សគាថាវគ្គបាឡិ

សំគាយនស្ស បុច្ឆា វិស្សជ្ជនា

បុច្ឆា – បឋមមហាសំគីតិកាលេ អាវុសោ ធម្មសំគាហកា មហាកស្សបាទយោ មហាថេរវរា បោរាណសំគីតិការា បឋមំ វិនយបិដកំ សំគាយិត្វា តទនន្តរំ សុត្តន្តបិដកំ សំគាយន្តា ទីឃនិកាយញ្ច មជ្ឈិមនិកាយញ្ច សំគាយិត្វា តទនន្តរំ កិំនាម បាវចនំ សំគាយិំសុ.

វិស្សជ្ជនា – បឋមមហាសំគីតិកាលេ ភន្តេ ធម្មសំគាហកា មហាកស្សបាទយោ បោរាណថេរវរា បឋមំ វិនយបិដកំ សំគាយិត្វា តទនន្តរំ សុត្តន្តបិដកំ សំគាយន្តា ទីឃនិកាយញ្ច មជ្ឈិមនិកាយញ្ច សំគាយិត្វា តទនន្តរំ សត្តហិ ច សុត្តសហស្សេហិ សត្តហិ ច សុត្តសតេហិ ទ្វាសដ្ឋិយា ច សុត្តេហិ បដិមណ្ឌិតំ ភាណវារសតបរិមាណំ សំយុត្តនិកាយំ នាម បាវចនំ សំគាយិំសុ.

បុច្ឆា – សំយុត្តនិកាយេ ច អាវុសោ សគាថាវគ្គោ និទានវគ្គោ ខន្ធវគ្គោ សឡាយតនវគ្គោ មហាវគ្គោតិ បញ្ចសំយុត្តប្បករណានិ, តេសុ បឋមំ កតរំ សំយុត្តប្បករណំ តេ សំគាយិំសុ.

វិស្សជ្ជនា – បញ្ចសុ ភន្តេ សំយុត្តប្បករណេសុ បឋមំ សគាថាវគ្គសំយុត្តប្បករណំ សំគាយិំសុ.

បុច្ឆា – សគាថាវគ្គេបិ អាវុសោ ទេវតាសំយុត្តាទិវសេន ឯកាទសសំយុត្តានិ, តេសុ បឋមំ កតរំ សំយុត្តំ តេ សំគាយិំសុ.

វិស្សជ្ជនា – ឯកាទសសុ ភន្តេ សំយុត្តេសុ បឋមំ ទេវតាសំយុត្តំ សំគាយិំសុ.

បុច្ឆា – ទេវតាសំយុត្តេបិ អាវុសោ នឡវគ្គាទយោ អដ្ឋ វគ្គា, ឱឃតរណសុត្តាទីនិ ច ឯកាសីតិ សុត្តានិ, តេសុ បឋមំ កតរំ វគ្គំ កតរញ្ច សុត្តំ សគាយិំសុ.

វិស្សជ្ជនា – អដ្ឋសុ ភន្តេ វគ្គេសុ បឋមំ នឡវគ្គំ ឯកាសីតិយា ច សុត្តេសុ បឋមំ ឱឃតរណសុត្តំ សំគាយិំសុ.

សាធុ សាធុ អាវុសោ, មយម្បិ ទានិ តតោយេវ បដ្ឋាយ សំគីតិបុព្ពង្គមានិ បុច្ឆនវិស្សជ្ជនកិច្ចានិ អាវហិតុំ សមារភារ.

ទេវតាសំយុត្ត

ឱឃតរណសុត្ត

បុច្ឆា – តេនាវុសោ ភគវតា ជានតា បស្សតា អរហតា សម្មាសម្ពុទ្ធេន ឱឃតរណសុត្តំ កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ អញ្ញតរំ ទេវតំ អារព្ភ ភាសិតំ, អញ្ញតរា ភន្តេ ទេវតា អភិក្កន្តាយ រត្តិយា អភិក្កន្តវណ្ណា កេវលកប្បំ ជេតវនំ ឱភាសេត្វា យេន ភគវា តេនុបសង្កមិ, ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋាសិ, ឯកមន្តំ ឋិតា ខោ សា ទេវតា ភគវន្តំ ឯតទវោច ‘‘កថំ នុ ត្វំ មារិស ឱឃមតរី’’តិ,

តស្មិំ ភន្តេ វត្ថុស្មិំ ‘‘អបតិដ្ឋំ ខ្វាហំ អាវុសោ អនាយូហំ ឱឃមតរិំ’’តិ, ឯវំ ខោ ភន្តេ ភគវតា ភាសិតំ.

