២៨. កបណស្ស វត្ថុម្ហិ អយមានុបុព្ពីកថា

អម្ហាកំ ភគវតិ បរិនិព្ពុតេ ពារាណសីនគរវាសី ឯកោ ទុគ្គតបុរិសោ បរគេហេ ភតិំកត្វា ជីវិកំ កប្បេតិ, តស្មិំ សមយេ នគរវាសិនោ យេភុយ្យេន តស្មិំ តស្មិំ ឋានេ មណ្ឌបាទយោ ការាបេត្វា មហាទានំ ទេន្តិ, តំ ទិស្វា ទុគ្គតោ ឯវំ ចិន្តេសិ, អហំ បុព្ពេ អកតបុញ្ញត្តា បរគេហេ ភតិំ កត្វា កិច្ឆេន កសិរេន ជីវាមិ. និវាសនបារុបនម្បិ វាសដ្ឋានមត្តម្មិ ទុក្ខតោ លភាមិ. ឥទានិ ពុទ្ធុប្បាទោ វត្តតិ ភិក្ខុសង្ឃោបិ.

សព្ពេ ឥមេ ទានំ ទត្វា សគ្គមគ្គំ សោធេន្តិ. មយាបិ ទានំ ទាតុំ វដ្ដតិ. តម្មេ ទីឃរត្តំ ហិតាយ សុខាយ ភវិស្សតិ. អបិ ច មយ្ហំ តណ្ឌុលនាលិមត្តម្បិ នត្ថិ, អកតវីរិយេន តំ មត្ថកំ បាបេតុំ ន សក្កា, ឯតទត្ថាយាហំ ឧយ្យោគំ កត្វា ទានំ ទស្សាមីតិ ចិន្តេត្វា តតោ បដ្ឋាយ ភតិំ បរិយេសមានោ គន្ត្វា តត្ថ តត្ថ ភតិំ កត្វា លទ្ធនិវាបេ ច ភិក្ខាចរិយាយ លទ្ធតិលតណ្ឌុលាទយោ ច ឯកត្ថ សំហរិត្វា មនុស្សេ សមាទាបេត្វា តស្មិំ មណ្ឌបំ ការាបេត្វា វនកុសមាទីហិ តំ អលង្ករិត្វា ភិក្ខូ និមន្តេត្វា មណ្ឌបេ និសីទាបេត្វា សព្ពេសំ បាយសំ [បាយាសំ ឥតិសព្ពត្ថ] បដិយាទេត្វា ភោជេសិ. អថ សោ មរណកាលេ អត្តនា កតំ តំ ទានវរំ អនុស្សរិ. សោ តេន កុសលកម្មេន សុត្តប្បពុទ្ធោ វិយ ទេវលោកេ និព្ពត្តិ. តស្មិំ តេន កតបុញ្ញានុរូបំ មហន្តំ កនកវិមានំ និព្ពត្តិ. សមន្តា តិគាវុតដ្ឋានេ ទេវតា នានា វិធានិ តុរិយានិ គហេត្វា ឧបហារំ ករោន្តិ. និច្ចំ ទេវច្ឆរាសហស្សានិ [ទេវច្ឆរាសហស្សំ ឥតិសព្ពត្ថ] តំ បរិវារេត្វា តិដ្ឋន្តិ. ឯវំ សោ មហន្តំ សម្បត្តិំ អនុភវតិ. អថេកទិវសំ សុវណ្ណសេលវិហារវាសី មហាសង្ឃរក្ខិតត្ថេរោ បត្តបដិសម្ភិទោ ទេវចារិកំ ចរមានោ តំ ទេវបុត្តំ អនុបមាយ ទេវសម្បត្តិយា វិរោចមានំ ទិស្វា ឧបសង្កម្ម ឋិតោ តេន កតកម្មំ បុច្ឆិ. សោបិស្ស យថាភូតំ ព្យាកាសិ, តេនត្ថ.

១. សព្ពសោវណ្ណយោ អាសិ, បាសាទោ រតនាមយោ;

សោណ្ណសិង្គសតាកិណ្ណោ, ទុទ្ទិក្ខោ ច បភស្សរោ.

២. កូដាគារ សតាកិណ្ណោ, សោណ្ណមាលាសមាកុលោ;

មុត្តាកលាបាលម្ពន្តិ, តត្ថ តត្ថ មនោរមា.

