២. កោសិយវគ្គ ៩. រូបិយសំវោហារ សិក្ខាបុច្ឆា

បុច្ឆា – រូបិយសំវោហារំ អាវុសោ សមាបជ្ជន្តស្ស និស្សគ្គិយំ បាចិត្តិយំ ភគវតា កត្ថ បញ្ញត្តំ.

វិស្សជ្ជនា – សាវត្ថិយំ ភន្តេ បញ្ញត្តំ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – ឆព្ពគ្គិយេ ភន្តេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ នានប្បការកំ រូបិយសំវោហារំ សមាបជ្ជិំសុ, តស្មិំ ភន្តេ វត្ថុស្មិំ បញ្ញត្តំ.

២. កោសិយវគ្គ, ១០. កយវិក្កយ សិក្ខាបុច្ឆា

បុច្ឆា – នានប្បការកំ អាវុសោ កយវិក្កយំ អាបជ្ជន្តស្ស និស្សគ្គិយំ បាចិត្តិយំ ភគវតា កត្ថ បញ្ញត្តំ.

វិស្សជ្ជនា – សាវត្ថិយំ ភន្តេ បញ្ញត្តំ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – អាយស្មន្តំ ភន្តេ ឧបនន្ទំ សក្យបុត្តំ អារព្ភ បញ្ញត្តំ, អាយស្មា ភន្តេ ឧបនន្ទោ សក្យបុត្តោ បរិព្ពាជកេន សទ្ធិ កយវិក្កយំ សមាបជ្ជិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កថំ អាវុសោ តត្ថ បដិបជ្ជន្តោ ភិក្ខុ កយវិក្កយំ សមាបជ្ជតិនាម.

វិស្សជ្ជនា – ឥមិនា ឥមំ ទេហិ ឥមិនា ឥមំ អាហរ ឥមិនា ឥមំ បរិវត្តេហិ ឥមិនា ឥមំ ចេតាមេហីតិ អជ្ឈាចរតិ, ឯវំ ខោ ភន្តេ បដិបជ្ជន្តោ កយវិក្កយំ សមាបជ្ជតិនាម.

បុច្ឆា – កថំ អាវុសោ តត្ថ បដិបជ្ជន្តោ ភិក្ខុ ន កយវិក្កយំ សមាបជ្ជតិនាម.

វិស្សជ្ជនា – យោ ភន្តេ អគ្ឃំ បុច្ឆតិ, យោ ច ភន្តេ កប្បិយការកស្ស អាចិក្ខតិ, យោ ច ភន្តេ អម្ហាកញ្ច ឥទំ អត្ថិ អម្ហាកញ្ច ឥមិនា ច ឥមិនា ច អត្ថោតិ ភណតិ, ឯវំ ខោ ភន្តេ បដិបជ្ជន្តោ ភិក្ខុ ន កយវិក្កយំ សមាបជ្ជតិនាម.