អច្ចេន្តិសុត្ត

បុច្ឆា – អច្ចេន្តិសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ អញ្ញតរំ ទេវតំ អារព្ភ ភាសិតំ. អញ្ញតរា ភន្តេ ទេវតា ភគវន្តំ ឯតទវោច–

‘‘អច្ចេន្តិ កាលា តរយន្តិ រត្តិយោ,

វយោគុណា អនុបុព្ពំ ជហន្តិ,

ឯតំ ភយំ មរណេ បេក្ខមានោ,

បុញ្ញានិ កយិរាថ សុខាវហានី’’តិ–

តស្មិំ ភន្តេ វត្ថុស្មិំ –

‘‘អច្ចេន្តិ កាលា តរយន្តិ រត្តិយោ,

វយោគុណា អនុបុព្ពំ ជហន្តិ,

ឯតំ ភយំ មរណេ បេក្ខមានោ,

លោកាមិសំ បជហេ សន្តិបេក្ខោ’’តិ –

ឯវំ ខោ ភន្តេ ភគវតា ភាសិតំ.

សត្តិសុត្ត

បុច្ឆា – សត្តិសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ អញ្ញតរំ ទេវតំ អារព្ភ ភាសិតំ, អញ្ញតរា ភន្តេ ទេវតា ភគវន្តំ ឯតទវោច–

‘‘សត្តិយា វិយ ឱមដ្ឋោ, ឌយ្ហមានោវ មត្ថកេ;

កាមរាគប្បហានាយ, សតោ ភិក្ខុ បរិព្ពជេ’’តិ–

តស្មិំ ភន្តេ វត្ថុស្មិំ–

សត្តិយា វិយ ឱមដ្ឋោ ឌយ្ហមានោវ មត្ថកេ;

សក្កាយទិដ្ឋិប្បហានាយ, សតោ ភិក្ខុ បរិព្ពជេតិ;

ឯវំ ខោ ភន្តេ ភគវតា ភាសិតំ.

សត្តិយា វិយ ឱមដ្ឋោ, ឌយ្ហមានោវ មត្ថកេ;

កាមរាគប្បហានាយ, សតោ ភិក្ខុ បរិព្ពជេ –

សត្តិយា វិយ ឱមដ្ឋោ, ឌយ្ហមានោវ មត្ថកេ,

សក្កាយទិដ្ឋិប្បមានាយ, សតោ ភិក្ខុ បរិព្ពជេ –

ជដាសុត្ត

បុច្ឆា – ជដាសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ អញ្ញតរំ ទេវតំ អារព្ភ ភាសិតំ, អញ្ញតរា ភន្តេ ទេវតា ភវគន្តំ ឯតទវោច–

‘‘អន្តោ ជដា ពហិជដា, ជដាយ ជដិតា បជា;

តំ តំ គោតម បុច្ឆាមិ, កោ ឥមំ វិជដយេ ជដ’’ន្តិ–

តស្មិំ ភន្តេ វត្ថុស្មិំ –

សីលេ បតិដ្ឋាយ នរោ សបញ្ញោ, ចិត្តំ បញ្ញញ្ច ភាវយំ;

អាតាបី និបកោ ភិក្ខុ, សោ ឥមំ វិជដយេ ជដំ.

យេសំ រាគោ ច ទោសោ ច, អវិជ្ជា ច វិរាជិតា;

ខីណាសវា អរហន្តោ, តេសំ វិជដិតា ជដាតិ;

ឯវមាទិនា ភន្តេ ភគវតា ភាសិតំ.

សីលេ បតិដ្ឋាយ នរោ សបញ្ញោ, ចិត្តំ បញ្ញញ្ច ភាវយំ;

អាតាបី និបកោ ភិក្ខុ, សោ ឥមំ វិជដយេ ជដំ–

យេសំ រាគោ ច ទោសោ ច, អវិជ្ជា ច វិរាជិតា;

ខីណាសវា អរហន្តោ, តេសំ វិជដិតា ជដា–

យត្ថ នាមញ្ច រូបញ្ច, អសេសំ ឧបរុជ្ឈតិ;

បដិឃំ រូបសញ្ញា ច, ឯត្ថេសា ឆិជ្ជតេ ជដា.

