៤. សមថក្ខន្ធក

បុច្ឆា – អសម្មុខីភូតានំ អាវុសោ ភិក្ខូនំ តជ្ជនីយំ វា និយស្សំ វា បព្ពាជនីយំ វា បដិសារណីយំ វា ឧក្ខេបនីយំ វា កម្មំ ករោន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ អសម្មុខីភូតានំ ភិក្ខូនំ កម្មំ អកំសុ តជ្ជនីយម្បិ និយស្សម្បិ បព្ពាជនីយម្បិ បដិសារណីយម្បិ ឧក្ខេបនីយម្បិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – សតិវេបុល្លបត្តស្ស អាវុសោ ភិក្ខុនោ សតិវិនយំ ទានំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ មេត្តិយភូមជកេ ភិក្ខូ អារព្ភ អនុញ្ញាតំ មេត្តិយភូមជកា ភន្តេ ភិក្ខូ អាយស្មន្តំ ទព្ពំ មល្លបុត្តំ អមូលិកាយ សីលវិបត្តិយា អនុទ្ធំសេសុំ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – កតិបនាវុសោ ឯត្ថ ធម្មិកានិ សតិវិនយទានានិ.

វិស្សជ្ជនា – បញ្ចិមានិ ភន្តេ ធម្មិកានិ សតិវិនយស្ស ទានានិ, សុទ្ធោ ហោតិ ភិក្ខុ អនាបត្តិកោ, អនុវទន្តិ ច នំ, យាចតិ ច, តស្ស សង្ឃោ សតិវិនយំ ទេតិ ធម្មេន សមគ្គេន, ឥមានិ ខោ ភន្តេ បញ្ច ធម្មិកានិ សតិ វិនយស្ស ទានានិ.

បុច្ឆា – អមូឡ្ហស្ស អាវុសោ ភិក្ខុនោ អមូឡ្ហវិនយំ ទាតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ គគ្គំ ភិក្ខុំ ឧម្មត្តកេន ចិត្តវិបរិយាសកតេន អជ្ឈាចិណ្ណេន អាបត្តិយា ចោទេសុំ ‘‘សរតា យស្មា ឯវរូបិំ អាបត្តិំ អាបជ្ជិតា’’តិ, សោ ឯវំ វទេតិ ‘‘អហំ ខោ អាវុសោ ឧម្មត្តកោ អហោសិ ចិត្តវិបរិយាសកតោ, តេន មេ ឧម្មត្តកេន ចិត្តវិបរិយាសកតេន ពហុំ អស្សាមណកំ អជ្ឈាចិណ្ណំ ភាសិតបរិក្កន្តំ, នាហំ តំ សរាមិ, មូឡ្ហេន មេ ឯតំ កត’’ន្តិ. ឯវម្បិ នំ វុច្ចមានា ចោទេន្តេវ ‘‘សរតា យស្មា ឯវរូបិំ អាបត្តិំ អាបជ្ជិតា’’តិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – កតិ អាវុសោ អធម្មិកានិ អមូឡ្ហវិនយស្ស ទានានិ, វិភជិត្វា កថេហិ.

វិស្សជ្ជនា – តីណិ ភន្តេ អធម្មិកានិ អមូឡ្ហវិនយស្ស ទានានិ, ឥធ ភន្តេ ភិក្ខុ អាបត្តិំ អាបន្នោ ហោតិ, តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា ‘‘សរតាយស្មា ឯវរូបិំ អាបត្តិំ អាបជ្ជិតា’’តិ, សោ សរមានោវ ឯវំ វទេតិ ‘‘ន ខោ អហំ អាវុសោ សរាមិ ឯវរូបិំ អាបត្តិំ អាបជ្ជិតា’’តិ. អញ្ញោ សរមានោវ ឯវំ វទេតិ ‘‘សរាមិ ខោ អហំ អាវុសោ យថា សុបិនន្តេនា’’តិ. អញ្ញោ អនុម្មត្តកោវ ឧម្មត្តកាលយំ ករោតិ ‘‘អហម្បិ ខោ ឯវំ ករោមិ, តុម្ហេបិ ឯវំ ករោថ, មយ្ហម្បិ ឯតំ កប្បតិ, តុម្ហាកម្បេតំ កប្បតី’’តិ. ឯសំ សង្ឃោ អមូឡ្ហវិនយំ ទេតិ, អធម្មិកំ ភន្តេ អមូឡ្ហវិនយស្ស ទានំ. ឥមានិ ខោ ភន្តេ តីណិ អធម្មិកានិ អមូឡ្ហវិនយស្ស ទានានិ.

