២៦. ចោរឃាតកវត្ថុម្ហិ អយមានុបុព្ពីកថា

ឯកស្មិំ កិរ សមយេ អម្ហាកំ ភគវា សាវត្ថិយំ ឧបនិស្សាយ ជេតវនេ វិហរតិ ធម្មទេសនាយ មហាជនស្ស សគ្គមោក្ខសម្បទំ ទទមានោ. តស្មិំសមយេ បញ្ចសតា ចោរា អដវិតោ នគរំ អាគន្ត្វា រត្តិភាគេ ចោរកម្មំ កត្វា តេន បុត្តទារេ បោសេន្តិ. អថេកទិវសំ ចោរា ចោរកម្មត្ថាយ នគរំ បវិសន្តា នគរទ្វារេ ឯកំ ទុក្ខិតំ ជនបទមនុស្សំ បស្សិត្វា ហម្ភោ កត្ថ វសតីតិ បុច្ឆិំសុ, សោ អត្តជនា ជនបទវាសិភាវំ បកាសេសិ. អថស្ស តេ កស្មា ភោ ឥមិនា ទុក្ខវាសេន វសិស្សសិ, ឯហិ អម្ហេហិ សទ្ធិំ ចោរកម្មំ ករោន្តោ វត្ថាលង្ការសម្បន្នោ បុត្តទារំ បោសេហិ. ឥមិនា កបណវាសេន ន វសាតិ អាហំសុ. សោ បនិមេ យុត្តំ កថេន្តីតិ តេសំ វចនំ សម្បដិច្ឆិ. អថ តេ ឯវំ សតិ អម្ហេហិ សទ្ធិំ អាគច្ឆាហីតិ វត្វា នំ គហេត្វា អន្តោនគរំ បវិដ្ឋា តត្ថ តត្ថ វិលុម្បន្តា ចោរកម្មំ អកំសុ. តទា ជានបទិកោ លទ្ធវិភវោ ឥមមេវ វរតរន្តិ តេហិ សទ្ធិំ ចោរកម្មំ ករោន្តោ ជីវិកំ កប្បេសិ, អថេកទិវសំ រាជបុរិសា កតកម្មេ តេ សព្ពេវ គហេត្វា បច្ឆាពាហំ គាឡ្ហំ ពន្ធិត្វា កោសលរញ្ញោ ទស្សេសុំ, រាជា តេ ទិស្វា ឯវមាហ, ភណេ តុម្ហាកំ អន្តរេ យោ ឯតេសំ មារេត្វា ជីវិតក្ខយំ បាបេស្សតិ, តស្ស ជីវិតទានំ ទម្មីតិ, តំ សុត្វា តេ ចោរា សព្ពេ អញ្ញមញ្ញញាតិសុហទសម្ពន្ធភាវេន តំ ន ឥច្ឆិំសុ. សោ បន ជនបទវាសី មនុស្សោ អហមេតេ សព្ពេ មារេស្សាមីតិ រញ្ញោ វត្វា តេនានុញ្ញាតោ តេ សព្ពេ មារេសិ. តំ ទិស្វា តុដ្ឋោ រាជា តស្ស ចោរឃាតកម្មំ អទាសិ. សោ ចោរេ ច វជ្ឈប្បត្តេ ច មារេន្តោ បញ្ចវីសតិវស្សានិ វសន្តោ អបរភាគេ មហល្លកោ អហោសិ. អថ សោ មន្ទពលត្តា កតិបយបហារេនាបិ ចោរំ មារេតុំ ន សក្កោតិ, រាជា តំ ញត្វា អញ្ញស្ស ចោរឃាតកម្មំ អទាសិ. អថ សោ ចោរឃាតកម្មា [ចោរឃាតកម្ម ឥតិបិកត្ថចិ] បរិហីនោ អត្តនោ គេហេ វសតិ. តទា អញ្ញតរោ មនុស្សោ មន្តំ បរិវត្តេត្វា នាសាវាតេន មនុស្សមារណកមន្តំ ជានាតិ. តថាហិ ហត្ថបាទកណ្ណនាសសីសាទីសុ យំកិញ្ចិ ឆេជ្ជភេជ្ជំ កត្តុកាមោ មន្តំ បរិវត្តេត្វា នាសាវាតំ វិស្សជ្ជេតិ. តំ តំ ឋានំ ឆិជ្ជតិ ភិជ្ជតិ, ឯវំ មហានុភាវោ សោ មន្តោ, អថ សោ តំ បុរិសំ ឧបដ្ឋហិត្វា មន្តំ លភិត្វា រញ្ញោ សាសនំ បេសេសិ. អហំ ឥតោ បុព្ពេ មហល្លកត្តា ចោរានំ ហត្ថបាទាទយោ ទុក្ខេន ឆេជ្ជ ភេជ្ជំ ករោមិ, មារេតព្ពេបិ ទុក្ខេន មារេមិ. ឥទានិ បនាហំ តថា ន ករោមិ, មម មន្តានុភាវេន ឆេជ្ជភេជ្ជកម្មំ ករិស្សាមីតិ. រាជា តំ សាសនំ សុត្វា សាធូតិ តំ បក្កោសាបេត្វា ឋានន្តរំ តស្សេវ បាកតិក មកាសិ. សោ តតោ បដ្ឋាយ តំ កម្មំ ករោន្តោ បុន បញ្ចវស្សានិ អតិក្កាមេសិ. សោ មហល្លកោ ខីណាយុកោ ទុព្ពលោ មរណមញ្ចបរាយណោ ហុត្វា មរណវេទនាទុក្ខេន មហន្តេន ភយានកេន សទ្ទេន វិស្សរំ វិរវន្តោ និមីលិតេន ចក្ខុនា ភយានកំ នរកគ្គិជាលាបជ្ជលន្តអយកូដមុគ្គរធរេ និរយបាលេ ច បស្សន្តោ និបន្នោ ហោតិ, តតោ តស្ស បដិវិស្សកគេហេ មនុស្សា តស្ស ភយានកសទ្ទសវណេន គេហំ ឆដ្ដេត្វា បលាយិំសុ. តស្មិំ កិរ ទិវសេ មហាសារិបុត្តត្ថេរោ ទិព្ពចក្ខុនា លោកំ ឱលោកេន្តា តំ ចោរឃាតកំ តទហេវ កាលំកត្វា និរយេ និព្ពត្តមានំ ទិស្វា មយិ តត្ថ គតេ បនេស មយិ បសាទេន សគ្គេ និព្ពត្តតីតិ ញត្វា អជ្ជ មយា តស្សានុគ្គហំ កាតុំ វដ្ដតីតិ បុព្ពណ្ហសមយំ និវាសេត្វា តស្ស ឃរទ្វារ មគមាសិ. អថ សោ ថេរំ ទិស្វា កុទ្ធោ កោបេន តដតដាយមានទេហោ អជ្ជ តំ វិជ្ឈិត្វា ផាលេត្វា មារេស្សាមីតិ និបន្នោវ មន្តំ បរិវត្តេត្វា នាសាវាតំ វិស្សជ្ជេសិ, ថេរោ តស្មិំ ខណេ និរោធសមាបន្នោ និរោធា វុដ្ឋាយ សុរិយោ វិយ វិរោចមានោ អដ្ឋាសិ, អថ សោ ថេរស្ស តយោ វារេ តថេវ កត្វា កិញ្ចិ កាតុំ អសក្កោន្តោ អតិវិយ វិម្ហិតចិត្តោ ថេរេ ចិត្តំ បសាទេត្វា អត្តនោ បដិយត្តំ បាយសំ ថេរស្ស ទាបេសិ, ថេរោ មង្គលំ វឌ្ឍេត្វា វិហារមេវ អគមាសិ, ចោរឃាតកោ ថេរស្ស ទិន្នទានំ អនុស្សរន្តោ តស្មិំ ខណេ កាលំ កត្វា សគ្គេ និព្ពត្តិ. អហោ វីតរាគានំ ពុទ្ធបុត្តានំ អានុភាវោ. ឯវំ នរកេ និព្ពត្តមានោបិស្ស ពលេន សគ្គេ និព្ពត្តោតិ. តថាហិ.

