៣. បត្តវគ្គោ, ១០. បរិណត សិក្ខាបុច្ឆា

បុច្ឆា – យំ តេន អាវុសោ ភគវតា បស្សតា អរហតា សម្មាសម្ពុទ្ធេន ជានំ សង្ឃិកំ លាភំ អត្ថនោ បរិណាមេន្តស្ស និស្សគ្គិយំ បាចិត្តិយំ កត្ថ បញ្ញត្តំ.

វិស្សជ្ជនា – សាវត្ថិយំ ភន្តេ បញ្ញត្តំ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – ឆព្ពគ្គិយេ ភន្តេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ជានំ សង្ឃិកំ លាភំ បរិណតំ អត្តនោ បរិណាមេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ជានំ អាវុសោ សង្ឃិកំ លាភំ បរិណតំ អត្តនោ បរិណាមេន្តោ, កតិ អាបត្តិយោ អាបជ្ជតិ.

វិស្សជ្ជនា – ជានំ ភន្តេ សង្ឃិកំ លាភំ បរិណតំ អត្តនោ បរិណាមេន្តោ ទ្វេ អាបត្តិយោ អាបជ្ជតិ, បរិណាមេតិ បយោគេ ទុក្កដំ, បរិណាមិតេ និស្សគ្គិយំ បាចិត្តិយំ, ជានំ ភន្តេ សង្ឃិកំ លាភំ បរិណតំ អត្តនោ បរិណាមេន្តោ ឥមា ទ្វេ អាបត្តិយោ អាបជ្ជតិ.

បុច្ឆា – កស្ស អាវុសោ វចនំ.

វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.

បុច្ឆា – កេនាវុសោ អាភតំ.

វិស្សជ្ជនា – បរម្បរាយ ភន្តេ អាភតំ.

បុច្ឆា – អត្ថិ នុខោ អាវុសោ តត្ថ កោចិបិ វិរទ្ធទោសោ.

វិស្សជ្ជនា – នត្ថិ ភន្តេ.

សំគាយនត្ថាយ ញាបនំ

សុណាតុ មេ ភន្តេ សង្ឃោ, អហំ ភន្តេ ឥមេសំ សោឡសន្នំ និស្សគ្គិយបាចិត្តិយសិក្ខាបទានំ និទានាទីនិ អនេកានិ បុច្ឆិតព្ពានិ អាយស្មន្តំ វិចិត្តសារាភិវំសំ តិបិដកធរ ធម្មភណ្ឌាគារិកំ បុច្ឆិំ, សោ ច បុដ្ឋោ បុដ្ឋោ វិស្សជ្ជេតិ, ឥតិហិទំ ភន្តេ សិក្ខាបទសញ្ជាតំ និម្មលំ សុ បរិសុទ្ធំ តស្សេវ ភគវតោ វចនំ អរហតោ សម្មាសម្ពុទ្ធស្ស, តស្មា យថា បុរេ មហាកស្សបាទយោ មហាថេរ វរា បោរាណសំគីតិការា ព្រហ្មចរិយសង្ខាតស្ស ពុទ្ធសាសនស្ស ចិរដ្ឋិតិយា ពហុជនហិតាយ ពហុជនសុខាយ លោកានុកម្បាយ អត្ថាយ ហិតាយ សុខាយ ទេវមនុស្សានំ ធម្មវិនយំ សំគាយិំសុចេវ អនុសំគាយិំសុច, ឯវមេវ មយម្បិ ទានិ ឆដ្ឋសំគីតិ មហាធម្មសភាបរិយាបន្នា ឥមានិ សិក្ខាបទានិ យថានុប្បត្តដ្ឋានតោ បដ្ឋាយ ឯកតោ គណសជ្ឈាយំ កត្វា សំគាយេយ្យាម.

បាចិត្តិយបាឡិ