អច្ឆរាសុត្ត

បុច្ឆា – អច្ឆរាសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ អញ្ញតរំ ទេវបុត្តំ អារព្ភ ភាសិតំ. អញ្ញតរោ ភន្តេ ទេវបុត្តោ ភគវន្តំ ឯតទវោច–

‘‘អច្ឆរាគណសង្ឃដ្ឋំ, បិសាច គណសេវិតំ;

វនន្តំ មោហនំ នាម, កថំ យាត្រា ភវិស្សតី’’តិ.

តស្មិំ ភន្តេ វត្ថុស្មិំ–

‘‘ឧជុកោ នាម សោ មគ្គោ, អភយា នាម សា ទិសា,

រថោ អកូជនោ នាម, ធម្មចក្កេហិ សំយុតោ.

ហិរី តស្ស អបាលម្ពោ, សត្យស្ស បរិវារណំ;

ធម្មាហំ សារថិំ ព្រូមិ, សម្មាទិដ្ឋិ បុរេជវំ.

យស្ស ឯតាទិសំ យានំ, ឥត្ថិយា បុរិសស្ស វា;

ស វេ ឯតេន យានេន, និព្ពានស្សេវ សន្តិកេ’’តិ.

ឯវំ ខោ ភន្តេ ភគវតា ភាសិតំ.

អច្ឆរាគណសង្ឃុដ្ឋំ, បិសាចគណសេវិតំ;

វនន្តំ មោហនំ នាម, កថំ យាត្រា ភវិស្សតិ–

ជរាសុត្ត

បុច្ឆា – ជរាសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ អញ្ញតរំ ទេវតំ អារព្ភ ភាសិតំ. អញ្ញតរា ភន្តេ ទេវតា ភគវន្តំ ឯតទវោច–

‘‘កិំ សុ យាវ ជរា សាធុ, កិំ សុ សាធុ បតិដ្ឋិតំ;

កិំ សុ នរានំ រតនំ, កិំ សុ ចោរេហិ ទូហរ’’ន្តិ.

តស្មិំ ភន្តេ វត្ថុស្មិំ–

‘‘សីលំ យាវ ជរា សាធុ, សទ្ធា សាធុ បតិដ្ឋិតា;

បញ្ញា នរានំ រតនំ, បុញ្ញំ ចោរេហិ ទូហរ’’ន្តិ.

ឯវំ ខោ ភន្តេ ភគវតា ភាសិតំ.

កិំ សុ យាវ ជរា សាធុ.

កិំ សុ សាធុ បតិដ្ឋិតំ.

កិំ សុ នរានំ រតនំ.

កិំ សុ ចោរេហិ ទូហរំ.

ទេវបុត្តសំយុត្ត

សុព្រហ្មសុត្ត

បុច្ឆា – តេនាវុសោ ភគវតា ជានតា បស្សតា អរហតា សម្មាសម្ពុទ្ធេន សុព្រហ្មសុត្តំ កត្ថ កំ អារព្ភ កិស្មិំ វត្ថុស្មិំ កតញ្ច ភាសិតំ. កីទិសោ ច តត្ថ ធម្មបដិគ្គាហកស្ស ធម្មស្សវនានិសំសោ អធិគតោ.

វិស្សជ្ជនា – រាជគហេ ភន្តេ សុព្រហ្មទេវបុត្តំ អារព្ភ ភាសិតំ. សុព្រហ្មា ភន្តេ ទេវបុត្តោ មរណភយភីតោ ភគវន្តំ ឧបសង្កមិត្វា ឯតទវោច–

‘‘និច្ចំ ឧត្រស្តមិទំ ចិត្តំ, និច្ចំ ឧព្ពិគ្គមិទំ មនោ;

អនុប្បន្នេសុ កិច្ឆេសុ, អថោ ឧប្បតិតេសុ ច;

សចេ អត្ថិ អនុត្រស្តំ, តំ មេ អក្ខាហិ បុច្ឆិតោ’’តិ–

តស្មិំ ភន្តេ វត្ថុស្មិំ.

