៩. ឆត្តុបាហនវគ្គ, ១២. ទ្វាទសម សិក្ខាបុច្ឆា

បុច្ឆា – អនោកាសកតំ អាវុសោ ភិក្ខុំ បញ្ហំ បុច្ឆន្តិយា បាចិត្តិយំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ សម្ពហុលា ភិក្ខុនិយោ អារព្ភ បញ្ញត្តំ, សម្ពហុលា ភន្តេ ភិក្ខុនិយោ អនោកាសកតំ ភិក្ខុំ បញ្ហំ បុច្ឆិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – សប្បិំ វា អាវុសោ តេលំ វា មធុំ វា ផាណិតំ វា មច្ឆំ វា មំសំ វា ខីរំ វា ទធិំ វា វិញ្ញាបេត្វា ភុញ្ជន្តិយា បាដិទេសនីយំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយា ភិក្ខុនិយោ អារព្ភ បញ្ញត្តំ, ឆព្ពគ្គិយា ភន្តេ ភិក្ខុនិយោ សប្បិម្បិ តេលម្បិ មធុម្បិ ផាណិតម្បិ មច្ឆម្បិ មំសម្បិ ខីរម្បិ ទធិម្បិ វិញ្ញាបេត្វា ភុញ្ជិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ចតុន្នំ អាវុសោ វិបត្តីនំ កតមា វិបត្តិ.

វិស្សជ្ជនា – អាចារវិបត្តិ ភន្តេ.

បុច្ឆា – ឆន្នំ អាវុសោ អាបត្តិសមុដ្ឋានានំ កតិហិ សមុដ្ឋានេហិ សមុដ្ឋាតិ.

វិស្សជ្ជនា – ចតូហិ ភន្តេ សមុដ្ឋានេហិ សមុដ្ឋាតិ, សិយា កាយតោ សមុដ្ឋាតិ, នវាចតោ នចិត្តតោ, សិយា កាយតោ ច វាចតោ ច សមុដ្ឋាតិ, នចិត្តតោ, សិយា កាយតោ ច ចិត្តតោ ច សមុដ្ឋាតិ, នវាចតោ, សិយា កាយតោ ច វាចតោ ច ចិត្តតោ ច សមុដ្ឋាតិ, ឥមេហិ ភន្តេ ចតូហិ សមុដ្ឋានេហិ សមុដ្ឋាតិ.

បុច្ឆា – កា អាវុសោ វិបត្តិ.

វិស្សជ្ជនា – អសំវរោ ភន្តេ វិបត្តិ.

បុច្ឆា – កា អាវុសោ សម្បត្តិ.

វិស្សជ្ជនា – សំវរោ ភន្តេ សម្បត្តិ.

បុច្ឆា – កា អាវុសោ បដិបត្តិ.

វិស្សជ្ជនា – ន ឯវរូបំ ករិស្សាមីតិ យាវជីវំ អាបាណកោដិកំ សមាទាយ សិក្ខតិ សិក្ខាបទេសុ, អយំ ភន្តេ បដិបត្តិ.

បុច្ឆា – កស្ស អាវុសោ វចនំ.

វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.

បុច្ឆា – កេនាវុសោ អាភតំ.

វិស្សជ្ជនា – បរម្បរាយ ភន្តេ អាភតំ.

សុណាតុ មេ ភន្តេ សង្ឃោ…បេ… សំគាយេយ្យាម.