២. កោសិយវគ្គ ៨. រូបិយ សិក្ខាបុច្ឆា

បុច្ឆា – រូបិយំ អាវុសោ បដិគ្គណ្ហន្តស្ស និស្សគ្គិយំ បាចិត្តិយំ ភគវតា កត្ថ បញ្ញត្តំ.

វិស្សជ្ជនា – រាជគហេ ភន្តេ បញ្ញត្តំ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – អាយស្មន្តំ ភន្តេ ឧបនន្ទំ សក្យបុត្តំ អារព្ភ បញ្ញត្តំ, អាយស្មា ភន្តេ ឧបនន្ទោ សក្យបុត្តោ រូបិយំ បដិគ្គហេសិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កថំ អាវុសោ តត្ថ បដិបជ្ជន្តោ រូបិយំ បដិគ្គណ្ហាតិ នាម.

វិស្សជ្ជនា – សយំ ភន្តេ គណ្ហាតិ, អញ្ញំ វា គណ្ហាបេសិ, ឥទំ អយ្យស្ស ហោតូតិ ឧបនិក្ខិត្តំ សាទិយតិ, ឯវំ ខោ ភន្តេ បដិបជ្ជន្តោ ភិក្ខុ រូបិយំ បដិគ្គណ្ហាតិ នាម.

បុច្ឆា – កថំ អាវុសោ តត្ថ បដិបជ្ជន្តោ ភិក្ខុ រូបិយំ ន បដិគ្គណ្ហាតិ នាម.

វិស្សជ្ជនា – យថា ភន្តេ រាជសិក្ខាបទេ យថា ច ភន្តេ មេណ្ឌកសិក្ខាបទេ អាគច្ឆតិ, តថា ភន្តេ បដិបជ្ជន្តោ ភិក្ខុ រូបិយំ ន បដិគ្គណ្ហាតិនាម.