‘‘នាញ្ញត្រ ពោជ្ជា តបសា, នាញ្ញត្រិន្ទ្រិយសំវរា;

នាញ្ញត្រ សព្ពនិស្សគ្គា, សោត្ថិំ បស្សាមិ បាណិន’’ន្តិ.

ឯវំ ខោ ភន្តេ ភគវតា ភាសិតំ. ទេសនាបរិយោសានេ ច ភន្តេ សុព្រហ្មស្ស ទេវបុត្តស្ស តស្មិំយេវ អាសនេ វិរជំ វីតមលំ ធម្មចក្ខុំ ឧទបាទិ, ‘‘យំកិញ្ចិ សមុទយធម្មំ, សព្ពំ តំ និរោធធម្ម’’ន្តិ.

និច្ចំ ឧត្រស្តមិទំ ចិត្តំ, និច្ចំ ឧព្ពិគ្គមិទំ មនោ;

អនុប្បន្នេសុ កិច្ឆេសុ, អថោ ឧប្បតិតេសុ ច;

សចេ អត្ថិ អនុត្រស្ត, តំ មេ អក្ខាហិ បុច្ឆិតោ-ហុ–

នាញ្ញត្រ ពោជ្ជា តបសា, នាញ្ញត្រិន្ទ្រិយសំវរា;

នាញ្ញត្រ សព្ពនិស្សគ្គា, សោត្ថិំ បស្សាមិ បាណិនំ–

រោហិតស្សសុត្ត

បុច្ឆា – រោហិតស្សសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ រោហិតស្សំ ទេវបុត្តំ អារព្ភ ភាសិតំ. រោហិតស្សោ ភន្តេ ទេវបុត្តោ ភគវន្តំ ឯតទវោច ‘‘យត្ថ នុ ខោ ភន្តេ ន ជាយតិ ន ជីយតិ ន មីយតិ ន ចវតិ ន ឧបបជ្ជតិ, សក្កា នុ ខោ សោ ភន្តេ គមនេន លោកស្ស អន្តោ ញាតុំ វា ទដ្ឋុំ វា បាបុណិតុំ វា’’តិ. តស្មិំ ភន្តេ វត្ថុស្មិំ ‘‘យត្ថ ខោ អាវុសោ ន ជាយតិ ន ជីយតិ ន មីយតិ ន ចវតិ ន ឧបបជ្ជតិ, នាហំ តំ គមនេន លោកស្ស អន្តំ ញាតេយ្យំ អដ្ឋេយ្យំ បត្តេយ្យន្តិ វទាមី’’តិ ឯវមាទិនា ភន្តេ ភគវតា ភាសិតំ.

កោសលសំយុត្ត

ទហរសុត្ត

បុច្ឆា – ទហរសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ រាជានំ បសេនទិំ កោសលំ អារព្ភ ភាសិតំ. រាជា ភន្តេ បសេនទិ កោសលោ យេន ភគវា តេនុបសង្កមិ, ឧបសង្កមិត្វា ភគវតា សទ្ធិំ សម្មោទិ, ឯកមន្តំ និសិន្នោ ខោ ភន្តេ រាជា បសេនទិ កោសលោ ភគវន្តំ ឯតទវោច ‘‘ភវម្បិ នោ គោតមោ ‘អនុត្តរំ សម្មាសម្ពោធិំ អភិសម្ពុទ្ធោ’តិ បដិជានាតី’’តិ. តស្មិំ ភន្តេ វត្ថុស្មិំ ‘‘យញ្ហិ តំ មហារាជ សម្មា វទមានោវទេយ្យ ‘អនុត្តរំ សម្មាសម្ពោធិំ អភិសម្ពុទ្ធោ’តិ, មមេវ តំ សម្មា វទមានោ វទេយ្យា’’តិ ឯវមាទិនា ភន្តេ ភគវតា ភាសិតំ.