បុច្ឆា – កតិ អាវុសោ ធម្មិកានិ អមូឡ្ហវិនយស្ស ទានានិ, វិភជិត្វា កថេហិ.

វិស្សជ្ជនា – តីណិ ភន្តេ ធម្មិកានិ អមូឡ្ហវិនយស្ស ទានានិ, ឥធ ភន្តេ ភិក្ខុ ឧម្មត្តកោ ហោតិ ចិត្តវិបរិយាសកតោ តេន ឧម្មត្តកេន ចិត្តវិបរិយាសកតេន ពហុំ អស្សាមណកំ អជ្ឈាចិណ្ណំ ហោតិ ភាសិតបរិក្កន្តំ, តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា ‘‘សរតាយស្មា ឯវរូបិំ អាបត្តិំ អាបជ្ជិតា’’តិ, សោ អស្សរមានោវ ឯវំ វទេតិ ‘‘ន ខោ អហំ អាវុសោ សរាមិ ឯវរូបិំ អាបត្តិំ អាបជ្ជិតា’’តិ. អញ្ញោបិ អស្សរមានោវ ឯវំ វទេតិ ‘‘សរាមិ ខោ អហំ អាវុសោ យថា សុបិនន្តេនា’’តិ. អញ្ញោបិ ឧម្មត្តកោវ ឧម្មត្តកាលយំ ករោតិ ‘‘អហម្បិ ឯវំ ករោមិ, តុម្ហេបិ ឯវំ ករោថ, មយ្ហម្បិ ឯតំ កប្បតិ, តុម្ហាកម្បេតំ កប្បតី’’តិ. ឯសំ ភន្តេ តិណ្ណំ ភិក្ខូនំ សង្ឃោ អមូឡ្ហវិនយំ ទេតិ, ធម្មិកំ ភន្តេ អមូឡ្ហវិនយស្ស ទានំ. ឥមានិ ខោ ភន្តេ តីណិ ធម្មិកានិ អមូឡ្ហវិនយស្ស ទានានិ.

បុច្ឆា – អប្បដិញ្ញាយ អាវុសោ ភិក្ខូនំ តជ្ជនីយាទីនិ កម្មានិ ករោន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ អប្បដិញ្ញាយ ភិក្ខូនំ កម្មានិ អកំសុ តជ្ជនីយាទីនិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កថំ អាវុសោ អធម្មិកំ ហោតិ បដិញ្ញាតករណំ.

វិស្សជ្ជនា – អញ្ញថា ភន្តេ អាបត្តិំ អាបជ្ជន្តស្ស អញ្ញថា បដិជានន្តស្ស យថា សោ បដិជានាតិ, តថា សង្ឃោ ការេតិ, ឯវំ ខោ ភន្តេ អធម្មិកំ ហោតិ បដិញ្ញាតករណំ.

បុច្ឆា – កថំ អាវុសោ ធម្មិកំ ហោតិ បដិញ្ញាតករណំ.

វិស្សជ្ជនា – យំ ភន្តេ អាបត្តិំ អាបជ្ជន្តស្ស តមេវ បដិជានន្តស្ស តេនេវ សង្ឃោ ការេតិ, ឯវំ ខោ ភន្តេ ធម្មិកំ បដិញ្ញាតករណំ.

