ភុតចិត្តា ជាតា ថេរស្ស សប្បិំ ឧបនាមេសុំ, ថេរេន សប្បិនោ [សប្បិនា ឥតិសព្ពត្ថ] បីតមត្តេ សោ អាពាធោ វូបសមិ, អថស្ស ភិក្ខូហិ កិ មេតំ ភន្តេ អច្ឆរិយំ, ន នោ ឥតោ បុព្ពេ ឯវរូបំ ទិដ្ឋបុព្ពំតិ វុត្តេ ថេរោ តេនហិ កតបុញ្ញានំ បុញ្ញវិបាកំ បស្សិស្សថាតិ វត្វា សមុទ្ទំ ឱលោកេសិ ឥទំ សប្បិ ហោតូតិ. អថស្ស ចក្ខុបថេ សមុទ្ទេ សព្ពោទកំ បរិវត្តេត្វា សប្បិ អហោសិ. អថស្ស ភិក្ខូ អព្ភុតចិត្តា អញ្ញម្បិ ឦទិសំ បុញ្ញំ អត្ថិ ភន្តេតិ បុច្ឆិំសុ, តតោ ថេរោ តេនហិ បស្សថាយស្មន្តា មម បុញ្ញន្តិ វត្វា សមន្តា តត្ថ តត្ថ ឃនសេលបព្ពតេ ឱលោកេសិ, សព្ពានិ តានិ គុឡបិណ្ឌានិ អហេសុំ, តតោ ចក្ខុបថេ សមន្តា ភត្តភាជនានិ ទស្សេសិ សព្យញ្ជនំ សោបករណំ. តតោ ហិមវន្តំ ឱលោកេសិ, សព្ពំ តំ សុវណ្ណមយំ អហោសិ. អថាភិមុខដ្ឋានេ មហន្តំ វនសណ្ឌំ ឱលោកេសិ, សកលវនសណ្ឌំនានាវិរាគវត្ថេហិ សញ្ឆន្នំ អហោសិ, ភិក្ខូ តំ តំ បាដិហារិយំ ទិស្វា អតីវ វិម្ហិតា ភន្តេ កេន តេ បុញ្ញកម្មេន ឯតាទិសានិ បាដិហារិយានិ ភវិស្សន្តីតិ បុច្ឆិំសុ, ថេរោ កស្សបទសពលស្ស កាលេ អត្តនា កតំ សព្ពំ តំ កុសលំ បកាសេសិ. តេនេត្ថ.

១. ឥមស្មិំ ភទ្ទកេ កប្បេ, កស្សបោ នាម នាយកោ;

សព្ពលោកហិតត្ថាយ, លោកេ ឧប្បជ្ជិ ចក្ខុមា.

២. តទាហំ ឧច្ឆុយន្តម្ហិ, និយុត្តោ គុឡការកោ;

តេន កម្មេន ជីវាមិ, បោសេន្តោ បុត្តទារកេ.

៣. កិលន្តិន្ទ្រិយមទ្ទក្ខិំ, ភិក្ខុំ រោគាតុរំ តទា;

ភិក្ខាចារកវត្តេន, ឃតត្ថំ [ឃតមត្តមុបាគតំ ឥតិសព្ពត្ថ] សមុបាគតំ.

៤. ឧលុង្កមត្តំ សប្បិស្ស, អទទំ តស្ស ភិក្ខុនោ;

សទ្ទហន្តោ ទានផលំ, ទយាយុ ទគ្គមានសោ.

.៥

តេន កម្មេន សំសារេ, សំសរន្តោ ភវាភវេ;

យត្ថិច្ឆាមិ ឃតំ តត្ថ, ឧប្បជ្ជតិ អនប្បកំ.

៦. ឥច្ឆាមហំ សមុទ្ទស្មិំ, ផលម្បិ ឃតមត្តនោ;

តំ តំ សព្ពំ ឃតំ ហោតិ, ឃតទានស្សិទំ ផលំ.

៧. សុណាថ មយ្ហំ អញ្ញម្បិ, បុញ្ញកម្មំ មនោរមំ;

តទា ទិស្វានហំ ភិក្ខុំ, រោគេន បរិបីឡិតំ.

៨. គុឡបិណ្ឌំ គហេត្វាន, បត្តេ តស្ស សមាកិរិំ;

តេន សោ សុខិតោ អាសិ, រោគំ ព្យបគតំ តទា.