១. ទានំ តាណំ មនុស្សានំ, ទានំ ទុគ្គតិវារណំ;

ទានំ សគ្គស្ស សោបានំ, ទានំ សន្តិករំ បរំ.

២. ឥច្ឆិតិច្ឆិតទានេន, ទានំ ចិន្តាមណី វិយ;

កប្បរុក្ខោវ សត្តានំ, ទានំ ភទ្ទឃដោវិយ.

៣. សីលវន្តស្ស ទានេន, ចក្កវត្តិសិរិម្បិ ច;

លភន្តិ សក្កសម្បត្តិំ, តថា លោកុត្តរំ សុខំ.

៤. បាបកម្មេសុ និរតោ, ឋិតោយំ នរកាយនេ [នរកាវនេ ឥតិបិកត្ថចិ];

សារិបុត្តស្ស ថេរស្ស, បិណ្ឌបាតស្ស វាហសា.

៥. អបាយំ បរិវជ្ជេត្វា, នេកទុក្ខសមាកុលំ;

ទេវសង្ឃបរិព្ពូឡ្ហោ, គតោ ទេវបុរំ វរំ.

៦. តស្មា សុខេត្តេ សទ្ធាយ, ទេថ ទានានិ កាមទំ;

ទានំ ទេន្តេហិ សីលម្បិ, បាលនីយំតិសុន្ទរន្តិ [បាលនំចាតិសុន្ទរំ ឥតិបិកត្ថចិ].

អថ ភិក្ខូ ធម្មសភាយំ សន្និបតិត្វា និសិន្នា ភគវន្តំ បុច្ឆិំសុ, កិំភន្តេ សោ បាបោ ចតូសុ អបាយេសុ កតរស្មិំ និព្ពត្តោតិ. អថ សត្ថា អជ្ជេស ភិក្ខវេ សារិបុត្តស្ស ទិន្នទានានុភាវេន ទេវលោកេ និព្ពត្តោ, តស្សេវ និស្សន្ទេន អនាគតេ បច្ចេកពុទ្ធោ ភវិស្សតីតិ ព្យាកាសីតិ.

៧. ភោ សារិបុត្តេ និហិតប្បទានំ,

ខណេន បាបេតិ ហិ សគ្គមគ្គំ;

តស្មា សុខេត្តេសុ ទទាថ ទានំ,

កាមត្ថ ចេ សគ្គមោក្ខំ បរត្ថ.

ចោរឃាតកវត្ថុំ ឆដ្ឋមំ.