៣. បត្តវគ្គ, ១. បត្ត សិក្ខាបុច្ឆា

បុច្ឆា – អតិរេកបត្តំ អាវុសោ ទសាហំ អតិក្កាមេន្តស្ស និស្សគ្គិយំ បាចិត្តិយំ កត្ថ បញ្ញត្តំ.

វិស្សជ្ជនា – សាវត្ថិយំ ភន្តេ បញ្ញត្តំ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – ឆព្ពគ្គិយេ ភន្តេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ អតិរេកបត្តំ ធារេសុំ, តស្មិំ ភន្តេ វត្ថុស្មិំ បញ្ញត្តំ.

៥១៤. ៣. បត្តវគ្គ, ២. ឩនបញ្ចពន្ធន សិក្ខាបុច្ឆា

បុច្ឆា – ឩនបញ្ចពន្ធនេន បត្តេន អញ្ញំ នវំ បត្តំ ចេតាបេន្តស្ស និស្សគ្គិយំ បាចិត្តិយំ កត្ថ បញ្ញត្តំ.

វិស្សជ្ជនា – សក្កេសុ ភន្តេ បញ្ញត្តំ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – ឆព្ពគ្គិយេ ភន្តេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ អប្បមត្តកេនបិ ភិន្នេន អប្បមត្តកេនបិ ខណ្ឌេន វិលិខិតមត្តេនបិ ពហូ បត្តេ វិយ្យាបេសុំ, តស្មិំ ភន្តេ វត្ថុស្មិំ បញ្ញត្តំ.

ន ភិក្ខវេ បត្តោ វិញ្ញាបេតព្ពោ, យោ វិញ្ញាបេយ្យ អាបត្តិ ទុក្កដស្ស.