១. កម្ពក្ខន្ធក

បុច្ឆា – ភណ្ឌនាទិការកស្ស អាវុសោ ភិក្ខុនោ តជ្ជនីយកម្មំ កាតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ បណ្ឌុកលោហិតកេ ភិក្ខូ អារព្ភ អនុញ្ញាតំ, បណ្ឌុកលោហិតកា ភន្តេ ភិក្ខូ អត្តនា ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា, យេបិ ចញ្ញេ ភិក្ខូ ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា តេ ឧបសង្កមិត្វា ឯវមាហំសុ ‘‘មា ខោ តុម្ហេ អាយស្មន្តោ ឯសោ អជេសិ, ពលវាពលវំ បដិមន្តេថ, តុម្ហេ តេន បណ្ឌិតតរា ច ព្យត្តតរា ច ពហុស្សុតតរា ច អលមត្តតរា ច, មា ចស្ស ភាយិត្ថ, មយម្បិ តុម្ហាកំ បក្ខា ភវិស្សាមា’’តិ, តេន អនុប្បន្នានិ ចេវ ភណ្ឌនានិ ឧប្បជ្ជន្តិ, ឧប្បន្នានិ ច ភណ្ឌនានិ ភិយ្យោភាវាយ វេបុល្លាយ សំវត្តន្តិ. តស្មិំ ភន្តេ វត្ថុស្មិំ អនុញ្ញាតំ.

បុច្ឆា – តជ្ជនីយកម្មកតស្ស អាវុសោ ភិក្ខុនោ កតិសុ វត្តេសុ សម្មា វត្តន្តស្ស តំ កម្មំ បដិប្បស្សម្ភេតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – អដ្ឋារសសុ ភន្តេ វត្តេសុ សម្មា វត្តន្តស្ស តជ្ជនីយកម្មកតស្ស ភិក្ខុនោ តំ កម្មំ បដិប្បស្សម្ភេតុំ ភគវតា សាវត្ថិយំ អនុញ្ញាតំ, តេយេវ បណ្ឌុកលោហិតកា ភិក្ខូ សង្ឃេន តជ្ជនីយកម្មកតា សម្មា វត្តិត្វា សង្ឃំ ឧបសង្កមិត្វា យាចិំសុ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – ពាលស្ស អាវុសោ អព្យត្តស្ស អាបត្តិពហុលស្ស អនបទានស្ស គិហិសំសដ្ឋស្ស អននុលោមិកេហិ គិហិសំសគ្គេហិ និយស្សកម្មំ កាតុំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អាយស្មន្តំ សេយ្យសកំ អារព្ភ បញ្ញត្តំ, អាយស្មា ភន្តេ សេយ្យសកោ ពាលោ អហោសិ អព្យត្តោ អាបត្តិពហុលោ អនបទានោ គិហិសំសដ្ឋោ វិហាសិ អននុលោមិកេហិ គិហិសំសគ្គេហិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – និយស្សកម្មកតស្ស អាវុសោ ភិក្ខុនោ កតិសុ វត្តេសុ សម្មា វត្តន្តស្ស តំ កម្មំ បដិប្បស្សម្ភេតុំ ភគវតា អនុញ្ញាតំ.

វិស្សជ្ជនា – អដ្ឋារសសុ ភន្តេ វត្តេសុ សម្មា វត្តន្តស្ស និយស្ស កម្មកតស្ស ភិក្ខុនោ តំ កម្មំ បដិប្បស្សម្ភេតុំ ភគវតា អនុញ្ញាតំ, ន ឧបសម្បាទេតព្ពំ, ន និស្សយោ ទាតព្ពោ, ន សាមណេរោ ឧបដ្ឋាបេតព្ពោ, ន ភិក្ខុនោវាទកសម្មុតិ សាទិតព្ពា, សម្មតេនបិ ភិក្ខុនិយោ ន ឱវទិតព្ពា, ឯវមាទីសុ ភន្តេ អដ្ឋារសសុ វត្តេសុ សម្មា វត្តន្តស្ស និយស្សកម្មកតស្ស ភិក្ខុនោ តំ កម្មំ បដិប្បស្សម្ភេតុំ ភគវតា អនុញ្ញាតំ.

បុច្ឆា – កុលទូសកស្ស អាវុសោ បាបសមាចារស្ស ភិក្ខុនោ បព្ពាជនីយកម្មំ កាតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ អស្សជិបុនព្ពសុកេ ភិក្ខូ អារព្ភ អនុញ្ញាតំ, អស្សជិបុនព្ពសុកា ភន្តេ ភិក្ខូ កីដាគិរិស្មិំ កុលទូសកា អហេសុំ បាបសមាចារា, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – បដិសារណីយកម្មំ អាវុសោ បុច្ឆាមិ, សទ្ធំ អាវុសោ បសន្នំ គហបតិំ ទាយកំ ការកំ សង្ឃុបដ្ឋាកំ ហីនេន ខុំសេន្តស្ស ភិក្ខុនោ បដិសារណីយកម្មំ កាតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ អាយស្មន្តំ សុធម្មំ អារព្ភ អនុញ្ញាតំ, ភគវតិ ភន្តេ សាវត្ថិយំ វិហរតិ អាយស្មា សុធម្មោ មច្ឆិកាសណ្ឌេ ចិត្តំ គហបតិំ សទ្ធំ បសន្នំ ទាយកំ ការកំ សង្ឃុបដ្ឋាកំ ហីនេន ខុំសេសិ ហីនេន វម្ភេសិ, តស្មិំ ភន្តេ វត្ថុស្មិំ អនុញ្ញាតំ.

