៨. ចីវរក្ខន្ធក

ជីវកវត្ថុ

បុច្ឆា – គហបតិចីវរំ អាវុសោ សាទិយិតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ ជីវកំ កោមារភច្ចំ អារព្ភ អនុញ្ញាតំ, ជីវកោ ភន្តេ កោមារភច្ចោ ភិក្ខូនំ គហបតិចីវរំ អនុជានិតុំ ភគវន្តំ យាចិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – ឆ អាវុសោ រជនានិ ភគវតា កត្ថ អនុញ្ញាតានិ, កិស្មិំ វត្ថុស្មិំ អនុញ្ញាតានិ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ អនុញ្ញាតានិ, សម្ពហុលា ភន្តេ ភិក្ខូ ឆកណេនបិ បណ្ឌុមត្តិកាយបិ ចីវរំ រជិំសុ, ចីវរំ ទុព្ពណ្ណំ ហោតិ, តស្មិំ ភន្តេ វត្ថុស្មិំ អនុញ្ញាតានិ.

បុច្ឆា – អច្ឆិន្នកានិ អាវុសោ ចីវរានិ ធារេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ អច្ឆិន្នកានិ ចីវរានិ ធារេសុំ ទន្តកសាវានិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កទា អាវុសោ ភគវា អនុញ្ញាសិ ឆិន្នកំ សង្ឃាដិំ ឆិន្នកំ ឧត្តរាសង្គំ ឆិន្នកំ អន្តរវាសកំ.

វិស្សជ្ជនា – ទក្ខិណាគិរិតោ ភន្តេ បច្ឆាគតកាលេ ភគវា អនុញ្ញាសិ ឆិន្នកំ សង្ឃាដិំ ឆិន្នកំ ឧត្តរាសង្គំ ឆិន្នកំ អន្តរវាសកំ.

បុច្ឆា – អគ្គឡំ ច អាវុសោ តុន្នញ្ច ឱវដ្ដិកញ្ច កណ្ឌុសកញ្ច ទឡ្ហីកម្មញ្ច ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – ពារាណសិយំ ភន្តេ អញ្ញតរំ ភិក្ខុំ អារព្ភ អនុញ្ញាតំ, អញ្ញតរោ ភន្តេ ភិក្ខុ អគ្គឡំ អច្ឆុបេសិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – វស្សិកសាដិកា ច អាវុសោ អាគន្តុកភត្តញ្ច គមិកភត្តញ្ច គិលានភត្តញ្ច គិលានុបដ្ឋាកភត្តញ្ច គិលានភេសជ្ជញ្ច ធុវយាគុ ច ភិក្ខុនិសង្ឃស្ស ឧទកសាដិកាចាតិ ឥមា អដ្ឋ ភគវតា កត្ថ អនុញ្ញាតា, កំ អារព្ភ កិស្មិំ វត្ថុស្មិំ អនុញ្ញាតា.

វិស្សជ្ជនា – សាវត្ថិយំ ភន្តេ វិសាខំ មិគារមាតរំ អារព្ភ អនុញ្ញាតា, វិសាខា ភន្តេ មិគារមាតា ភគវន្តំ អដ្ឋវរានិ យាចិ, តស្មិំ ភន្តេ វត្ថុស្មិំ អនុញ្ញាតា.

បុច្ឆា – ភគវតា អាវុសោ មាតាបិតូនំ ទានំ អនុជានិត្វា សទ្ធាទេយ្យំ វិនិបាតេន្តស្ស ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អញ្ញតរំ ភិក្ខុំ អារព្ភ បញ្ញត្តំ, អញ្ញតរស្ស ភន្តេ ភិក្ខុនោ ពហុំ ចីវរំ ឧប្បន្នំ អហោសិ, សោ ច តំចីវរំ មាតាបិតូនំ ទាតុកាមោ អហោសិ, តស្មិំ ភន្តេ វត្ថុស្មិំ បញ្ញត្តំ.

មាតាបិតរោតិ ខោ ភិក្ខវេ ទទមានេ កិំ វទេយ្យាម, អនុជានាមិ ភិក្ខវេ មាតាបិតូនំ ទាតុំ, ន ច ភិក្ខវេ សទ្ធាទេយ្យំ វិនិបាតេតព្ពំ, យោ វិនិបាតេយ្យ អាបត្តិ ទុក្កដស្ស –

បុច្ឆា – អញ្ញត្រ វស្សំ វុដ្ឋេន អាវុសោ អញ្ញត្រ ចីវរភាគំ សាទិយន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អាយស្មន្តំ ឧបនន្ទំ សក្យបុត្តំ អារព្ភ បញ្ញត្តំ, អាយស្មា ភន្តេ ឧបនន្ទោ សក្យបុត្តោ អញ្ញត្រ វស្សំ វុដ្ឋោ អញ្ញត្រ ចីវរភាគំ សាទិយិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាថកំ អាវុសោ ភិក្ខុំ គិលានំ ន ឧបដ្ឋហន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អញ្ញតរំ ភិក្ខុំ អារព្ភ បញ្ញត្តំ, ភគវតិ ភន្តេ សាវត្ថិយំ វិហរតិ អញ្ញតរស្ស ភិក្ខុនោ កុច្ឆិវិការាពាធោ អហោសិ, សោ សកេ មុត្តករីសេ បលិបន្នោ សយិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – នគ្គិយំ អាវុសោ តិត្ថិយសមាទានំ សមាទិយន្តស្ស ថុល្លច្ចយំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អញ្ញតរំ ភិក្ខុំ អារព្ភ បញ្ញត្តំ, អញ្ញតរោ ភន្តេ ភិក្ខុ នគ្គិយំ តិត្ថិយសមាទានំ សមាទិយិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – សព្ពនីលកានិ វា អាវុសោ ចីវរានិ សព្ពបីតកានិ វា សព្ពលោហិតកានិ វា សព្ពមញ្ជិដ្ឋកានិ វា សព្ពកណ្ហានិវាតិ ឯវរូបានិ ចីវរានិ ធារេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ សព្ពនីលកាទីនិ ចីវរានិ ធារេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កញ្ចុកំ វា អាវុសោ វេឋនំ វា ធារេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេវ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ កញ្ចុកម្បិ ធារេសុំ វេឋនម្បិ ធារេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ចីវរសញ្ញុត្តំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – ចីវរសញ្ញុត្តំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ តិស្សោ អាបត្តិយោ.