តស្មា ហិ បណ្ឌិតោ បោសោ, សម្បស្សំ អត្ថមត្តនោ;

ភុជង្គមំ បាវកញ្ច, ខត្តិយញ្ច យសស្សិនំ;

ភិក្ខុញ្ច សីលសម្បន្នំ, សម្មទេវ សមាចរេ–

អត្តរក្ខិតសុត្ត

បុច្ឆា – អត្តរក្ខិតសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ រាជានំយេវ បសេនទិំ កោសលំ អារព្ភ ភាសិតំ. រាជា ភន្តេ បសេនទិ កោសលោ ភគវន្តំ ឧបសង្កមិត្វា ‘‘ឥធ មយ្ហំ ភន្តេ រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទី’’តិ ឯវមាទិកំ វចនំ អវោច. ភគវា ច ភន្តេ ឯវមេតំ មហារាជ ឯវមេតំ មហារាជាតិ ឯវមាទិនា វិភជិត្វា ភាសិតំ.

កាយេន សំវរោ សាធុ, សាធុ វាចាយ សំវរោ;

មនសា សំវរោ សាធុ, សាធុ, សព្ពត្ថ សំវរោ;

សព្ពត្ថ សំវុតោ លជ្ជី, រក្ខិតោតិ បវុច្ចតិ.

អប្បកសុត្ត

បុច្ឆា – អប្បកសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ រាជានំយេវ បសេនទិំ កោសលំ អារព្ភ ភាសិតំ. រាជា ភន្តេ បសេនទិ កោសលោ ភគវន្តំ ឧបសង្កមិត្វា ‘‘ឥធ មយ្ហំ ភន្តេ រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ អប្បកា តេ សត្តា លោកស្មិំ, យេ ឧឡារេ ឧឡារេ ភោគេ លភិត្វា ន ចេវ មជ្ជន្តិ ន ច បមជ្ជន្តិ, ន ច កាមេសុ គេធំ អាបជ្ជន្តី’’តិ ឯវមាទិកំ វចនំ អវោច. ភគវា ច ភន្តេ ‘‘ឯវមេតំ មហារាជ ឯវមេតំ មហារាជា’’តិ ឯវមាទិនា អប្បកសុត្តំ ភាសិតំ.

មល្លិកាសុត្ត

បុច្ឆា – មល្លិកាសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ រាជានំយេវ បសេនទិំ កោសលំ អារព្ភ ភាសិតំ. រាជា ភន្តេ បសេនទិ កោសលោ មល្លិកំ ទេវិំ ឯតទវោច ‘‘អត្ថិ នុ ខោ តេ មល្លិកេ កោចញ្ញោ អត្តនា បិយតរោ’’តិ. តស្មិំ វត្ថុស្មិំ សព្ពាទិសា អនុបរិគម្ម ចេតសាតិ ឯវមាទិនា ភន្តេ ភគវតា ភាសិតំ.

សព្ពា ទិសា អនុបរិគម្ម ចេតសា, នេវជ្ឈគា បិយតរមត្តនា ក្វចិ. ឯវំ បិយោ បុថុ អត្តា បរេសំ, តស្មា ន ហិំសេ បរមត្តកាមោ–

សត្តជដិលសុត្ត

បុច្ឆា – តេនាវុសោ ភគវតា…បេ… សម្មាសម្ពុទ្ធេន សត្តជដិលសុត្តំ កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ រាជានំ បសេនទិំ កោសលំ អារព្ភ ភាសិតំ. រាជា ភន្តេ បសេនទិ កោសលោ អចិរបក្កន្តេសុ សត្តសុ ច ជដិលេសុ សត្តសុ ច និគណ្ឋេសុ សត្តសុ ច អចេលកេសុ សត្តសុ ច ឯកសាដកេសុ សត្តសុ ច បរិព្ពាជកេសុ យេន ភគវា តេនុបសង្កមិ, ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ, ឯកមន្តំ និសិន្នោ ខោ ភន្តេ រាជា បសេនទិ កោសលោ ភគវន្តំ ឯតទវោច ‘‘យេ តេ ភន្តេ លោកេ អរហន្តោ វា អរហត្តមគ្គំ វា សមាបន្នា, ឯតេ តេសំ អញ្ញតរា’’តិ. តស្មិំ ភន្តេ វត្ថុស្មិំ ‘‘ទុជ្ជានំ ខោ ឯតំ មហារាជ តយា គិហិនា កាមភោគិនា បុត្តសម្ពាធសយនំ អជ្ឈាវសន្តេន កាសិណចន្ទនំ បច្ចនុភោន្តេន មាលាគន្ធវិលេបនំ ធារយន្តេន ជាតរូបរជតំ សាទិយន្តេន ‘‘ឥមេ វា អរហន្តោ, ឥមេ វា អរហត្តមគ្គំ សមាបន្នា’’តិ ឯវមាទិនា ភន្តេ ភគវតា ភាសិតំ.