តេនហិ ភិក្ខវេ សង្ឃោ សុធម្មស្ស ភិក្ខុនោ បដិសារណីយកម្មំ ករោតុ ‘‘ចិត្តោ តេ គហបតិ ខមាបេតព្ពោ’’តិ –

បុច្ឆា – បដិសារណីយកម្មកតស្ស អាវុសោ ភិក្ខុនោ អនុទូតំ ទាតុញ្ច តេន អនុទូតេន សទ្ធិំ គន្ត្វា យថាខុំសិតំ គហបតិំ ខមាបេតុំ ច ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ អាយស្មន្តំយេវ សុធម្មំ អារព្ភ អនុញ្ញាតំ, អាយស្មា ភន្តេ សុធម្មោ មច្ឆិកាសណ្ឌំ គន្ត្វា មង្កុភូតោ នាសក្ខិ ចិត្តំ គហបតិំ ខមាបេតុំ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – បដិសារណីយកម្មកតស្ស អាវុសោ ភិក្ខុនោ កតិសុ វត្តេសុ សម្មា វត្តន្តស្ស តំ កម្មំ បដិប្បស្សម្ភេតុំ ភគវតា អនុញ្ញាតំ.

វិស្សជ្ជនា – អដ្ឋារសសុ ភន្តេ វត្តេសុ សម្មា វត្តន្តស្ស បដិសារណីយ កម្មកតស្ស ភិក្ខុនោ តំ កម្មំ បដិប្បស្សម្ភេតុំ ភគវតា អនុញ្ញាតំ.

បុច្ឆា – អាបត្តិំ អាវុសោ អាបជ្ជិត្វា តំ អាបត្តិំ បស្សិតុំ វា បដិកាតុំ វា ន ឥច្ឆន្តស្ស ភិក្ខុនោ អាបត្តិយា អទស្សនេ វា អប្បដិកម្មេ វា ឧក្ខេបនីយកម្មំ កាតុំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – កោសម្ពិយំ ភន្តេ អាយស្មន្តំ ឆន្នត្ថេរំ អារព្ភ បញ្ញត្តំ, អាយស្មា ភន្តេ ឆន្នោ អាបត្តិំ អាបជ្ជិត្វា ន ឥច្ឆិ តំ អាបត្តិំ បស្សិតុំ វា បដិកាតុំ វា, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អាបត្តិយា អាវុសោ អទស្សនេន វា អប្បដិកម្មេ វា ឧក្ខេបនីយ កម្មកតេន ភិក្ខុនា កតិសុ វត្តេសុ សម្មា វត្តិតព្ពំ.

វិស្សជ្ជនា – តេចត្តាលីសាយ ភន្តេ វត្តេសុ សម្មា វត្តិតព្ពំ.

បុច្ឆា – ឧក្ខេបនីយកម្មកតស្ស អាវុសោ ភិក្ខុនោ សម្មា វត្តន្តស្ស តំ កម្មំ បដិប្បស្សម្ភេតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – កោសម្ពិយំ ភន្តេ អាយស្មន្តំយេវ ឆន្នំ អារព្ភ អនុញ្ញាតំ, អាយស្មា ភន្តេ ឆន្នោ សង្ឃេន អាបត្តិយា អទស្សនេ វា អប្បដិកម្មេ វា ឧក្ខេបនីយកម្មកតោ សម្មា វត្តេសិ លោមំបាតេសិ នេត្ថារំ វត្តេសិ សង្ឃំ ឧបសង្កមិត្វា តស្ស កម្មស្ស បដិប្បស្សទ្ធិយា យាចិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – បាបិកំ អាវុសោ ទិដ្ឋិំ គហេត្វា តំ ទិដ្ឋិំ ន បដិនិស្សជ្ជន្តស្ស បាបិកាយ ទិដ្ឋិយា អប្បដិនិស្សគ្គេ ឧក្ខេបនីយកម្មំ កាតុំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អរិដ្ឋំ ភិក្ខុំ គទ្ធពាធិបុព្ពំ អារព្ភ បញ្ញត្តំ, ភគវតិ ភន្តេ សាវត្ថិយំ វិហរតិ អរិដ្ឋស្ស នាម ភិក្ខុនោ គទ្ធពាធិបុព្ពស្ស ឯវរូបំ បាបកំ ទិដ្ឋិគតំ ឧប្បន្នំ អហោសិ ‘‘តថាហំ ភគវតា ធម្មំ ទេសិតំ អាជានាមិ, យថាយេមេ អន្តរាយិកា ធម្មា វុត្តា ភគវតា, តេ បដិសេវតោ នាលំ អន្តរាយាយា’’តិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – បាបិកាយ អាវុសោ ទិដ្ឋិយា អប្បដិនិស្សគ្គេ ឧក្ខេបនីយកម្មកតេន ភិក្ខុនា កតិសុ វត្តេសុ សម្មា វត្តិតព្ពំ.

វិស្សជ្ជនា – តេចត្តាលីសាយ ភន្តេ វត្តេសុ សម្មា វត្តិតព្ពំ.

បុច្ឆា – កម្មក្ខន្ធកំ បុច្ឆិស្សំ, សនិទានិ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – កម្មក្ខន្ធកំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ឯកា អាបត្តិ.