បុច្ឆា – យេភុយ្យសិកាយ អាវុសោ អធិករណំ វូបសមេតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ ភណ្ឌនជាតា កលហជាតា វិវាទាបន្នា អញ្ញមញ្ញំ មុខសត្តីហិ វិតុទន្តា វិហរិំសុ, ន សក្កោន្តិ តំ អធិករណំ វូបសមេតុំ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – កថំ អាវុសោ អធិករណំ យេភុយ្យសិកាយ វូបសមេតព្ពំ.

វិស្សជ្ជនា – បញ្ចហិ ភន្តេ អង្គេហិ សមន្នាគតោ ភិក្ខុ សលាកគ្គាហាបកោ សម្មន្និតព្ពោ, តេន ភន្តេ សលាកគ្គាហាបកេន សលាកា គាហាតព្ពា យថា ពហុតរា ភិក្ខូ ធម្មវាទិនោ វទន្តិ តថា តំ អធិករណំ វូបសមេតព្ពំ, ឯវំ ខោ ភន្តេ យេភុយ្យសិកាយ អធិករណំ វូបសមេតព្ពំ.

បុច្ឆា – កតិ អាវុសោ អធម្មិកា សលាកគ្គាហា.

វិស្សជ្ជនា – ទស ភន្តេ អធម្មិកា សលាកគ្គាហា, ឱរមត្តកញ្ច អធិករណំ ហោតិ, ន ច គតិគតំ ហោតិ, ន ច សរិតសារិតំ ហោតិ, ជានាតិ ‘អធម្មវាទី ពហុតរា’តិ, អប្បេវ នាម អធម្មវាទី ពហុតរា អស្សូតិ, ជានាតិ ‘សង្ឃោ ភិជ្ជិស្សតី’តិ, អប្បេវ នាម សង្ឃោ ភិជ្ជេយ្យាតិ, អធម្មេន គណ្ហន្តិ, វគ្គា គណ្ហន្តិ, ន ច យថាទិដ្ឋិយា គណ្ហន្តិ, ឥមេ ខោ ភន្តេ ទស អធម្មិកា កលាកគ្គាហា.

បុច្ឆា – កតិ អាវុសោ ធម្មិកា សលាកគ្គាហា.

វិស្សជ្ជនា – ទស ភន្តេ ធម្មិកា សលាកគ្គាហា វុត្តវិបរិយាយេន.

បុច្ឆា – បាបុស្សន្នស្ស អាវុសោ ភិក្ខុស្ស តស្ស បាបិយសិកា កម្មំ កាតុំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឧបវាឡំ ភិក្ខុំ អារព្ភ បញ្ញត្តំ, ឧបវាឡោ ភន្តេ ភិក្ខុ សង្ឃមជ្ឈេ អាបត្តិយា អនុយុញ្ជិយមានោ អវជានិត្វា បដិជានាតិ, បដិជានិត្វា អវជានាតិ, អញ្ញេនញ្ញំ បដិចរតិ, សម្បជានមុសា ភាសតិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កតិ អាវុសោ ធម្មិកានិ តស្សបាបិយសិកា កម្មស្ស ករណានិ.

វិស្សជ្ជនា – បញ្ចិមានិ ភន្តេ ធម្មិកានិ តស្សបាបិយសិកា កម្មស្ស ករណានិ. អសុចិ ច ហោតិ, អលជ្ជី ច, សានុវាទោ ច, តស្ស សង្ឃោ តស្សបាបិយសិកា កម្មំ ករោតិ ធម្មេន សមគ្គេន, ឥមានិ ខោ ភន្តេ បញ្ច ធម្មិកានិ តស្ស បាបិយសិកា កម្មស្ស ករណានិ.

បុច្ឆា – តស្ស បាបិយសិកាកម្មកតេន អាវុសោ ភិក្ខុនា កតិសុ វត្តេសុ សម្មា វត្តិតព្ពំ.

