៤. អទន្តវគ្គ

បុច្ឆា – ចតុត្ថេ បនាវុសោ អទន្តវគ្គេ ភគវតា កីទិសី ធម្មទេសនាយោ ទេសិតា.

វិស្សជ្ជនា – ចតុត្ថេ ភន្តេ អទន្តវគ្គេ ‘‘នាហំ ភិក្ខវេ អញ្ញំ ឯកធម្មម្បិ សមនុបស្សាមិ, យំ ឯវំ អទន្តំ មហតោ អនត្ថាយ សំវត្តតិ, យថយិទំ ភិក្ខវេ ចិត្តំ, ចិត្តំ ភិក្ខវេ អទន្តំ មហតោ អនត្ថាយ សំវត្តតិ. នាហំ ភិក្ខវេ អញ្ញំ ឯកធម្មម្បិ សមនុបស្សាមិ, យំ ឯវំ ទន្តំ មហតោ អត្ថាយ សំវត្តតិ, យថយិទំ ភិក្ខវេ ចិត្តំ, ចិត្តំ ភិក្ខវេ ទន្តំ មហតោ អត្ថាយ សំវត្តតី’’តិ ឯវមាទិកា ភគវតា ធម្មទេសនាយោ ទេសិតា.