៨-៩. ទុដ្ឋទោស សង្ឃាទិសេស សិក្ខាបុច្ឆា

បុច្ឆា – យំ តេន អាវុសោ ភគវតា…បេ… សម្មាសម្ពុទ្ធេន ភិក្ខុំ អមូលកេន បារាជិកេន ធម្មេន អនុទ្ធំសេន្តស្ស ច, ភិក្ខុំ អញ្ញភាគិយស្ស អធិករណស្ស កិញ្ចិទេសំ លេសមត្តំ ឧបាទាយ បារាជិកេន ធម្មេន អនុទ្ធំសេន្តស្ស ច សង្ឃាទិសេសោ កត្ថ បញ្ញត្តោ.

វិស្សជ្ជនា – រាជគហេ ភន្តេ បញ្ញត្តោ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តោ.

វិស្សជ្ជនា – មេត្តិយភូមជកា ភន្តេ ភិក្ខូ អារព្ភ បញ្ញត្តោ, មេត្តិយភូមជកា ភន្តេ ភិក្ខូ អាយស្មន្តំ ទព្ពំ មល្លបុត្តំ អមូលកេន បារាជិកេន ធម្មេន អនុទ្ធំសេសុំ, តេយេវ ភន្តេ មេត្តិយភូមជកា ភិក្ខូ អាយស្មន្តំ ទព្ពំ មល្លបុត្តំ អញ្ញភាគិយស្ស អធិករណស្ស កិញ្ចិទេសំ លេសមត្តំ ឧបាទាយ បារាជិកេន ធម្មេន អនុទ្ធំសេសុំ, តស្មិំ ភន្តេ វត្ថុស្មិំ, បញ្ញត្តោ.