ន វណ្ណរូបេន នរោ សុជានោ, ន វិស្សសេ ឥត្តរទស្សនេន;

សុសញ្ញតានញ្ហិ វិយញ្ជនេន, អសញ្ញតា លោកមិមំ ចរន្តិ.

បតិរូបកោ មត្តិកាកុណ្ឌលោវ, លោហឌ្ឍមាសោវ សុវណ្ណឆន្នោ;

ចរន្តិ លោកេ បរិវារឆន្នា, អន្តោ អសុទ្ធា ពហិសោភមានា-ហូ

បញ្ចរាជសុត្ត

បុច្ឆា – បញ្ចរាជសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ រាជានំយេវ បសេនទិំ កោសលំ អារព្ភ ភាសិតំ. រាជា ភន្តេ បសេនទិ កោសលោ ភគវន្តំ ឯតទវោច ‘‘កិំ នុ ខោ ភន្តេ កាមានំ អគ្គ’’ន្តិ. តស្មិំ ភន្តេ វត្ថុស្មិំ ‘‘មនាបបរិយន្តំ ខ្វាហំ មហារាជ បញ្ចសុ កាមគុណេសុ អគ្គន្តិ វទាមី’’តិ ឯវមាទិនា ភន្តេ ភគវតា ភាសិតំ.

ឥធ ភន្តេ អម្ហាកំ បញ្ចន្នំ រាជូនំ បញ្ចហិ កាមគុណេហិ សមប្បិតានំ សមង្គីភូតានំ បរិចារយមានានំ អយមន្តរាកថា ឧទបាទិំ ‘កិំ នុ ខោ កាមានំ អគ្គ’ន្តិ–

បទុមំ យថា កោកនទំ សុគន្ធំ, បាតោ សិយា ផុល្លមវីតគន្ធំ. អង្គីរសំ បស្ស វិរោចមានំ, តបន្តមាទិច្ចមិវន្តលិក្ខេ–

ទុតិយអបុត្តកសុត្ត

បុច្ឆា – ទុតិយអបុត្តកសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ រាជានំយេវ បសេនទិំ កោសលំ អារព្ភ ភាសិតំ. រាជា ភន្តេ បសេនទិ កោសលោ ភគវន្តំ ឧបសង្កមិត្វា ‘‘ឥធ ភន្តេ សាវត្ថិយំ សេដ្ឋិ គហបតិ កាលង្កតោ, តមហំ អបុត្តកំ សាបតេយ្យំ រាជន្តេបុរំ អតិហរិត្វា អាគច្ឆាមី’’តិ ឯវមាទិកំ វចនំ អវោច. ភគវា ច ភន្តេ ‘‘ឯវមេតំ មហារាជ, ឯវមេតំ មហារាជ, ភូតបុព្ពំ សោ មហារាជ សេដ្ឋិ គហបតិ តគ្គរសិខិំ នាម បច្ចេកសម្ពុទ្ធំ បិណ្ឌបាតេន បដិបាទេសី’’តិ ឯវមាទិនា តស្ស សេដ្ឋិស្ស គហបតិស្ស អតីតំ វត្ថុំ អាហរិត្វា បរិយោសានេ ចតូហិ គាថាហិ ភាសិតំ.

ធញ្ញំ ធនំ រជតំ ជាតរូបំ, បរិគ្គហំ វាបិ យទត្ថិ កិញ្ចិ,

ទាសា កម្មករា បេស្សា, យេ ចស្ស អនុជីវិនោ.

សព្ពំ នាទាយ គន្តព្ពំ, សព្ពំ និក្ខិប្បគាមិនំ;

យញ្ច ករោតិ កាយេន, វាចាយ ឧទចេតសា.

តញ្ហិ តស្ស សកំ ហោតិ, តំវ អាទាយ គច្ឆតិ;

តំវស្ស អនុគំ ហោតិ, ឆាយាវ អនបាយិនី.

តស្មា ករេយ្យ កល្យាណំ, និចយំ សម្បរាយិកំ;

បុញ្ញានិ បរលោកស្មិំ, បតិដ្ឋា ហោន្តិ បាណិនំ –

មារសំយុត្ត