៩. តេន មេ គុឡទានេន, សំសរំ ទេវមានុសេ;

យត្ថត្ថោស្មិ គុឡេនាហំ, តត្ថ តំ សុលភំ មម.

១០. សេលាច វិបុលា មយ្ហំ, ហោន្តិ ចិត្តានុវត្តកា;

មហន្តគុឡបិណ្ឌាវ, គុឡទានេ ឥទំ ផលំ.

១១. អថាបិ មេ កតំ បុញ្ញំ, សុណាថ សាធុ ភិក្ខវោ;

ឆាតជ្ឈត្តំ ផន្ទមានំ, ទិស្វាន សុនខំ តទា.

១២. ភត្តបីណ្ឌេន សង្គណ្ហិំ, តម្បិ ទានំ ផលាវហំ;

តតោ បដ្ឋាយ នាហោសិ, អន្នបានេន ឩនតា.

១៣. សុលភន្នបានោ សុខិតោ, អហោសិំជាតិជាតិយំ;

អជ្ជាបិ យទិ ឥច្ឆាមិ, ភោជនេន បយោជនំ.

១៤. ចក្ខុបថេ សមន្តា មេ, ជាយន្តុក្ខលិយោ ពហូ;

អថាបរម្បិ កុសលំ, អកាសិំតំ សណាថ មេ.

១៥. ឥណដ្ឋកស្ស បោសស្ស, អទាសេកំ កហាបណំ;

តេន មេ បុញ្ញកម្មេន, អនោមភវសម្បទំ.

១៦. បចុរំ ជាតរូបញ្ច, លភាមិ ជាតិជាតិយំ;

សចជ្ជ ធនកាមោហំ, ឃនសេលោបិ បព្ពតោ;

ហោតិ ហេមមយំ សព្ពំ, ឥណតោ មោចនេ ផលំ.

១៧. អញ្ញម្បិ មម បុញ្ញំ ភោ, សុណាថ សុតិសោភនំ;

កស្សបស្ស ភគវតោ, សាសនេកំ ពហុស្សុតំ.

១៨. ទេសេន្តំ មុនិនោ ធម្មំ, សុត្វា បីណិតមានសោ;

បូជេសិំសាដកំ មយ្ហំ, ធម្មស្ស ធម្មសាមិនោ.

១៩. តេនាហំ បុញ្ញកម្មេន, សំសរំ ទេវមានុសេ;

លភាមិ បចុរំ វត្ថំ, យំ លោកស្មិំ វរំ បរំ.

២០. ឥច្ឆមានោ សចេ អជ្ជ [ជានមានោបហំអជ្ជ; ជានធានោចហំអជ្ជ ឥតិកត្ថចិ], ហិមវន្តម្បិ បព្ពតំ;

នានាវិរាគវត្ថេហិ, ឆាទយិស្សំ សមន្តតោ.

២១. សចេ ឥច្ឆាមិ អជ្ជេវ, វត្ថេនច្ឆាទយា មិតេ;

ជន្តវោ ចតុទីបស្មិំ, វត្ថទានស្សិទំ ផលំ.

២២. ឯតេសំ បុញ្ញកម្មានំ, វាហសា កាមភូមិយំ;

សម្បត្តិ មនុភុត្វាន, សាវត្ថិបុរ មុត្តមេ.

២៣. ជាតោ កុលេ មហាភោគេ,

វុទ្ធិប្បត្តោ សុខេធិតោ;

តស្ស ធម្មំ សុណិត្វាន,

បព្ពជិត្វាន សាសនេ.

២៤. លោកុត្តរំ អគ្គរសំ, ភុញ្ចន្តោ មុនិវាហសា;

កិលេសេ បជហិត្វាន, អរហត្តមបាបុណិំ.

២៥. កុសលំ នា វមន្តព្ពំ, ខុទ្ទកន្តិ កទាចិបិ;

អនន្តផលទំ ហោតិ, និព្ពាណម្បិ ទទាតិ តំ.

អថស្ស ធម្មទេសនំ សុត្វា ភិក្ខូ ច មហាជនោ ច ទានាទិកុសលកម្មំ កត្វា យេភុយ្យេន សគ្គបរាយណា អហេសុំតិ.

២៦. មនោបសាទេនបិ អប្បបុញ្ញំ,

ឯវំ មហន្តំ ភវតីតិ ញត្វា;

មា អប្បបុញ្ញន្តិ បមជ្ជថម្ភោ;

សរាថ ទេវិំ ឥធ លាជទាយិំ.

សទ្ធោបាសកស្ស វត្ថុំ សត្តមំ.