វិស្សជ្ជនា – តស្ស បាបិយសិកាកម្មកតេន ភន្តេ ភិក្ខុនា អដ្ឋារសសុ វត្តេសុ សម្មា វត្តិតព្ពំ. ន ឧបសម្បាទេតព្ពំ, ន និស្សយោ ទាតព្ពោ, ន សាមណេរោ ឧបដ្ឋាបេតព្ពោ, ឯវមាទីសុ ភន្តេ អដ្ឋារសសុ វត្តេសុ សម្មា វត្តិតព្ពំ.

បុច្ឆា – កតិ អាវុសោ អធិករណានិ សមថេហិ វូបសមេតព្ពានិ.

វិស្សជ្ជនា – ចត្តារិមានិ ភន្តេ អធិករណានិ សមថេហិ វូបសមេតព្ពានិ, វិវាទាធិករណំ អនុវាទាធិករណំ អាបត្តាធិករណំ កិច្ចាធិករណំ, ឥមានិ ភន្តេ ចត្តារិ អធិករណានិ សមថេហិ វូបសមេតព្ពានិ.

បុច្ឆា – កិំ អាវុសោ វិវាទាធិករណស្ស មូលំ.

វិស្សជ្ជនា – ឆ ភន្តេ វិវាទមូលានិ វិវាទាធិករណស្ស មូលំ, តីណិបិ អកុសលមូលានិ វិវាទាធិករណស្ស មូលំ, តីណិបិ កុសលមូលានិ វិវាទាធិករណស្ស មូលំ, ឥទំ ភន្តេ វិវាទាធិករណស្ស មូលំ.

បុច្ឆា – កិំ បនាវុសោ អនុវាទាធិករណស្ស មូលំ.

វិស្សជ្ជនា – ឆ ភន្តេ អនុវាទមូលានិ អនុវាទាធិករណស្ស មូលំ, តីណិបិ អកុសលមូលានិ អនុវាទាធិករណស្ស មូលំ, តីណិបិ កុសលមូលានិ អនុវាទាធិករណស្ស មូលំ, កាយោបិ អនុវាទាធិករណស្ស មូលំ, វាចាបិ អនុវាទាធិករណស្ស មូលំ, ឥទំ ខោ ភន្តេ អនុវាទាធិករណស្ស មូលំ.

បុច្ឆា – កិំ បនាវុសោ អាបត្តាធិករណស្ស មូលំ.

វិស្សជ្ជនា – ឆ ភន្តេ អាបត្តិសមុដ្ឋានា អាបត្តាធិករណស្ស មូលំ, អត្តិ ភន្តេ អាបត្តិ កាយតោ សមុដ្ឋាតិ ន វាចតោ ន ចិត្តតោ, អត្ថិ ភន្តេ អាបត្តិ វាចតោ សមុដ្ឋាតិ ន កាយតោ ន ចិត្តតោ, អត្ថិ ភន្តេ អាបត្តិ កាយតោ ច វាចតោ ច សមុដ្ឋាតិ ន ចិត្តតោ, អត្ថិ ភន្តេ អាបត្តិ កាយតោ ច ចិត្តតោ ច សមុដ្ឋាតិ ន វាចតោ, អត្ថិ ភន្តេ អាបត្តិ វាចតោ ច ចិត្តតោ ច សមុដ្ឋាតិ ន កាយតោ, អត្ថិ ភន្តេ អាបត្តិ កាយតោ ច វាចតោ ច ចិត្តតោ ច សមុដ្ឋាតិ, ឥមានិ ភន្តេ ឆ អាបត្តិ សមុដ្ឋានានិ អាបត្តាធិករណស្ស មូលំ.

បុច្ឆា – កិំ បនាវុសោ កិច្ចាធិករណស្ស មូលំ.

វិស្សជ្ជនា – កិច្ចាធិករណស្ស ភន្តេ ឯកំ មូលំ សង្ឃោ.

បុច្ឆា – សមថំ អាវុសោ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – សមថំ ភន្តេ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ទ្វេ អាបត្តិយោ.