សក្កសំយុត្ត

វតបទសុត្ត

បុច្ឆា – សក្កសំយុត្តេ បនាវុសោ វតបទសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ សក្កស្ស ភិក្ខវេ ទេវានមិន្ទស្ស បុព្ពេ មនុស្សភូតស្ស សត្ត វតបទានិ សមត្តានិ សមាទិន្នានិ អហេសុំ, យេសំ សមាទិន្នត្តា សក្កោ សក្កត្តំ អជ្ឈគាតិ ឯវមាទិនា ភន្តេ ភគវតា ភាសិតំ.

សក្កស្ស ភិក្ខវេ ទេវានមិន្ទស្ស បុព្ពេ មនុស្សភូតស្ស ឥមានិ សត្ត វតបទានិ សមត្តានិ សមាទិន្នានិ អហេសុំ.

មាតាបេត្តិភរំ ជន្តុំ, កុលេ ជេដ្ឋាបចាយិនំ;

សណ្ហំ សខិលសម្ភាសំ, បេសុណេយ្យប្បហាយិនំ;

មច្ឆេរវិនយេ យុត្តំ, សច្ចំ កោធាភិភុំ នរំ;

តំ វេ ទេវា តាវតិំសា, អាហុ ‘‘សប្បុរិសោ’’ឥតិ.

ទលិទ្ទសុត្ត

បុច្ឆា – ទលិទ្ទសុត្តំ បនាវុសោ កត្ថ កំ អារព្ភ កថញ្ច ភាសិតំ. វិស្សជ្ជនា. រាជគហេ ភន្តេ សម្ពហុលេ ភិក្ខូ អារព្ភ ‘‘ភូតបុព្ពំ ភិក្ខវេ អញ្ញតរោ បុរិសោ ឥមស្មិំយេវ រាជគហេ មនុស្សទលិទ្ទោ អហោសិ មនុស្សកបណោ មនុស្សវរាកោ, សោ តថាគតប្បវេទិតេ ធម្មវិនយេ សទ្ធំ សមាទិយិ, សីលំ, សុតំ, ចាគំ, បញ្ញំ សមាទិយី’’តិ ឯវមាទិនា ភន្តេ ភគវតា ភាសិតំ.

យស្ស សទ្ធា តថាគតេ, អចលា សុប្បតិដ្ឋិតា;

សីលញ្ច យស្ស កល្យាណំ, អរិយកន្តំ បសំសិតំ.

យជមានសុត្ត

បុច្ឆា – យជមានសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – រាជគហេ ភន្តេ សក្កំ ទេវានមិន្ទំ អារព្ភ ភាសិតំ. សក្កោ ភន្តេ ទេវានមិន្ទោ ភគវន្តំ គាថាយ អជ្ឈភាសិ–

‘‘យជមានានំ មនុស្សានំ, បុញ្ញបេក្ខាន បាណិនំ;

ករោតំ ឱបធិកំ បុញ្ញំ, កត្ថ ទិន្នំ មហប្ផល’’ន្តិ.

តស្មិំ ភន្តេ វត្ថុស្មិំ–

‘‘ចត្តារោ ច បដិបន្នា, ចត្តារោច ផលេ ឋិតា;

ឯស សង្ឃោ ឧជុភូតោ, បញ្ញាសីលសមាហិតោ;

យជមានានំ មនុស្សានំ, បុញ្ញបេក្ខាន បាណិនំ;

ករោតំ ឱបធិកំ បុញ្ញំ, សង្ឃេ ទិន្នំ មហប្ផលំ’’ន្តិ.

ឯវំ ខោ ភន្តេ ភគវតា ភាសិតំ.

យជមានានំ មនុស្សានំ, បុញ្ញបេក្ខាន បាណិនំ,

ករោតំ ឱបធិតំ បុញ្ញំ, កត្ថ ទិន្នំ មហប្ផលំ–

ចត្តារោ ច បដិបន្នា, ចត្តារោ ច ផលេ ឋិតា;

ឯស សង្ឃោ ឧជុភូតោ, បញ្ញាសីលសមាហិតោ;

យជមានានំ មនុស្សានំ, បុញ្ញបេក្ខាន បាណិនំ;

ករោតំ ឱបធិកំ បុញ្ញំ, សង្ឃេ ទិន្នំ មហប្ផលំ–

គហដ្ឋវន្ទនាសុត្ត

បុច្ឆា – គហដ្ឋវន្ទនាសុត្តំ បនាវុសោ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ‘‘ភូតបុព្ពំ ភិក្ខវេ សក្កោ ទេវានមិន្ទោ មាតលិំ សង្គាហកំ អាមន្តេសី’’តិ ឯវមាទិនា ភន្តេ ភគវតា ភាសិតំ.

តំ នមស្សន្តិ តេវិជ្ជា, សព្ពេ ភុម្មាច ខត្តិយា;

ចត្តារោ ច មហារាជា, តិទសាច យសស្សិនោ;

អថកោ នាម សោ យក្ខោ, យំ ត្វំ សក្ក នមស្សសិ–

អហញ្ច សីលសម្បន្នេ, ចិររត្តសមាហិតេ;

សម្មាបព្ពជិតេ វន្ទេ, ព្រហ្មចរិយបរាយនេ.

យេ គហដ្ឋា បុញ្ញករា, សីលវន្តោ ឧបាសកា;

ធម្មេន ទារំ បោសេន្តិ, តេ នមស្សាមិ មាតលិ.