១៣. កុលទូសក សង្ឃាទិសេស សិក្ខាបុច្ឆា

បុច្ឆា – យំ តេន អាវុសោ ភគវតា…បេ… សម្មាសម្ពុទ្ធេន កុលទូសកស្ស ភិក្ខុនោ យាវតតិយំ សមនុភាសនាយ អប្បដិនិស្សជ្ជន្តស្ស សង្ឃាទិសេសោ កត្ថ បញ្ញត្តោ.

វិស្សជ្ជនា – សាវត្ថិយំ ភន្តេ បញ្ញត្តោ.

បុច្ឆា – កំ អារព្ភ អាវុសោ កិស្មិំ វត្ថុស្មិំ បញ្ញត្តោ.

វិស្សជ្ជនា – អស្សជិ បុនព្ពសុកេ ភន្តេ ភិក្ខូ អារព្ភ បញ្ញត្តោ, អស្សជិបុនព្ពសុកា ភន្តេ ភិក្ខូ សង្ឃេន បព្ពាជនីយកម្មកតា ឆន្ទគាមិតា ទោសគាមិតា មោហគាមិតា ភយគាមិតា បាបេសុំ, តស្មិំ ភន្តេ វត្ថុស្មិំ បញ្ញត្តោ.

អនិយត សិក្ខាបុច្ឆា

បុច្ឆា – យំ តេន អាវុសោ ភគវតា…បេ… សម្មាសម្ពុទ្ធេន បឋមោ ច អនិយតោ ទុតិយោ ច អនិយតោ កត្ថ បញ្ញត្តោ.

វិស្សជ្ជនា – សាវត្ថិយំ ភន្តេ បញ្ញត្តោ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តោ.

វិស្សជ្ជនា – អាយស្មន្តំ ភន្តេ ឧទាយិំ អារព្ភ បញ្ញត្តោ, អាយស្មា ភន្តេ ឧទាយី មាតុគាមេន សទ្ធិំ ឯកោឯកាយ រហោ បដិច្ឆន្នេ អាសនេ អលំកម្មនិយេ និសជ្ជំ កប្បេសិ, តស្មិញ្ច វត្ថុស្មិំ, អាយស្មាយេវ ភន្តេ ឧទាយី មាតុគាមេន សទ្ធិំ រហោ និសជ្ជំ អកាសិ, តស្មិញ្ច ភន្តេ វត្ថុស្មិំ បញ្ញត្តោ.

បុច្ឆា – កស្ស អាវុសោ វចនំ.

វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.

បុច្ឆា – កេនាវុសោ អាភតំ.

វិស្សជ្ជនា – បរម្បរាយ ភន្តេ អាភតំ.

បុច្ឆា – អត្ថិ នុខោ អាវុសោ ឯត្ថ កោចិបិ វិរទ្ធទោសោ.

វិស្សជ្ជនា – នត្ថិ ភន្តេ.

សំគាយនត្ថាយ សង្ឃស្សញាបនំ

សុណាតុ មេ ភន្តេ សង្ឃោ, អហំ ភន្តេ អាយស្មន្តំ វិចិត្តសារាភិវំសំ តិបិដកធរ ធម្មភណ្ឌាគារិកំ បឋម ទុដ្ឋទោស សិក្ខាបទតោ បដ្ឋាយ បុច្ឆិតព្ពានិ អនេកានិ ឋានានិ បុច្ឆិំ, សោ ច អាយស្មា បុដ្ឋោ បុដ្ឋោ វិស្សជ្ជេតិ, ឥតិហិទំ ភន្តេ សព្ពំ សិក្ខាបទំ និម្មលំ សុបរិសុទ្ធំ តស្សេវ ភគវតោ វចនំ អរហតោ សម្មាសម្ពុទ្ធស្ស, តស្មា យថាបុរេ មហាកស្សបាទយោ មហាថេរវរា បោរាណសំគីតិការា ព្រហ្មចរិយស្ស ចិរដ្ឋិតិយា ពហុជនហិតាយ ពហុជនសុខាយ លោកានុកម្បាយ អត្ថាយ ហិតាយ សុខាយ ទេវមនុស្សានំ សំគាយិំសុចេវ អនុសំគាយិំសុច, ឯវមេវ មយម្បិ ទានិ សព្ពេវ ឆដ្ឋសំគីតិ មហាធម្មសភាបរិយាបន្នា ឥមានិ សិក្ខាបទានិ ឯកតោ គណសជ្ឈាយំ កត្វា សំគាយេយ្យាម.