យក្ខសំយុត្ត

ឥន្ទកសុត្ត

បុច្ឆា – យក្ខសំយុត្តេ បនាវុសោ បឋមំ សំគីតំ ឥន្ទកសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – រាជគហេ ភន្តេ ឥន្ទកូដេ បព្ពតេ ឥន្ទកស្ស យក្ខស្ស ភវនេ ឥន្ទកំ យក្ខំ អារព្ភ ភាសិតំ. ឥន្ទកោ ភន្តេ យក្ខោ អត្តវាទោ ភគវន្តំ ឧបសង្កមិត្វា គាថាយ អជ្ឈភាសិ–

‘‘រូបំ ន ជីវន្តិ វទន្តិ ពុទ្ធា,

កថំ ន្វយំ វិន្ទតិមំ សរីរំ;

កុតស្ស អដ្ឋីយកបិណ្ឌមេភិ,

កថំ ន្វយំ សជ្ជតិ គព្ភរស្មិ’’ន្តិ.

តស្មិំ ភន្តេ វត្ថុស្មិំ–

‘‘បឋមំ កលលំ ហោតិ, កលលា ហោតិ អព្ពុទំ,

អព្ពុទា ជាយតេ បេសិ, បេសិ និព្ពត្តតី ឃនោ;

ឃនា បសាខា ជាយន្តិ, កេសា លោមា នខាបិច;

យញ្ចស្ស ភុញ្ជតី មាតា, អន្នំ បានញ្ច ភោជនំ;

តេន សោ តត្ថ យាបេតិ, មាតុកុច្ឆិគតោនរោ’’តិ.

ឯវំ ខោ ភន្តេ ភគវតា ភាសិតំ.

អាឡវកសុត្ត

បុច្ឆា – តេនាវុសោ ភគវតា…បេ… សម្មាសម្ពុទ្ធេន យក្ខសំយុត្តេ អាឡវកសុត្តំ កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – អាឡវិយំ ភន្តេ អាឡវកស្ស យក្ខស្ស ភវនេ អាឡវកំ យក្ខំ អារព្ភ ភាសិតំ. អាឡវកោ ភន្តេ យក្ខោ ភគវន្តំ គាថាយ អជ្ឈភាសិ–

កិំ សូធវិត្តំ បុរិសស្ស សេដ្ឋំ,

កិំ សុ សុចិណ្ណំ សុខមាវហាតិ;

កិំ សុ ហវេ សាទុតរំ រសានំ,

កថំ ជីវិំ ជីវិតាមាហុ សេដ្ឋន្តិ.

តស្មិំ ភន្តេ វត្ថុស្មិំ–

សទ្ធីច វិត្តំ បុរិសស្ស សេដ្ឋំ,

ធម្មោ សុចិណ្ណោ សុខមាវហាតិ;

សច្ចំ ហវេ សាទុតរំ រសានំ,

បញ្ញាជីវិំ ជីវិតមាហុ សេដ្ឋន្តិ.

ឯវមាទិនា ភន្តេ ភគវតា ភាសិតំ.

ន ខ្វាហំ តំ អាវុសោ និក្ខមិស្សាមិ, យំ តេ ករណីយំ, តំ ករោហិ,

បញ្ហំ តំ សមណ បុច្ឆិស្សាមិ, សចេ មេ ន ព្យាករិស្សសិ, ចិត្តំ វា តេ ខិបិស្សាមិ, ហទយំ វា តេ ផាលេស្សាមិ, បាទេសុ វា គហេត្វា បារគង្គាយ ខិបិស្សាមិ–

កិំ សូខ វិត្តំ បុរិសស្ស សេដ្ឋំ, កិំ សុ សុចិណ្ណំ សុខមាវហាតិ;

កិំ សុ ហវេ សាទុភរំ រសានំ, កថំ ជីវិំ ជីវិតមាហុ សេដ្ឋំ–

សទ្ធីធ វិត្តំ បុរិសស្ស សេដ្ឋំ, ធម្មោ សុចិណ្ណោ សុខមាវហាតិ;

សច្ចំ ហវេ សាទុតរំ រសានំ, បញ្ញាជីវិំ ជីវិតមាហុ សេដ្ឋំ;

កថំសុ តរតិ ឱឃំ, កថំសុ តរតិ អណ្ណវំ;

កថំសុ ទុក្ខ មច្ចេតិ, កថំសុ បរិសុជ្ឈតិ.

សទ្ធាយ តរតិ ឱឃំ, អប្បមាទេន អណ្ណវំ;

វីរិយេន ទុក្ខ មច្ចេតិ, បញ្ញាយ បរិសុជ្ឈតិ–

កថំសុ លភតេ បញ្ញំ, កថំសុ វិន្ទតេ ធនំ;

កថំសុ កិត្តិំ បប្បោតិ, កថំ មិត្តានិ គន្ថតិ;

អស្មា លោកា បរំ លោកំ, កថំ បេច្ច ន សោចតិ–

សទ្ទហានោ អរហតំ, ធម្មំ និព្ពានបត្តិយា;

សុស្សូសំ លភតេ បញ្ញំ, អប្បមត្តោ វិចក្ខណោ;

បតិរូបការី ធុរវា, ឧដ្ឋាតា វិន្ទតេ ធនំ;

សច្ចេន កិត្តិំ បប្បោតិ, ទទំ មិត្តានិ គន្ថតិ;

អស្មា លោកា បរំ លោកំ, ឯវំ បេច្ច ន សោចតិ;

យស្សេតេ ចតុរោ ធម្មា, សទ្ធស្ស ឃរមេសិនោ;

សច្ចំ ធម្មោ ធិតិ ចាគោ, ស វេ បេច្ចន សោចតិ–