៣. នេកគព្ភសតាកិណ្ណោ, សយនាសនមណ្ឌិតោ;

វិភត្តោ ភព្ពភាគេហិ, បុញ្ញវឌ្ឍកិនា កតោ.

៤. នច្ចន្តិ បមទា តត្ថ, ភេរិមណ្ឌលមជ្ឈគា;

គាយន្តិ កាចិ កីឡន្តិ, វាទេន្តិ កាចិ តន្តិយោ.

៥. តតោ តិគាវុតេ ឋានេ, បាសាទស្ស សមន្តតោ;

សហច្ឆរា ទេវបុត្តា, គហេត្វា អាតតាទយោ.

៦. មោទន្តិ បរិវារេត្វា, នច្ចគីតាទិនា សទា;

ឧល្លង្ឃន្តិច សេលេន្តិ, សិលាឃន្តិ សមន្តតោ.

៧. ឯវំ មហិទ្ធិកោ ទានិ, តុវំ វន្ទោវ ភាសតិ;

បុច្ឆាមិ តំ ទេវបុត្ត, កិំ កម្មមករី បុរា.

ទេវបុត្តោ អាហ.

៨. អហោសិំ ទុគ្គតោ បុព្ពេ, ពារាណសីបុរុត្តមេ;

ទានំ ទេន្តិ នរា តត្ថ, និមន្តេត្វាន ភិក្ខវោ.

៩. ជីវន្តោ ភតិយា សោហំ, ទានំ ទេន្តេ មហាជនេ;

តុដ្ឋហដ្ឋេ បមុទិតេ, ឯវំ ចិន្តេសហំ តទា.

១០. សម្បន្នវត្ថាលង្ការា, ទានំ ទេន្តិ ឥមេ ជនា;

បរត្ថបិ បហដ្ឋាវ, សម្បត្តិមនុភោន្តិ តេ.

១១. ពុទ្ធុប្បាទោ អយំ ទានិ, ធម្មោ លោកេ បវត្តតិ;

សុសីលា ទានិ វត្តន្តិ, ទក្ខិណេយ្យា ជិនោរសា.

១២. អនាវដ្ឋិតោ [អវដ្ឋិតោច; អន្ធដ្ឋិតោច ឥតិបិកត្តចិ] សំសារោ, អបាយា ខលុ បូរិតា;

កល្យាណវិមុខា សត្តា, កាមំ គច្ឆន្តិ ទុគ្គតិំ.

១៣. ឥទានិ ទុក្ខិតោ ហុត្វា, ជីវាមិ កសិរេនហំ;

ទលិទ្ទោ កបណោ ទីនោ, អប្បភោគោ អនាលយោ.

១៤. ឥទានិ ពីជំ រោបេមិ, សុខេត្តេ សាធុសម្មតេ;

អប្បេវនាម តេនាហំ, បរត្ថ សុខិតោ សិយា.

១៥. ឥតិ ចិន្តិយ ភិក្ខិត្វា, ភតិំ កត្វាន នេកធា;

មណ្ឌបំ តត្ថ ការេត្វា, និមន្តេត្វាន ភិក្ខវោ.

១៦. អាយាសេន អទាសាហំ, បាយសំ អមតាយ សោ;

តេន កម្មវិបាកេន, ទេវលោកេ មនោរមេ.

១៧. ជាតោម្ហិ ទិព្ពកាមេហិ, មោទមានោ អនេកធា;

ទីឃាយុកោ វណ្ណវន្តោ, តេជស្សីច អហោសហន្តិ.

ឯវំ ទេវបុត្តោ អត្តនា កតបុញ្ញកម្មំ វិត្តារេន កថេសិ, ថេរោបិ មនុស្សលោកំ អាគន្ត្វា មនុស្សានំ អត្តនា បច្ចក្ខតោ ទិដ្ឋទិព្ពសម្បត្តិំ បកាសេសិ. តំ សុត្វា មហាជនោ កុសលកម្មំ កត្វា យេភុយ្យេន សគ្គេ និព្ពត្តោតិ.

១៨. អនាលយោ ទុគ្គតទីនកោបិ,

ទានំ ទទន្តោ ធិគតោ វិសេសំ;

សគ្គា បវគ្គំ យទិ បត្ថយវ្ហោ,

ហន្ត្វាន មច្ឆេរមលំ ទទាថាតិ.

កបណស្ស វត្ថុំ អដ្ឋមំ.